Virat Kohli: టెస్టు క్రికెట్లోని 'బిగ్ 5'లో టీమ్ఇండియా స్టార్ విరాట్ కోహ్లీనే అత్యుత్తమని అన్నాడు ఆస్ట్రేలియా మాజీ ఆల్రౌండర్ షేన్ వాట్సన్. అయితే 2019 నవంబర్ నుంచి అతడు సెంచరీ చేయకపోవడానికి గల కారణాలపై పెద్దగా చర్చ అవసరంలేదని భావించాడు. వాట్సన్ జాబితా ప్రకారం.. స్టీవ్ స్మిత్, కేన్ విలియమ్సన్, జో రూట్, బాబర్ అజామ్ కన్నా కోహ్లీనే ముందున్నాడు. ఈ మేరకు ఐసీసీ రివ్యూ లేటెస్ట్ ఎపిసోడ్లో టెస్టుల్లో అత్యుత్తమం ఎవరనేదానిపై వాట్సన్ తన అభిప్రాయాన్ని పంచుకున్నాడు.
"టెస్టుల్లో అత్యుత్తమం ఎవరంటే ఎప్పుడైనా నేను విరాట్ కోహ్లీ అనే చెబుతాను. అతడు చేసేది దాదాపు సూపర్హ్యూమన్లా ఉంటుంది. ఆడటానికి వెళ్లిన ప్రతిసారీ చాలా తీవ్రత కలిగి ఉంటాడు"
-షేన్ వాట్సన్, ఆస్ట్రేలియా మాజీ ఆల్రౌండర్
ఐసీసీ ర్యాంకుల్లో కోహ్లీ పదో స్థానానికి పడిపోయినప్పటికీ టెస్టుల్లో అద్వితీయ రికార్డు కలిగి ఉన్నాడు. ప్రస్తుతానికి దాదాపు 50శాతం బ్యాటింగ్ సగటుతో 27 శతకాలతో పాటు 28 అర్ధశతకాలు అతడి ఖాతాలో ఉన్నాయి. కోహ్లీ తర్వాత.. పాకిస్థాన్ కెప్టెన్ బాబర్ 2, స్టీవ్ స్మిత్ 3, కేన్ విలియమ్సన్ 4, జో రూట్ 5వ స్థానాల్లో ఉంటారని వాట్సన్ పేర్కొన్నాడు.
ఇదీ చూడండి: Virat Kohli: అరుదైన రికార్డుకు చేరువలో విరాట్ కోహ్లీ
