kohli vs Australia in test : డబ్ల్యూటీసీ ఫైనల్(#WTC Final) కోసం ప్రపంచ క్రీడాభిమానులంతా ఇప్పుడు ఎంతో ఆసక్తిగా ఎదురుచూస్తున్నారు. ఈ నెల 7 నుంచి ప్రారంభం కానున్న ఈ పోరులో దిగ్గజ జట్లైన టీమ్ఇండియా-ఆస్ట్రేలియా (India vs Australia) తలపడనున్నాయి. అయితే ఈ టోర్నీలో విరాట్ కోహ్లీ కీలకంగా మారే అవకాశం ఉంది. పరుగుల వరద పారించే ఈ రన్ మెషిన్ విజృంభిస్తే.. ప్రత్యర్థి జట్టుకు కష్టమనే చెప్పాలి. అతడి ఆసీస్పై మంచి రికార్డులే ఉన్నాయి.
ఇప్పటి వరకూ ఆసీస్పై 24 టెస్టులు ఆడిన విరాట్.. 48.26 యావరేజ్తో మొత్తం 1979 పరుగులు చేశాడు. ఇందులో 8 సెంచరీలు, ఐదు హాఫ్సెంచరీలు ఉన్నాయి. ఇక ఈ ఏడాది ఆరంభంలో బోర్డర్‌-గావస్కర్‌ ట్రోఫీలో భాగంగా అహ్మదాబాద్‌ వేదికగా నాలుగో టెస్టులో కోహ్లీ.. ఆసీస్పై 186 రన్స్ నమోదు చేశాడు. ఇదే ఫామ్‌ను ఇప్పుడు WTC Finalలో కొనసాగిస్తే జట్టుకు కలిసొస్తుంది.
మొత్తంగా ఆస్ట్రేలియాపై అన్ని ఫార్మాట్లలో కలిపి.. కోహ్లీ 92 మ్యాచ్‌లు ఆడగా.. 50.97 యావరేజ్తో 4,954 పరుగులు చేశాడు. ఇందులో 16 శతకాలు, 24 అర్ధ శతకాలు ఉన్నాయి.
ఓవల్‌లో మాత్రం.. ఫైనల్ జరిగే ఓవల్‌ లో మాత్రం కోహ్లీకి అంత గొప్ప రికార్డులు ఏమీ లేదు. ఈ వేదికగా మూడు మ్యాచ్‌లు ఆడిన కోహ్లీ.. 28.16 సగటుతో 169 పరుగులు మాత్రమే చేశాడు. ఇందులో ఒక హాఫ్ సెంచరీ ఉంది. ఆరు ఇన్నింగ్స్‌ల్లో .. రెండు సార్లు సింగిల్‌ డిజిట్‌కే పరిమితమయ్యాడు. ఒకసారి డకౌట్‌గా వెనుదిరిగాడు. అయితే.. రీసెంట్గా తిరిగి ఫామ్‌ను అందుకున్న విరాట్ .. WTC Final 2023లో చెలరేగి ఆడాలని అభిమానులు ఆశిస్తున్నారు.
WTC Final ద్వారా విరాట్ ముందు కొన్ని రికార్డులు ఉన్నాయి. అవేంటంటే..
- ఆస్ట్రేలియాపై టెస్టుల్లో 1,979 పరుగులు చేసిన కోహ్లీ.. మరో 21 పరుగులు చేస్తే రెండు వేల పరుగుల మార్క్ను అందుకుంటాడు. మరో 55 పరుగులు చేస్తే.. ఆసీస్పై అన్ని ఫార్మాట్లలో కలిపి మొత్తం 5 వేల పరుగులు పూర్తి చేస్తాడు.
- ఐసీసీ టోర్నమెంట్స్‌ నాకౌట్‌ స్టేజ్‌ మ్యాచ్‌(అన్ని ఫార్మాట్లలో)ల్లో విరాట్ 620 పరుగులు సాధించాడు. ఈ జాబితాలో అతడికన్నా ముందు సచిన్‌ (657), రికీ పాంటింగ్‌ (731) మాత్రమే ఉన్నారు. ఈ ఫైనల్ ద్వారా అతడు ఈ జాబితాలో ముందుకు వెళ్లే అవకాశం ఉంది.
- టెస్టుల్లో ఒకే బౌలర్‌పై అత్యధిక పరుగులు చేసిన రికార్డు పుజారా పేరిట ఉంది. నాథన్‌ లయన్‌ బౌలింగ్‌లో అతడు 570 పరుగులు సాధించాడు. ఈ జాబితాలో కోహ్లీ నాలుగో స్థానంలో ఉన్నాడు. నాథన్‌ బౌలింగ్‌లోనే విరాట్ 511 పరుగులు తన ఖాతాలో వేసుకున్నాడు.
- ఇంగ్లాండ్‌లో అన్ని ఫార్మాట్లలో కలిపి అత్యధిక పరుగులు చేసిన భారత ప్లేయర్స్లో రాహుల్‌ ద్రవిడ్‌ ముందున్నాడు. 46 మ్యాచ్‌ల్లో అతడు 2,645 పరుగులు సాధించాడు. ఆ తర్వాత సచిన్‌(2,626 పరుగులు) ఉండగా.. మూడో స్థానంలో విరాట్(2,574) ఉన్నాడు. మరో 72 పరుగులు చేస్తే.. కోహ్లీ అగ్రస్థానంలోకి వస్తాడు.
- ఆస్ట్రేలియాపై అత్యధిక టెస్టు సెంచరీలు చేసిన భారత ప్లేయర్స్లో సచిన్‌(11 సెంచరీలు) ముందున్నాడు. ఆ తర్వాత గావస్కర్‌-విరాట్(8 సెంచరీలు) ఉన్నారు. మరో సెంచరీ చేస్తే.. కోహ్లీ ఈ జాబితాలో సెకండ్ ప్లేస్లోకి వస్తాడు.
- ఐసీసీ నిర్వహించే టోర్నీ ఫైనల్స్‌లో సెంచరీ చేసిన ఏకైక భారత బ్యాటర్ గంగూలీనే. 2000లో ఐసీసీ ఛాంపియన్స్‌ ట్రోఫీ ఫైనల్‌లో అతడు సెంచరీ బాదాడు. అప్పటి నుంచి ఇప్పటి వరకూ ఏ టీమ్ఇండియా ప్లేయర్ ఐసీసీ ట్రోఫీ ఫైనళ్లలో సెంచరీ చేయలేదు. ఇప్పుడు విరాట్ కొడతాడేమో చూడాలి..
