టీమ్ఇండియా ప్రస్తుతం మంచి జోష్లో పరిగెడుతోంది. ఈ ఏడాది ఇప్పటి వరకు ఆడిన టీ20, వన్డే, టెస్టు సిరీస్‌లు.. ఎందులోనూ ఓడిపోలేదు. ఇప్పుడు బోర్డర్ గావస్కర్ ట్రోఫీలో భాగంగా ఆస్ట్రేలియాతో టెస్టు సిరీస్ ఆడుతోంది. ఇప్పటికే ఈ సిరీస్లోని తొలి రెండు మ్యాచ్‌ల్లో విజయం సాధించి.. 2-0 తేడాతో ఆధిక్యంలోకి దూసుకెళ్లింది. అయితే ఈ ఏడాది ఇప్పటివరకు ఆడిన సిరీస్‌లన్నింటిలోనూ కెప్టెన్ రోహిత్ శర్మ కూడా మంచి ప్రదర్శన చేశాడు. మంచి స్ట్రైక్ రేట్తోనే ఆడుతున్నాడు. మొత్తం రెండు సెంచరీలు బాదాడు.
అతడి గణాంకాల విషయానికొస్తే.. ఈ ఏడాది అతడు ఇప్పటి వరకు మొత్తం ఎనిమిది మ్యాచ్‌లు ఆడాడు. ఈ మ్యాచ్‌ల్లోని 9 ఇన్నింగ్స్ ఆడిన హిట్ మ్యాన్ 56.77 సగటుతో మొత్తం 511 పరుగులు చేశాడు. ఇందులో రెండు శతకాలు, రెండు అర్ధ శతకాలు ఉన్నాయి.
అలాగే ఈ ఏడాది టీమ్ ఇండియా తరఫున అత్యధికంగా పరుగులు చేసిన ఆటగాళ్ల జాబితాలో రోహిత్ శర్మ రెండో స్థానంలో నిలిచాడు. అగ్రస్థానంలో యంగ్ బ్యాటర్ శుభ్‌మన్ గిల్ 769 రన్స్తో నంబర్ వన్‌గా నిలిచాడు.
ఈ ఏడాది టెస్టుల్లో ఇప్పటివరకు అతడు రెండు టెస్టు మ్యాచ్‌లు ఆడాడు. ఈ మ్యాచ్‌ల్లోని మూడు ఇన్నింగ్స్‌ల్లో 61 సగటుతో 183 రన్స్ చేశాడు. ఇందులో ఒక సెంచరీ కూడా ఉంది.
ఇక ఆరు వన్డే మ్యాచులాడి 54.66 సగటు, 105.80 స్ట్రైక్ రేట్తో 328 పరుగులు చేశాడు. ఇందులో ఒక శతకం, రెండు అర్ధ శతకాలు ఉన్నాయి. అయితే ఇప్పటివరకు ఒక్క టీ20 మ్యాచ్ కూడా ఆడలేదు.
మొత్తంగా రోహిత్ శర్మ ఇప్పటి వరకు టీమ్ఇండియా తరుపున మొత్తం 47 టెస్టులు, 241 వన్డేలు, 148 టీ20లు ఆడాడు. టెస్టుల్లో 47.76 సగటుతో 3320 పరుగులు చేయగా.. వన్డేలలో 48.91 సగటుతో 9,782 రన్స్, టీ20ల్లో 31.32 సగటు, 139.24 స్ట్రైక్ రేట్తో 3853 రన్స్ సాధించాడు.
ఇక ప్రస్తుతం టీమ్ఇండియా బోర్డర్ - గావస్కర్ ట్రోఫీలో భాగంగా ఆస్ట్రేలియాతో టెస్ట్ సిరీస్ ఆడుతున్న సంగతి తెలిసిందే. అయితే ఇప్పటికే వరుసగా రెండు టెస్టుల్లో గెలిచిన భారత్‌.. మూడో మ్యాచ్లోనూ ఆసీస్ను ఓడించి ప్రపంచ టెస్టు ఛాంపియన్‌ షిప్‌ ఫైనల్‌ బెర్తును ఖరారు చేసుకోవాలని పట్టుదలతో ఉంది. మార్చి 1 నుంచి ఇండోర్‌ వేదికగా మూడో టెస్టు మొదలు కానుంది.
ఇదీ చూడండి: కేఎల్ రాహుల్ వైస్ కెప్టెన్సీ తొలగింపు.. ఎట్టకేలకు స్పందించిన రోహిత్ శర్మ!
