గౌతమ్‌ గంభీర్-విరాట్ కోహ్లీ.. ప్రస్తుతం ఐపీఎల్లో వీరిద్దరూ తమ చర్యలతో చర్చనీయాంశంగా మారారు. అందుకు కారణం.. తాజాగా లఖ్నవూ-ఆర్సీబీ మధ్య జరిగిన మ్యాచ్లో ఒకరిమీదకు ఇంకొకరు వెళ్తూ గొడవపడటమే. అయితే వీరిద్దరు గొడవపడటం కొత్తేమీ కాదు. గతంలోనూ పలు సందర్భాల్లో ఇలానే వాగ్వాదానికి దిగారు.
మొదట బాగానే ఉన్నా ఆ తర్వాతే.. వాస్తవానికి వీరిద్దరూ దిల్లీ నుంచి వచ్చిన వారే. మైదానంలో దిగారంటే విజయమే లక్ష్యంగా దూకుడుగా ఆడుతారు. ఆటలోనే కాదూ వ్యక్తిగతంగా కూడా దూకుడుగానే వ్యవహరిస్తుంటారు. ఒకప్పుడు వీరిద్దరి మధ్య బాండింగ్ ఉండేదనే చెప్పాలి. మంచి మధురజ్ఞాపకాలు కూడా ఉన్నాయి. ఓ సందర్భంలో గంభీర్ తనకు వచ్చిన 'మ్యాన్‌ ఆఫ్‌ ది మ్యాచ్' అవార్డును కూడా తన జూనియర్ కోహ్లీకి ఇవ్వాలని వేదికపైనే విజ్ఞప్తి చేశాడు. 2009లో శ్రీలంకతో జరిగిన వన్డేలో ఈ ఇద్దరు కలిసి 224 పరుగుల భాగస్వామ్యాన్ని నెలకొల్పారు. దీంతో ఆ మ్యాచ్లో లంక విసిరిన 316 పరుగుల లక్ష్యాన్ని టీమ్ఇండియా ఈజీగా ఛేదించింది. గంభీర్ 150 పరుగులు చేస్తే.. కోహ్లీ 107 పరుగులు చేశాడు. వన్డేల్లో కోహ్లీకి అదే ఫస్ట్ సెంచరీ కావడం విశేషం. విరాట్.. ఎంతో టాలెంట్ ప్లేయర్ అని.. భవిష్యత్తులో 100 సెంచరీలు పూర్తి చేస్తాడని గంభీర్ అప్పట్లోనే ఆశాభావం వ్యక్తం చేశాడు. అయితే అప్పటికే గంభీర్ టీమ్లో సీనియర్‌ ఆటగాడు. 2007 టీ20 ప్రపంచకప్‌లో 54 బంతుల్లో 75 పరుగులు చేసి భారత్‌ ట్రోఫీ గెలవడంలో కీలక పాత్ర పోషించాడు.
తొలిసారి అప్పుడే.. 2013లో తొలిసారి ఓ ఐపీఎల్ మ్యాచులో వీరి మధ్య మనస్పర్థలు ఏర్పడ్డాయి. ఆ ఏడాది బెంగళూరులోని చిన్నస్వామి స్టేడియంలో ఆర్సీబీ-కేకేఆర్‌ జట్లు మధ్య మ్యాచ్ జరగగా.. బెంగళూరుకు కోహ్లీ కెప్టెన్గా ఉండగా.. కేకేఆర్‌కు గంభీర్ నాయకత్వం వహించాడు. అయితే బెంగళూరు విజయానికి 11 ఓవర్లలో 80 పరుగులు అవసరమైన సమయంలో... కోల్కతా బౌలర్‌ బాలాజీ బంతిలో కోహ్లీ పెవిలియన్ చేరాడు. దీంతో కేకేఆర్‌ ఆటగాళ్లు సంబరాలు చేసుకున్నారు. ఈ సమయంలో డగౌట్కు వెళ్తున్న కోహ్లీకి.. గౌతమ్‌ గంభీర్ వైపు నుంచి ఏవో కామెంట్స్ వినిపించాయి. అంతే విరాట్ కోహ్లీ ఒక్కసారిగా సీరియస్ అయ్యాడు. అలా కోహ్లీ-గంభీర్ మధ్య గొడవ మొదలైంది. అక్కడే ఉన్న మిగతా ప్లేయర్స్ వారిని అడ్డుకున్నారు.
రెండోసారి.. 2016లో మరోసారి వీరిద్దరి ఐపీఎల్‌లోనే వాగ్వాదానికి దిగారు. ఈడెన్‌ గార్డెన్స్‌ వేదికగా జరిగిన మ్యాచ్లో ఫస్ట్ బ్యాటింగ్‌ చేసిన కోల్కతా 183 పరుగులు చేసింది. గంభీర్ 34 బంతుల్లో 51 రన్స్ చేశాడు. లక్ష్యఛేదనకు దిగిన ఆర్సీబీ విజయం దిశగా సాగింది. అప్పటికే విరాట్ క్రీజులో ఉన్నాడు. 19వ ఓవర్లో కోహ్లీ పరుగు తీసి నాన్‌స్ట్రైకర్‌ వైపు చేరుకున్నాడు. అయితే అప్పుడు గంభీర్ దూకుడుగా.. బంతిని కోహ్లీవైపు విసిరాడు. ఇది వారిద్దరి మధ్య మరోసారి వివాదానికి దారితీసింది.
పలు సందర్భాల్లో.. గతేడాది దాదాపు మూడు సంవత్సరాలు(1,020 రోజులు) తర్వాత కోహ్లీ అంతర్జాతీయ సెంచరీ సాధించాడు. దీనిపై గంభీర్ ఆసక్తికర వ్యాఖ్యలు చేశాడు. "కోహ్లీ ప్లేస్లో ఇంకెవరైనా టీమ్లో ఉండి.. మూడేళ్లపాటు సెంచరీ చేయకపోతే అతడు టీమ్లో కొనసాగేవాడు కాదు" అని అన్నాడు. అలా గంభీర్ చాలా సార్లు.. విరాట్పై కాంట్రవర్సీ కామెంట్స్ చేశాడు.
కోహ్లీ పోస్ట్.. అయితే తామిద్దరి మధ్య.. వ్యక్తిగత వైరం లేదని.. కేవలం మైదానంలో మాత్రమే ఉంటుందని గంభీర్ 2016లోనే ఓ ఇంటర్వ్యూలో చెప్పుకొచ్చాడు. మైదానం బయట కోహ్లీ తనకు మంచి ఫ్రెండ్ అని కూడా అన్నాడు. ఇకపోతే తాజాగా గొడవ తర్వాత.. కోహ్లీ ఓ పోస్ట్ పెట్టాడు. "మనం వినేదంతా అభిప్రాయం మాత్రమే.. నిజం కాదు. మనం చూసేదంతా దృష్టికోణం మాత్రమే.. నిజం కాదు" అని ఓ కొటేషన్ రాసుకొచ్చాడు. గంభీర్తో జరిగిన గొడవకు జరిగిన సమాధానమే ఈ పోస్ట్ అని అంతా అనుకుంటున్నారు.
భారత క్రికెట్లో కొందరి ప్లేయర్స్ మధ్య ఇలాంటి కొన్ని వివాదాలు కాంట్రవర్సీలుగా మారాయి.
ధోనీ-యువీ.. ఒకప్పుడు పరిమిత ఓవర్ల క్రికెట్లో వీరిద్దరూ టీమ్ ఇండియాకు ఎంతో బలం. అయితే యూవీ అనారోగ్యంతో జట్టులో స్థానం కోల్పోయాడు. కానీ, కోలుకున్నాక అతడిని ధోనీ జట్టులోకి తీసుకోలేదు. దీంతో యూవీ కెరీర్ ముగిసిపోయింది. దీనిపై యూవీ తండ్రి, ఇండర్నేషనల్ క్రికెటర్‌ యోగ్‌రాజ్‌ సింగ్‌ బహిరంగంగానే ధోనీపై విమర్శలు కూడా చేశాడు. తన కొడుకుని మహీ వెన్నుపోటు పొడిచాడని ఆరోపించాడు. యువీ కూడా పలు సందర్భాల్లో రిటైర్మెంట్ తర్వాత మహీ నుంచి సరైన ప్రోత్సాహం అందలేదని చెప్పాడు. ధోనీ-జడేజా
ధోనీ- జడ్డూ.. గతేడాది ఐపీఎల్లో సీఎస్కేకు ధోనీ స్థానంలో రవీంద్ర జడేజాకు కెప్టెన్సీ అప్పగించారు. కానీ, చెన్నై టీమ్ ఫెయిల్ అయింది. దీంతో జడ్డూ.. సారథ్య బాధ్యతల నుంచి తప్పుకున్నాడు. ఆ ఓటములకు టీమ్ మేనేజ్‌మెంట్‌ తనను బలి చేసిందని ఫీల్ అయ్యాడు జడేజా. ఈ క్రమంలోనే మేనేజ్మెంట్తో వివాదం కూడా జరిగినట్లు వార్తలొచ్చాయి. మేనేజ్మెంట్లో మహీ కూడా కీలక పాత్ర పోషిస్తాడన్న సంగతి తెలిసిందే. కానీ ఆ తర్వాత ఈ వివాదం పరిష్కారమైందని ప్రచారం సాగింది. ప్రస్తుతం మహీ కెప్టెన్సీలోనే జడేజా ఆడుతున్నాడు.
