ODI World Cup 2023 : ఎప్పుడెప్పుడా అని ఎదురుచూసిన వన్డే ప్రపంచకప్ 2023 షెడ్యూల్ విడుదలైన నేపథ్యంలో అక్టోబర్ 15న జరగబోయే భారత్-పాక్ మ్యాచ్ గురించే ప్రస్తుతం చర్చ జరుగుతోంది. సెమీస్‌కు ఎవరు వస్తారు? కప్‌ను ఎవరు సొంతం చేసుకుంటారు? అని పలువురు మాజీలు తమ అభిప్రాయాలను పంచుకుంటున్నారు. ఈ క్రమంలో వెస్టిండీస్ మాజీ స్టార్ ప్లేయర్ క్రిస్ గేల్ ఈ పోరుపై పలు ఆసక్తికర వ్యాఖ్యలు చేశాడు. ఈ మెగా టోర్నీ ముందు ప్రస్తుతం లండన్ వేదికగా జరుగుతున్న యాషెస్ సిరీస్ కూడా చిన్నబోతుందని వ్యాఖ్యానించాడు.
దీని ముందు అది కూడా తక్కువే..
Ashes 2023 : లండన్లోని లార్డ్స్ మైదానంలో ఇంగ్లాండ్-ఆస్ట్రేలియా మధ్య జరుగుతున్న రెండు టెస్టుల యాషెస్ సిరీస్ కూడా ఈ దాయాదుల పోరు కంటే తక్కువే అని అన్నాడు ఈ యునివర్సల్ బాస్. "అక్టోబర్ 15న అహ్మదాబాద్ వేదికగా జరిగే భారత్-పాక్ మ్యాచ్ కోసం చాలా ఆత్రుతగా ఎదురుచూస్తున్నా. అయితే ఈ వన్డే ప్రపంచకప్‌లో భారత్ జట్టులో ఇద్దరు ఆటగాళ్లు కీలకం కానున్నారు. వాళ్లే టీమ్ఇండియా స్టార్ పేసర్ జస్ప్రీత్ బుమ్రా, స్టార్ బ్యాటర్ సూర్యకుమార్‌ యాదవ్. ప్రస్తుతం గాయం కారణంగా ఎన్సీఏ ఆధ్వర్యంలో విశ్రాంతి తీసుకుంటున్న బుమ్రా కోలుకుని వీలైనంత త్వరగా జట్టులోకి వస్తాడనే నమ్మకముంది" అని గేల్ తెలిపాడు.
Chris Gayle : ప్రపంచ క్రికెట్‌లో భారత్-పాక్ మధ్య జరిగే మ్యాచ్ను అత్యంత ప్రజాదరణ కలిగిన పోరుగా అభివర్ణించాడు క్రిస్ గేల్. గతేడాది టీ20 ప్రపంచకప్‌లో ఇరు జట్ల మధ్య జరిగిన పోటీని కోట్లాది మంది వీక్షించారని గుర్తు చేశాడు. అలాగే 2019 వన్డే ప్రపంచకప్‌లో భారత్-పాక్ మ్యాచ్కు 273 మిలియన్లకు పైగా వ్యూస్‌ వచ్చాయని చెప్పాడు.
షెడ్యూల్ ఇది..
ICC World Cup 2023 Schedule : ప్రతిష్టాత్మక వన్డే వరల్డ్కప్ 2023 సిరీస్ భారత్ వేదికగా అక్టోబర్ 5న ప్రారంభం కానుంది. తొలి మ్యాచ్ ఇంగ్లాండ్-న్యూజిలాండ్ మధ్య అహ్మదాబాద్లోని నరేంద్ర మోదీ స్టేడియంలో జరగనుంది. మొత్తం 46 రోజుల పాటు జరిగే ఈ టోర్నీ కోసం 10 వేదికలను సిద్ధం చేశారు. 10 జట్లు ఈ ప్రపంచకప్ టైటిల్‌ కోసం పోటీపడనున్నాయి. ఇప్పటికే 8 జట్లు నేరుగా టోర్నీకి అర్హత సాధించగా.. మరో రెండు జట్లు జింబాబ్వేలో జరిగే క్వాలిఫయర్‌ టోర్నమెంట్‌ ద్వారా ప్రపంచకప్‌నకు అర్హత సాధించనున్నాయి. లీగ్‌ దశలో ప్రతి జట్టు మిగిలిన తొమ్మిది జట్లతో రౌండ్‌ బిన్‌ పద్ధతిలో ఒక్కో మ్యాచ్ ఆడాల్సి ఉంది. ఈ క్రమంలో సెమీఫైనల్స్‌కు పాయింట్ల పట్టికలో టాప్‌-4లో నిలిచిన జట్లు ఫైనల్ సమారానికి అర్హత సాధిస్తాయి. నవంబర్‌ 15, 16న ముంబయి, కోల్‌కతా వేదికగా సెమీ ఫైనల్ మ్యాచ్‌లు జరగనుండగా.. నవంబర్‌ 19న అహ్మదాబాద్‌లో ఫైనల్ మ్యాచ్ జరగనుంది. హైదరాబాద్ వేదికగా 3 ప్రపంచకప్ మ్యాచ్‌లు జరగనున్నాయి.
