అనకాపల్లి జిల్లాలో వింత ఆచారం.. తోడుపెద్దుతో యువకుడికి పెళ్లి

Anakapalli district in strange wedding: అనకాపల్లి జిల్లాలో తాజాగా వింత పెళ్లి జరిగింది. ఓ యువకుడికి ఆ ఇంటి పెద్దలంతా కలిసి తోడుపెద్దుతో సంప్రదాయబద్ధంగా వివాహం జరిపించారు. ఆ పెళ్లికి ఊరి ప్రజలంతా హాజరై ఉత్సహంతో నూతన వధూవరులను ఆశీర్వదించారు. ఈ వింత పెళ్లికి సంబంధించిన వీడియోలు సామాజిక మాధ్యమాల్లో వైరల్‌గా మారాయి. అయితే, ఈ వింత పెళ్లికి ఓ కారణం ఉందంటూ ఆ పెళ్లి పెద్దలు వివరించారు.

Anakapalli district in strange wedding: పెళ్లి అనేది ప్రతి యువకుడి, యువతి జీవితంలో అతి ముఖ్యమైన ఘట్టం. అంతేకాదు అదొక మధురమైన జ్ఞాపకం. కుమారుడికి లేదా కుమార్తెకు పెళ్లి చేయాలని తల్లిదండ్రులు నిశ్చయించిన రోజు నుంచి.. సంబంధాల కోసం బంధుమిత్రులతో చర్చలు జరపటం మొదలెడుతారు. ఈ క్రమంలో ఏదైనా సంబంధం కుదిరితే.. అటేడు తరాలు, ఇటేడు తరాల వివరాలను తెలుసుకొని.. ఆ ఇద్దరి జాతకాల వివరాలను సరి చూసి, పొంతనములు కుదిరిన పిదప సంబంధాన్ని నిశ్చయించుకుంటారు. ఆ తర్వాత సంప్రదాయ ప్రకారం చేయాల్సిన కార్యక్రమాలను పూర్తి చేసి ముహూర్తాన్ని ఖరారు చేస్తారు. కానీ.. అనకాపల్లి జిల్లా మాడుగుల మండలం జాలంపల్లి గ్రామానికి చెందిన ఓ తండ్రి తన కొడుకుకు వింత ఆచారం ప్రకారం వివాహం జరిపించాడు.

వివరాల్లోకి వెళ్తే.. అనకాపల్లి జిల్లా మాడుగుల మండలం జాలంపల్లి గ్రామంలో తాజాగా ఓ వింత పెళ్లి జరిగింది. యువకుడికి ఆ ఇంటి పెద్దలంతా కలిసి వారి ఇంట పుట్టిన తోడుపెద్దుతో (ఎద్దు) సంప్రదాయబద్దంగా వివాహం జరిపించారు. ఇంటి ముందు పందిరి వేసి, భాజా భజంత్రీలతో కళ్యాణం చేయించారు. అంతేకాదు ఆ వింత పెళ్లికి ఊరి ప్రజలందరినీ ఆహ్వానించి భోజనాలు పెట్టించి.. నూతన వధూవరులను ఊరేగించారు.

ఈ వింత ఆచారంపై యాదవ ప్రతినిధులు వివరాలను వెల్లడించారు. ''మా గ్రామంలో సంక్రాంతి సమయంలో తోడపెద్దును (ఎద్దు) ఊరేగించే ఆచారం పూర్వీకుల నుంచి ఉంది. దానిని మేము తరతరాలుగా ఆచరిస్తూ వస్తున్నాము. అయితే, కొన్నాళ్ల క్రితం ఈ తోడపెద్దు (ఎద్దు) చనిపోయింది. మూడేళ్ల క్రితం భోగి పండుగ రోజున మురుకుతి రామనాయుడు ఇంటిలో ఓ దూడ జన్మించింది. ఆ దూడను సింహాద్రి అప్పన్న పుట్టుకగా మేము భావించి.. మూడేళ్ల వయసు వచ్చిన తర్వాత ఆ ఇంటిలో పెళ్లి కాని యువకుడితో ఆ తోడపెద్దుకు (ఎద్దు) పెళ్లి జరిపించాలి. ఆ పెళ్లిని వైకుంఠంలో జరిగిన దేవుని పెళ్లిగా మేమంతా భావిస్తాము. ఆ ప్రకారమే.. ఈ పెళ్లిని సాంప్రదాయకంగా నిర్వహించాము. అయితే.. ఆ యువకుడికి పెళ్లి వయస్సు వచ్చాక అతను మళ్లీ స్త్రీని (యువతి) హిందూ ఆచారం ప్రకారం వివాహం చేసుకోవచ్చు.'' అని యాదవ పెద్దలు వివరించారు.

ఈ వింత పెళ్లికి.. తాటాకుల పందిరి వేసి, ఊరంతా భోజనాలు పెట్టి.. భాజా భజంత్రీలతో వేడుకను ఎంతో ఘనంగా నిర్వహించారు. ఈ వేడుక గ్రామంలో ఎంతో ప్రత్యేకతను సంతరించుకుంది. చిన్నలు, పెద్దలు అక్కడికి చేరుకొని సందడి చేశారు. అయితే, ఈ వింత వివాహం జరిగింది.. రైతు రామునాయుడు కుమారుడు వరహాల నాయుడికి, తోడుపెద్దుకి పెళ్లి చేశారు. ఈ వింత పెళ్లికి సంబంధించిన వీడియోలు సోషల్ మీడియాలో వైరల్‌గా మారడంతో ఇలాంటి రోజుల్లో వింత వింత ఆచారాలు ఇంకా ఉన్నాయా? అంటూ నెటిజన్స్ తమ అభిప్రాయాలను కామెంట్ల రూపంలో తెలియజేస్తున్నారు.

ఇవీ చదవండి