దినేశ్ కార్తీక్‌ - మురళీ విజయ్‌.. ఈ ఇద్దరూ కూడా మంచి ఫ్రెండ్స్. వీరు తమిళనాడు జట్టు తరఫు కలిసి ఆడారు. కానీ, దినేశ్ భార్యతో మురళీ ప్రేమలో పడటం వల్ల అసలు వివాదం ప్రారంభమైంది. కార్తీక్‌ సైలెంట్గా డివొర్స్ తీసుకొని వీరికి దూరంగా ఉన్నాడు. అనంతరం కార్తీక్‌... స్క్వాష్‌ క్రీడాకారిణి దీపికా పల్లికల్‌ను వివాహం చేసుకున్నాడు.
సచిన్- కాంబ్లీ.. సచిన్-కాంబ్లీ చిన్నప్పుడు నుంచి మంచి మిత్రులు. హారిస్‌ షీల్డ్‌ మ్యాచ్లో వీరిద్దరు కలిసి వరల్డ్ రికార్డ్ క్రియేట్ చేశారు. ఆ తర్వాత ఇద్దరూ భారత జట్టుకు ప్రాతినిథ్యం వహించారు. కాంబ్లీ వివాదాల్లో చిక్కుకొని జట్టులో స్థానం కోల్పోయాడు. సచిన్ మాత్రం జట్టుతో కెరీర్ కొనసాగించాడు. ఈ క్రమంలోనే కాంబ్లీ.. సచిన్పై పలు ఆరపణలు చేశాడు. సచిన్ తనను పూర్తిగా విస్మరించాడని అన్నాడు. చివరికి సచిన్.. వీడ్కోలు ప్రసంగంలో కూడా తన పేరు కూడా చెప్పలేదని బహిరంగంగానే పేర్కొన్నాడు. ఆ తర్వాత ఈ వివాదం పరిష్కారమైంది.
మునాఫ్‌ పటేల్‌ - అమిత్‌ మిశ్రా.. ఐపీఎల్ నాలుగో సీజన్‌లో డెక్కన్‌ ఛార్జర్స్‌-ముంబయి ఇండియన్స్‌ వాంఖడే స్టేడియంలో పోటీపడగా.. ఆ మ్యాచ్లో మునాఫ్‌-మిశ్రా ఢీ కొన్నారు. పరిస్థితి చేజారుతోందని గమనించిన అంపైర్‌ ఎస్‌.రవి జోక్యం చేసుకోని సిట్యూయేషన్ను కంట్రోల్ చేశారు. వివాదం సద్దుమణిగింది.
హర్బజన్‌-శ్రీశాంత్.. హర్బజన్‌ సింగ్‌- శ్రీశాంత్ వివాదం భారత క్రికెట్లో పెను సంచలనం. 2008లో సచిన్ గైర్హాజరీ అవ్వడంతో ముంబయి ఇండియన్స్‌కు హర్బజన్‌ సింగ్‌ కెప్టెన్గా వ్యవహరించాడు. అదే సమయంలో పంజాబ్‌ జట్టు తరపున పేస్‌ బౌలర్‌గా శ్రీశాంత్ బరిలోకి దిగాడు. వీరిద్దరూ టీమ్ ఇండియాలో సహచరులే అయినప్పటికీ.. మ్యాచ్లో శ్రీశాంత్ ప్రత్యర్థి జట్టును తెగ కామెంట్స్ చేశాడు. చివరికి పంజాబ్‌ 66 పరుగులతో గెలుపొందింది. మ్యాచ్ అనంతరం కూడా శ్రీశాంత్ ఏదో కామెంట్‌ చేశాడు. దీంతో సహనం కోల్పోయిన హర్బజన్‌ సింగ్‌.. శ్రీశాంత్ను చెంపదెబ్బ కొట్టాడు. దీంతో శ్రీశాంత్ కన్నీరు కూడా పెట్టుకున్నాడు. దీంతో ఐపీఎల్లో హర్బజన్‌పై 13 మ్యాచ్‌ల నిషేధం విధించింది బీసీసీఐ. అదనంగా ఐదు వన్డేల్లోనూ భజ్జీపై వేటు వేసింది.
ఇదీ చూడండి: విరాట్-గంభీర్ కాంట్రవర్సీ.. మధ్యలో ఈ నవీన్ ఉల్ హక్ ఎవరబ్బా?
