Ishan Kishan Double Hundred : అంతర్జాతీయ వన్డే క్రికెట్‌లో ఇషాన్ కిషన్ (210) సంచలనం సృష్టించాడు. బంగ్లాదేశ్‌తో మూడో వన్డేలో అత్యంత వేగవంతమైన డబుల్ సెంచరీ సాధించి రికార్డు నెలకొల్పాడు. కేవలం 126 బంతుల్లోనే ద్విశతకం బాదాడు. ఈ క్రమంలో క్రిస్‌ గేల్ (138 బంతుల్లో) పేరిట ఉన్న ఫాస్టెస్ట్‌ డబుల్ సెంచరీ రికార్డును ఇషాన్ అధిగమించాడు. దీంతో క్రికెట్ ప్రపంచం ఇషాన్‌ను అభినందనలతో ముంచెత్తింది. సోషల్‌ మీడియా వేదికగా ప్రశంసల వర్షం కురిసింది.
- "ఇషాన్ కిషన్ అద్భుతమైన ఇన్నింగ్స్‌. టీమ్‌ఇండియా నుంచి మిగతా ప్రపంచం కోరుకొనే విధానం ఇలాంటిదే" - వీరేంద్ర సెహ్వాగ్, టీమ్‌ఇండియా మాజీ క్రికెటర్
- "వన్డేల్లో డబుల్ సెంచరీ సాధించిన అత్యంత యువ క్రికెటర్ ఇషాన్ కిషన్. అత్యంత వేగవంతమైన ద్విశతకం ఇదే.. కంగ్రాట్స్" - జాన్స్‌, క్రికెట్ విశ్లేషకుడు
- "ప్రతి ఒక్కరూ తన రికార్డు గురించి మాట్లాడుకొనేలా చేశాడు. అద్భుతమైన రికార్డు సెట్టర్" - బీసీసీఐ
- "ఈతరం టీమ్‌ఇండియా క్రికెట్‌లో ఇలాంటి ఆటే ఆడాలి" - మైకెల్‌ వాన్, ఇంగ్లాండ్‌ మాజీ కెప్టెన్
- "అవకాశాల గురించి మాట్లాడటమే కాదు.. సద్వినియోగం చేసుకోవడం అద్భుతం. ఇషాన్ సూపర్‌గా ఆడావు" - వసీం జాఫర్, టీమ్‌ఇండియా మాజీ క్రికెటర్
- "రికార్డ్స్‌.. నంబర్స్‌.. ఎంటర్‌టైన్‌మెంట్.. వీటన్నింటి కలయికతో వచ్చిన ప్రదర్శన శనివారం ప్రత్యేకంగా నిలిచేలా చేసింది" - ముంబయి ఫ్రాంచైజీ
- "డైనమైట్‌ నుంచి అద్భుతమైన ఇన్నింగ్స్‌. వేగవంతమైన సెంచరీ సాధించిన ఇషాన్ కిషన్‌కు అభినందనలు" - లసిత్‌ మలింగ, మాజీ క్రికెటర్
- "విధ్వంసం సృష్టించావు ఇషాన్ కిషన్. ఇలానే ఆడు పాకెట్‌ డైనమో" - వినయ్ కుమార్‌, మాజీ క్రికెటర్
- "ఇండియా 'కి - షాన్‌'.. అత్యుత్తమ ఆటగాళ్ల జాబితాలో చేరిపోయావు" - కోల్‌కతా ఫ్రాంచైజీ
కెరీర్‌లో 10వ వన్డే మ్యాచ్‌ ఆడిన 24 ఏళ్ల ఇషాన్ కిషన్.. శనివారం నాటి మ్యాచ్‌లో అద్భుతంగా రాణించాడు. కేవలం 126 బంతుల్లోనే ద్విశతకం సాధించి.. ఇప్పటి వరకు క్రిస్‌ గేల్ (138 బంతుల్లో) పేరిట ఉన్న రికార్డును తుడిచిపెట్టేశాడు. ఈ మ్యాచ్‌లో 210 (134 బంతుల్లో 24 ఫోర్లు, 10 సిక్స్‌లు) పరుగులు చేసిన ఇషాన్.. ఇన్నింగ్స్‌ 36వ ఓవర్‌లో భారీ షాట్‌కు ప్రయత్నించి ఔట్‌ అయ్యాడు. ఇన్నింగ్స్‌ బ్రేక్‌ మధ్యలో మీడియా ఛానల్‌తో మాట్లాడిన అతడు.. "ఇంకా 15 ఓవర్లు మిగిలి ఉండగానే నేను ఔటయ్యాను. లేదంటే కచ్చితంగా 300 చేసి ఉండేవాణ్ని" అని తెలిపాడు.
ఇలా భారత్ తరఫున ద్విశతకం బాదిన నాలుగో బ్యాటర్‌ ఇషాన్ కిషన్ కావడం విశేషం. ఇప్పటివరకు రోహిత్‌ శర్మ (264, 209, 208*) మూడు సార్లు డబుల్ సెంచరీ సాధించగా.. వీరేంద్ర సెహ్వాగ్ (219), సచిన్‌ తెందూల్కర్‌ (200*) ఈ జాబితాలో ముందున్నారు. దీని గురించి ఇషాన్ మాట్లాడుతూ.. "అంతటి లెజెండ్స్‌ మధ్య నా పేరు ఉండటం గర్వంగా ఉంది. బ్యాటింగ్‌ చేసేందుకు పిచ్‌ బాగా సహకరించింది. నా ఆలోచన ఒక్కటే.. బంతి కనిపిస్తే షాట్‌ కొట్టాల్సిందే" అని చెప్పాడు.
