IND vs WI 2022: మిడిలార్డర్ వైఫల్యంతో దక్షిణాఫ్రికాలో వన్డే సిరీస్‌ కోల్పోయిన భారత్.. జట్టు కూర్పును నిర్మించుకోవడమే లక్ష్యంగా వెస్డిండీస్‌తో పోరుకు సిద్ధమైంది. మళ్లీ జట్టును విజయాలబాట పట్టించాలని రోహిత్-ద్రవిడ్ ద్వయం భావిస్తోంది. విండీస్‌తో తొలి వన్డే ద్వారా ప్రపంచ క్రికెట్లో 1000 వన్డేలు ఆడిన తొలి జట్టుగా టీమ్ఇండియా.. చరిత్ర సృష్టించనుంది. 1974లో తొలి వన్డే ఆడిన భారత్.. 47 ఏళ్ల తర్వాత ఇప్పుడు 1000వ వన్డే ఆడనుంది.
ఈ క్రమంలోనే వచ్చే ఏడాది వన్డే ప్రపంచకప్‌ నాటికి జట్టు కూర్పును సెట్ చేసుకోవాలని టీమ్ఇండియా భావిస్తోంది. దక్షిణాఫ్రికాతో వన్డే సిరీస్‌లో బయటపడ్డ లోపాలను ఈ సిరీస్‌ ద్వారా సరి చేయాలని రోహిత్-ద్రవిడ్ భావిస్తున్నారు. రోహిత్ కెప్టెన్గా తిరిగి జట్టులో చేరడం జట్టుకు కలిసి రానుంది.
మరో ఓపెనర్ కేఎల్ రాహుల్ తొలి వన్డేకు అందుబాటులో ఉండటం లేదు. శిఖర్ ధావన్, రుతురాజ్ గైక్వాడ్‌లు కరోనా బారిన పడటం వల్ల ఇషాన్ కిషన్‌ రోహిత్‌తో కలిసి ఇన్నింగ్స్ ప్రారంభించనున్నాడు. అన్ని ఫార్మాట్ల కెప్టెన్సీకి గుడ్‌బై చెప్పిన విరాట్‌ కోహ్లీ.. బ్యాటింగ్‌లో తన మునుపటి ఫామ్ అందుకోవాలని జట్టు కోరుకుంటోంది. కరోనాతో శ్రేయస్ అయ్యర్ ఈ సిరీస్‌కు దూరం కాగా మిడిల్ ఆర్డర్‌లో ఎవరు బ్యాటింగ్‌కు వస్తారు అనేది తేలాల్సి ఉంది.
సూర్యకుమార్ యాదవ్, దీపక్ హుడాలు మిడిల్ స్థానాలను భర్తీ చేసే అవకాశం ఉంది. దక్షిణాఫ్రికా సిరీస్‌లో వెంకటేశ్ అయ్యర్‌ను మిడిల్ ఆర్డర్‌లో ఆడించినా ఆశించిన మేర రాణించలేదు. తిరిగి వన్డే జట్టులోకి వచ్చిన కుల్దీప్ యాదవ్ తన సహచరుడు చాహల్‌తో కలిసి స్పిన్ విభాగాన్ని నడిపించే అవకాశం ఉంది. తొలిసారి భారత జట్టుకు ఎంపికైన స్పిన్నర్‌ రవిబిష్ణోయ్‌ కూడా అవకాశం కోసం ఎదురు చూస్తున్నాడు. సీనియర్ బౌలర్లు బుమ్రా, షమికి విశ్రాంతిని ఇవ్వడం వల్ల శార్దుల్ ఠాకూర్ పేస్‌ దళాన్ని నడిపించనున్నాడు. ఈ సిరీస్‌లో రాణించి వచ్చే ఏడాది వన్డే ప్రపంచకప్‌ జట్టులో చోటు సుస్థిరం చేసుకోవాలని.. మహమ్మద్ సిరాజ్, దీపక్ చాహర్, ప్రసిద్ధ్‌ క్రిష్ణ, ఆవేష్ ఖాన్‌ భావిస్తున్నారు.
ఇటీవల ఇంగ్లాండ్‌తో జరిగిన టీ20 సిరీస్‌ కైవసం చేసుకున్న వెస్టిండీస్ అదే జోరులో భారత్‌పై పైచేయి సాధించాలని ఉవ్విళ్లూరుతోంది. పవర్ హిట్టర్ నికోలస్ పూరన్, కెప్టెన్ కీరన్ పోలార్డ్‌పై ఆ జట్టు ఆశలు పెట్టుకుంది. సిరీస్‌లో భాగంగా మొత్తం 3 వన్డేలు కూడా గుజరాత్‌లోని నరేంద్రమోదీ మైదానంలోనే జరగనున్నాయి. ఫిబ్రవరి 6, 9, 11 తేదీల్లో మ్యాచ్‌లు జరగనున్నాయి. మధ్యాహ్నం 1:30 గంటలకు మ్యాచ్‌ మొదలు కానుంది.
ఇదీ చూడండి : అండర్‌-19 ప్రపంచకప్‌ ఫైనల్‌.. ఈ విషయాలు మీకు తెలుసా?
