లాక్డౌన్ నేపథ్యంలో ప్రజలకు భద్రత, ఉపాధి కరువైన తరుణంలో... అనంతపురం జిల్లాలోని ఆర్డీటీ సంస్థ మాస్కుల తయారీ, పంపిణీకి శ్రీకారం చుట్టింది. గుంతకల్లులోని సంస్థ ప్రతినిధులు గ్రామాలు, పట్టణాల్లో నివసించే మహిళలకు టైలరింగ్ శిక్షణా తరగతులు ఇప్పించి.. వారికి రోజు ఉపాధి లభించేలా మాస్కులు కుట్టే పని కల్పించారు. దాదాపు 2 వేల మంది మహిళలు... రోజుకు 150 నుంచి 200 దాకా మాస్కులు తయారుచేస్తున్నారు. 700 నుంచి 1000 రూపాయల వరకు సంపాదిస్తున్నారు.
రోజుకు రూ. 1000 ఆర్జిస్తున్నాం
గుంతకల్లు పట్టణంలో ఉపాధి లేక ఇంటి దగ్గరే ఉన్న కూలీలను గుర్తించి వారితో మాస్కులు కుట్టించి... తగినంత సొమ్మును ఇచ్చి ఆదుకుంటోంది ఆర్డీటీ సంస్థ. లాక్డౌన్ నేపథ్యంలో కష్టాలు పడుతున్న తరుణంలో ఆర్డీటీ సంస్థ సభ్యులు తమను గుర్తించి ఉపాధి అవకాశాలు కల్పించారని లబ్ది పొందిన మహిళలు తెలియజేశారు. సకాలంలో ప్రజలకు మాస్కులు అందించి కరోనా నుంచి కాపాడటంలో తమ వంతు కర్తవ్యం నిర్వహిస్తున్నందుకు సంతోషంగా ఉందని సంస్థ ప్రతినిధులు చెప్పారు. రోజుకు 200 మాస్కులు కుట్టి... దాదాపు రూ. 1000 వరకు సంపాదిస్తున్నామని మహిళలు తెలిపారు.
చాలా సంతోషంగా ఉంది
పట్టణంలో ఉచితంగా మాస్కులు పంపిణీ చేయడానికి తమ సంస్థ శ్రీకారం చుట్టిందని ఆర్టీటీ సంస్థ ప్రతినిధి లక్ష్మయ్య తెలియజేశారు. అందులో భాగంగా మొదటి విడతగా గుంతకల్లు పట్టణంలోని 38 వార్డుల ప్రజలకు లక్ష మాస్కులు పంపిణీ చేశామన్నారు. ఈ మేరకు తమకు అధిక మొత్తంలో ఖర్చు అవుతున్నా... తాము మాత్రం ఉచితంగానే అందచేస్తున్నామని చెప్పారు. ఈ మాస్కులు చూసి రాష్ట్రంలోని చాలా సంస్థలు తమను సంప్రదిస్తున్నాయని తెలిపారు. డీజీపీకి 25 వేల మాస్కులు అందించామని చెప్పారు.
ఇదీ చదవండి:
