అనంతపురం జిల్లాలో వైకాపా నేతలు హంగామా చేశారు. జిల్లాలోని నంబుల పూలకుంట మండలంలోని సౌర విద్యుత్ ప్రాజెక్టులో హల్ చల్ చేశారు. ఎన్టీపీసీ సౌర విద్యుత్ ప్రాజెక్టు ప్రాంతంలో ప్రభుత్వం ప్రైవేట్ కంపెనీలకు విద్యుత్ ఉత్పత్తి చేసేందుకు భూమిని లీజుకు ఇచ్చింది. ఈ భూముల్లో ప్రైవేటు సంస్థలు సౌర విద్యుత్ ఉత్పత్తి ఇప్పటికే ప్రారంభించాయి. ఇప్పటికే 200 మెగావాట్ల విద్యుత్ ఉత్పత్తి అవుతోంది. మరో 750 మెగావాట్ల విద్యుత్ ఉత్పత్తికి సంబంధించిన పనులు జరుగుతున్నాయి. ప్రాజెక్టు ఏర్పాటు కోసం ప్రభుత్వం రైతుల నుంచి భూమిని సేకరించింది. అర్హులైన రైతులందరికీ పరిహారం చెల్లించింది. చిన్నపాటి సమస్యలున్న కొందరు రైతులకు పరిహారం జమ కాలేదు.
దీనిని సాకుగా చూపుతూ వందల సంఖ్యలో వైకాపా కార్యకర్తలు విద్యుత్ ప్రాజెక్టులోకి ప్రవేశించారు. అధికారులు, సిబ్బందితో దురుసుగా వ్యవహరిస్తూ దాడికి యత్నించారు. పోలీసులు వారిస్తున్నా ఖాతరు చేయకుండా హంగామా సృష్టించారు. తమ పార్టీ శాసనసభ్యుడిని సంప్రదించాకే పనులు ప్రారంభించాలన్నారు. ప్రాజెక్టు అధికారుల ద్వారా సమాచారం అందుకున్న కదిరి డీఎస్పీ శ్రీనివాసులు... తన సిబ్బందితో అక్కడకు చేరుకున్నారు. పరిహారం విషయాన్ని ఉన్నతాధికారుల దృష్టికి తీసుకెళ్లి పరిష్కరించేలా చర్యలు తీసుకుంటామని వైకాపా శ్రేణులకు హామీ ఇచ్చారు. పనులు ఆపేంతవరకు ఎవరి మాట వినేది లేదని భీష్మించుకొని కూర్చున్నారు. ప్రొక్లెయినర్లు, ట్రాక్టర్లు, సిబ్బందిని బయటకు పంపించివేశారు. అంతా వెళ్లిపోయాక వైకాపా శ్రేణులు వెనుదిరిగాయి.
