అనంతపురం జిల్లాలో..
రాయదుర్గంలో జనతా కర్ఫ్యూ విజయవంతంగా సాగింది. ఉదయం నుంచే ప్రధాన కూడళ్లన్నీ నిర్మానుష్యంగా మారాయి. ఆర్టీసీ బస్సులు, ప్రైవేటు వాహనాలు నడపకపోవటంతో రోడ్లన్నీ వెలవెలబోయాయి. కూరగాయలు, చికెన్, మటన్ మార్కెట్లతో సహా షాపులు, హోటళ్లు అన్నీ స్వచ్ఛందంగా మూసివేశారు. కరోనా మహమ్మారిని తరిమేసేందుకు ప్రజలంతా ఇంటికే పరిమితమయ్యారు. అర్బన్ ఎస్ఐ రాఘవేంద్రప్ప పోలీస్ సిబ్బందితో కలసి పట్టణంలో తిరుగుతూ పరిస్థితి సమీక్షించారు. నియోజకవర్గంలోని అన్ని మండల కేంద్రాల్లో ప్రజలు జనతా కర్ఫ్యూకి పూర్తి మద్దతు తెలిపారు.
నిర్మానుష్యంగా మారిన హిందూపురం ప్రధాన కూడళ్లు
కరోనా వైరస్ని తరిమికొట్టేందుకు ప్రధాని మోదీ ఇచ్చిన పిలుపు మేరకు హిందూపురం నియోజకవర్గంలో పూర్తి స్థాయిలో జనతా కర్ఫ్యూకి ప్రజలు సంఘీభావం తెలిపారు. నిత్యం జనసందోహంగా కనిపించే ప్రాంతాలన్నీ నిర్మానుష్యంగా మారాయి. పట్టణంలోని వ్యాపార దుకాణాలన్ని స్వచ్ఛందంగా మూసివేశారు. మున్సిపల్ సిబ్బంది వాడవాడలా బ్లీచింగ్ పౌడర్ చల్లారు.
పుట్టపర్తిలో ప్రశాంతి నిలయం మూసివేత
ప్రముఖ ఆధ్యాత్మిక కేంద్రమైన పుట్టపర్తి జనతా కర్ఫ్యూతో నిర్మానుష్యంగా మారింది. ప్రశాంతి నిలయం ప్రధాన ద్వారం మూసివేశారు. సత్యసాయి మహా సమాధి దర్శనానికి భక్తులకు అనుమతి లేకుండా నిలిపివేశారు. పట్టణంలోని ప్రధాన వీధులన్నీ ఖాళీగా కనిపించాయి.
ఇళ్లకే పరిమితమైన ధర్మవరం ప్రజలు
అనంతపురం జిల్లా ధర్మవరంలో జనతా కర్ఫ్యూను ప్రజలు స్వచ్ఛందంగా పాటించారు. ఉదయం ఏడు గంటల నుంచే రహదారులన్నీ నిర్మానుష్యంగా మారాయి. ప్రజలంతా ఇళ్లకే పరిమితమయ్యారు. ఆర్టీసీ బస్సులు డిపోలకే పరిమితంకావటంతో బస్టాండ్ వెలవెలబోయింది.
కళ్యాణదుర్గంలో మూతపడ్డ దుకాణాలు
కళ్యాణదుర్గం నియోజకవర్గంలో జనతా కర్ఫ్యూకి ప్రజలు పూర్తి మద్దతు తెలిపారు. అందరు ఇళ్లకే పరిమితమయ్యారు. పట్టణంలోని వ్యాపార దుకాణాలన్నీ మూతపడ్డాయి.
