అనంతపురం జిల్లా రాయదుర్గం నియోజకవర్గంలోని బొమ్మనహల్ ప్రభుత్వ జూనియర్ కళాశాలలో మార్కుల జాబితాల గల్లంతుపై డీవీఈవో బాలప్ప ఆధ్వర్యంలో బుధవారం ప్రత్యేక బృందం విచారణ ప్రారంభించింది. కళాశాలలో విద్యార్థులకు సంబంధించిన అడ్మిషన్లు, విద్యార్థుల వివరాలు, మార్కుల జాబితాలను తీసుకొని వచ్చే సమయంలో.. పార్సిల్ పోయిందనే విషయాలపై కళాశాల జూనియర్ అసిస్టెంట్ జాకీర్ హుస్సేన్ను విచారించారు.
ఈ సందర్భంగా డీవీఈవో బాలప్ప మాట్లాడుతూ కళాశాలలో 137 మంది విద్యార్థులకు సంబంధించిన మార్కుల జాబితా పార్సిల్ను అనంతపురంలోని ఆర్ఐవో కార్యాలయంలో సంతకం చేయించుకుని జూనియర్ అసిస్టెంట్కు అప్పగించారు. అయితే ఆయన పార్సెల్ తీసుకొని వెళ్లే సమయంలో బస్టాండ్లో పోయిందని, తనకు గుర్తుకు రావడం లేదని జాకీర్ హుస్సేన్ విచారణాధికారి వద్ద పేర్కొన్నాడు. గల్లంతైన విషయంపై తనకు కూడా సమాచారం ఇవ్వని కారణంగా...ఈ నెల 10వ తేదీన బొమ్మనహల్ పోలీసులకు ఫిర్యాదు చేసినట్లు కళాశాల ప్రిన్సిపల్ ఆంజనేయులు తెలిపారు. అనంతపురం మూడో పట్టణ పోలీస్ స్టేషన్లో ఎస్ఐ నాగమధు ఆధ్వర్యంలో సీసీ కెమెరాలు కూడా పరిశీలించామన్నారు.
జాకీర్ హుస్సేన్ బస్టాండ్ వరకు వెళ్లినట్లు సీసీ కెమెరా ఫుటేజ్లో కనిపించాడని అన్నారు. ఈ సంఘటనపై పూర్తి స్థాయిలో విచారణ జరిగి నివేదికను ఉన్నతాధికారులకు పంపుతామన్నారు. విధుల పట్ల నిర్లక్ష్యంగా వ్యవహరించిన జూనియర్ అసిస్టెంట్పై శాఖాపరమైన చర్యలు తీసుకోవాలని నివేదికలు పంపుతున్నట్లు తెలిపారు. విద్యార్థులకు ఎలాంటి ఇబ్బందులు కలగకుండా వారి నుంచి ఎలాంటి ఫీజులు వసూలు చేయకుండా వారంలోగా ఒరిజినల్ మార్కుల జాబితాలు అందజేయడానికి ఆర్ఐవో వెంకటరమణ నాయుడు ఇంటర్ బోర్డు అధికారులతో మాట్లాడినట్లు చెప్పారు.
ప్రస్తుతం విద్యార్థులకు తాత్కలిక మార్కుల జాబితాలను ప్రిన్సిపాల్ వద్ద అందుబాటులో ఉంచామన్నారు. కర్ణాటక, తమిళనాడు రాష్ట్రాల్లో చేరే విద్యార్థులకు ఇబ్బందులు లేకుండా చూస్తామని చెప్పారు. త్వరలోనే మార్కుల జాబితాలను అందజేస్తామన్నారు. విచారణలో బొమ్మనహల్ ప్రభుత్వ జూనియర్ కళాశాల ప్రిన్సిపల్ ఆంజనేయులు, అధ్యాపకులు పాల్గొన్నారు.
ఇదీ చదవండి:
