కరోనా నేపథ్యంలో ఒలింపిక్స్ను వాయిదా వేయాలంటూ సొంత దేశ ప్రజల నుంచే వ్యతిరేకత. ఓ వైపు కొవిడ్ కేసులు పెరుగుదల, మరోవైపు పలు ప్రాంతాల్లో ఎమర్జెన్సీ విధించడం.. ఇలా ఎన్ని ప్రతికూలతలు వచ్చినా తట్టుకొని నిలబడింది జపాన్ ప్రభుత్వం. ఐపీఎల్, పీఎస్ఎల్ వంటి క్రికెట్ లీగ్లు కరోనాకు ప్రభావితమైనప్పటికీ.. ఇంత పెద్ద ఈవెంట్ను విజయవంతంగా నిర్వహించింది. ఆదివారంతో(ఆగస్టు 8) విశ్వక్రీడలు దిగ్విజయంగా ముగిశాయి.
రోజుకు 5 వేల కేసులొచ్చినా..
ఒలింపిక్స్-2020కి వేదికైన జపాన్లోని టోక్యో నగరంలో రోజుకు సగటున 4 వేలకు పైగా కరోనా కేసులు నమోదయ్యాయి. ఆగస్టు 5న అత్యధికంగా 5,042 కేసులు రావడం గమనార్హం. అయితే ఇందులో టోక్యోలోని ఒలింపిక్ గ్రామం అందుకు మినహాయింపు. ఎందుకంటే ఆ గ్రామంలో ఒక్క కేసు కూడా నమోదు కాలేదు. విశ్వక్రీడల ఆరంభంలో కొన్ని కరోనా కేసులు వచ్చినా.. క్రమేపి నిర్వాహకులు తీసుకున్న జాగ్రత్తల వల్లే ఈ క్రీడలు నిర్విరామంగా జరిగాయి. ప్రపంచవ్యాప్తంగా ఏర్పడిన క్లిష్ట పరిస్థితుల్లోనూ తగిన జాగ్రత్తలు తీసుకుంటూ ఎలాంటి అవాంతరాలు రాకుండా క్రీడలను నిర్వహించడంలో జపాన్ ప్రభుత్వం విజయం సాధించింది.
ఎమర్జెన్సీ విధించి..
ఒలింపిక్స్ ప్రారంభానికి ముందు.. అంటే జులై మధ్యలో టోక్యో నగరమంతా ఎమర్జెన్సీ విధించింది జపాన్ ప్రభుత్వం. ఈ నేపథ్యంలో పౌరులెవరూ బయటకు రాకుండా పకడ్బందీగా చర్యలు తీసుకుంది. అయితే క్రీడల ఆరంభంలో అక్కడికి చేరుకున్న విదేశీ క్రీడాకారుల సహా కొంతమంది అధికారులు వైరస్ బారిన పడినా.. ఆ తర్వాత అన్నీ జాగ్రత్తలు తీసుకుంటూ విశ్వక్రీడలను సునాయాసంగా నిర్వహించింది.
ప్రేక్షకులను నో ఎంట్రీ..
టోక్యో ఒలింపిక్స్ నిర్విరామంగా కొనసాగేందుకు వీలుగా.. ఒలింపిక్ గ్రామంలో ప్రత్యేక జాగ్రత్తలు పాటించడం సహా స్టేడియాల్లోకి ఇతరులతో పాటు ప్రేక్షకులను అనుమతించలేదు.
ఒక విధంగా చెప్పాలంటే ఆ గ్రామానికి టోక్యో నగరానికి ఎలాంటి సంబంధం లేదనే విధంగా నిర్వాహకులు జాగ్రత్తలు తీసుకున్నారు. క్రీడాకారులు వినియోగించిన వస్తువులను, ప్రదేశాలను తరచుగా శానిటైజ్ చేశారు. ఇలా అనేక ప్రత్యేక జాగ్రత్తలు వహించి.. వైరస్ను ఒలింపిక్ గ్రామంలోకి రాకుండా చేశారు. విశ్వక్రీడలను దిగ్విజయంగా ముగించారు.
కొవిడ్ ఉన్నా నిర్వహించాం..
విశ్వక్రీడల విజయవంతంపై ఒలింపిక్స్ ఇండిపెండెంట్ ఎక్స్పర్ట్ ప్యానల్ ఛైర్మన్ బ్రియాన్ మెక్క్లోస్కీ స్పందించారు. తగిన జాగ్రత్తలు పాటించడం ద్వారా మహమ్మారి ఉన్నప్పటికీ ఒలింపిక్స్ను నిర్వహించగలిగామని పేర్కొన్నారు. "మహమ్మారిని దూరంగా ఉంచడం సాధ్యమని టోక్యో ఒలింపిక్స్ రూపంలో ప్రపంచానికి చాటిచెప్పాం. ఇది ప్రపంచ దేశాలు తెలుసుకోవాల్సిన ముఖ్యమైన అంశం. ఈ మెగా ఈవెంట్లో 6 లక్షలకుపైగా పరీక్షలు నిర్వహించాం" అని బ్రియాన్ తెలిపారు.
క్రికెట్ ఆగినా..
ఈ ఏడాది ఫిబ్రవరిలో పాకిస్థాన్ సూపర్ లీగ్ను (పీఎస్ఎల్) నిర్వహించింది పాక్ క్రికెట్ బోర్డు. కానీ, 14 మ్యాచ్లు జరిగిన తర్వాత ఏడుగురు క్రికెటర్లు కరోనా బారిన పడ్డారు. దీంతో లీగ్ను నాలుగు నెలల పాటు వాయిదా వేశారు. మిగిలిన 20 మ్యాచ్లను జూన్లో యూఏఈ వేదికగా నిర్వహించారు.
దీంతో పాటు ఇండియన్ ప్రీమియర్ లీగ్ (ఐపీఎల్) 14వ సీజన్లోనూ మొదట 29 మ్యాచ్లు సజావుగానే సాగాయి. ఆ తర్వాత పలువురు క్రికెటర్లకు కొవిడ్ అంటుకుంది. దీంతో ఈ లీగ్ను కూడా వాయిదా వేయక తప్పలేదు. ఈ టోర్నీ రెండో దశను సెప్టెంబర్ 19 నుంచి యూఏఈ వేదికగా నిర్వహించడానికి బీసీసీఐ సన్నాహాలు చేస్తోంది.
ఇటీవల ఇండియా- శ్రీలంక సిరీస్పైనా ప్రభావం చూపింది.
తక్కువ మంది ఉండి.. బయోబబుల్స్ ఏర్పాటు సహా అవసరమైనన్నీ జాగ్రత్తలు తీసుకున్నప్పటికీ ఈ క్రికెట్ లీగ్లపై కరోనా ప్రభావం పడింది. అటువంటిది ప్రపంచవ్యాప్తంగా 200కి పైగా దేశాల అథ్లెట్లు, సహాయక సిబ్బంది, మేనేజ్మెంట్, కోచ్లు అందరూ కలిసి దాదాపు 11వేలకు పైగా మంది ఒకే చోట మెగా ఈవెంట్ కోసం హాజరయ్యారు. అయినా కొవిడ్ను ఎదురించి విశ్వక్రీడలను సజావుగా నిర్వహించింది జపాన్ ప్రభుత్వం.
ఇదీ చూడండి.. తీరిన 41 ఏళ్ల కల.. టోక్యో ఒలింపిక్స్లో భారత హాకీ జట్టుకు కాంస్యం
