మత్తెక్కించే మాటలతో.. అందరినీ దోచుకున్న 'అతడు'

cheating: అపరిచిత ఫోన్​ నెంబర్ ద్వారా పరిచయమైన ఆమె తన తియ్యని మాటలతో కవ్వించింది... తన తేనె పలుకులతో అవతలి వారిని పులకరింపజేసింది.. మధురమైన తన కంఠంతో కావాల్సినన్నీ కబుర్లు చెప్పింది... అలా వారం, పది రోజులు గడిచాకా.. అవసరాలకు డబ్బు గుంజేది.. ఆమె మాటలకు ఆకర్షితులైన వారు అడిగినంత డబ్బును.. ఫోన్​పే, గూగుల్​ పే ద్వారా పంపేవారు. అంతటితో అగకుండా కొన్ని రోజుల తర్వాత మళ్లీ అడిగేది. కొంతమంది తమ డబ్బు తిరిగి ఇవ్వమని అడిగితే.. ఆమె తన ప్రతాపం చూపేది... అది భరించలేని ఓ బాధితుడు పోలీసులను ఆశ్రయించాడు దీంతో అసలు విషయం బయటపడింది.. ఇంతకీ ఎవరామె?

He as She: నానాటికీ సైబర్ నేరాలు పెరిగిపోతున్నాయి.. రోజుకో వెరైటీ మోసంతో దోచుకుంటున్నారు కేటుగాళ్లు. అలాంటి ఓ ఘరానా మోసమే అన్నమయ్య జిల్లాలో జరిగింది. గొంతుమార్చి ఆడగొంతుతో తియ్యగా మాట్లాడి.. తెలుగు రాష్ట్రాల్లో వందల మంది వద్ద నుంచి లక్షల రూపాయలు దోచేశాడో యువకుడు. వివరాల్లోకి వెళితే.. అన్నమయ్య జిల్లా రాయచోటికి పట్టణానికి చెందిన రావూరి కుమార్ అనే వ్యక్తి ఆడగొంతుతో పలువురుని మోసం చేసి డబ్బులు వసూలు చేశాడు. గత ఏప్రిల్​లో పట్టణానికి చెందిన ఓ వ్యక్తికి ఫోన్​ ద్వారా పరిచయమైన కుమార్.. ఆడ గొంతుతో మాయమాటలు చెప్పాడు. తన ఇంట్లో పరిస్థితి బాగోలేదని పిల్లాడి స్కూల్ ఫీజు కట్టాలని కొంత నగదు సాయం చేయాలని కోరాడు. ఆమె (అతడు) మాటలకు ఆకర్షితుడైన సదరు వ్యక్తి రూ. 16 వేల నగదును ఫోన్​పే​ చేశాడు. ఇలా జరిగిన తర్వాత మరోసారి ఇంకా డబ్బు కావాలని అడిగాడు.

ఆ వ్యక్తి తన వద్ద లేవని చెప్పటంతో.. కుమార్​ తన అసలు రూపం బయటపెట్టాడు. తనతో మాట్లాడిన మాటలను రికార్డు చేశానని.., వాటిని సామాజిక మాధ్యమాల్లో పెడతానని బెదిరించాడు. భయపడిపోయిన బాధితుడు రాయచోటి పోలీసులను ఆశ్రయించాడు. ఫోన్ నెంబర్ ఆధారంగా దర్యాప్తు చేపట్టిన పోలీసులు.. నిందితుడు పట్టణంలోని పోస్ట్​ ఆఫీస్ వీధికి చెందిన కుమార్​గా గుర్తించారు. అదుపులోకి తీసుకొని విచారించగా.. ఆడ గొంతుతో మోసం చేస్తుంది తానేనని ఒప్పుకున్నాడు. ఏపీ-తెలంగాణల్లో వందల మందిని మోసం చేసినట్లు విచారణలో తేలింది. విడతల వారీగా బాధితుల వద్ద నుంచి దాదాపు రూ.8 లక్షలు కాజేసినట్లు పోలీసులు తెలిపారు. కుమార్​​పై కేసు నమోదు చేసి రిమాండ్​కు తరలించామని పోలీసులు వెల్లడించారు.

ఇవీ చూడండి