Daryl Mitchell Record: న్యూజిలాండ్ ఆల్రౌండర్ డారిల్ మిచెల్ అరుదైన రికార్డు సృష్టించాడు. 73 ఏళ్ల చరిత్రను తిరగరాశాడు. ఇంగ్లాండ్తో ఒక టెస్టు సిరీస్లో 400పైచిలుకు పరుగులు చేసిన మొట్టమొదటి కివీస్ బ్యాటర్గా నిలిచాడు. ఇంగ్లాండ్తో హెడింగ్లేలో జరుగుతున్న చివరిదైన మూడో టెస్టులో ఈ ఘనత సాధించాడు. ఇప్పటివరకు మొత్తం 3 టెస్టుల్లో ఐదు ఇన్నింగ్స్ల్లో బ్యాటింగ్ చేసి 482 పరుగులతో ఉన్నాడు. ఇందులో 3 సెంచరీలు ఉన్నాయి. మరో ఇన్నింగ్స్ మిగిలున్నందున మిచెల్ 500 పరుగుల మైలురాయి దాటే అవకాశం కూడా ఉంది.
అంతకుముందు ఈ ఘనత బెర్ట్ సట్క్లిఫ్ పేరిట ఉంది. కానీ అతడు ఆడింది 3 మ్యాచ్ల టెస్టు సిరీస్ కాదు. అతడు మొత్తం 7 ఇన్నింగ్స్ల్లో 451 పరుగులు చేశాడు.
ప్రస్తుతం ఇంగ్లాండ్తో సిరీస్లో ఆకాశమే హద్దుగా చెలరేగిపోతున్న మిచెల్.. 3 సెంచరీలు, ఓ అర్ధశతకం చేశాడు. 190 అత్యధిక వ్యక్తిగత స్కోరు. అయినప్పటికీ జట్టును గెలిపించలేకపోతున్నాడు. మిచెల్, బ్లండెల్ మినహా కివీస్ బ్యాటర్లలో ఎవరూ ఆకట్టుకోలేకపోతున్నారు. తొలి రెండు టెస్టుల్లో గెలిచిన ఇంగ్లాండ్ ఇప్పటికే సిరీస్ దక్కించుకుంది.
చివరిదైన మూడో టెస్టు తొలి ఇన్నింగ్స్లో తొలుత బ్యాటింగ్ చేసిన న్యూజిలాండ్ 329 పరుగులకు ఆలౌటైంది. మిచెల్(109) టాప్ స్కోరర్. బ్లండెల్ 55 పరుగులు చేశాడు. ఇంగ్లాండ్ స్పిన్నర్ జాక్ లీచ్ 5 వికెట్లతో అదరగొట్టాడు. అనంతరం.. బ్యాటింగ్ ప్రారంభించిన ఇంగ్లాండ్కు తన పేస్తో చుక్కలు చూపించాడు లెఫ్టార్మ్ బౌలర్ ట్రెంట్ బౌల్ట్. టాప్-3 బ్యాటర్స్ను క్లీన్బౌల్డ్ చేశాడు. ఈ కథనం రాసేవరకు ఇంగ్లాండ్ 4 వికెట్లకు 55 పరుగులతో ఉంది. క్రీజులో బెయిర్స్టో(16), బెన్ స్టోక్స్(18) ఉన్నారు.
ఇవీ చూడండి: పాపం నికోల్స్.. ఎలా అవుటయ్యాడో చూడండి!
