'బాహుబలి'తో దేశవ్యాప్తంగా గుర్తింపు తెచ్చుకున్న దర్శకధీరుడు రాజమౌళితో పాటు ఆయన కుటుంబానికి కరోనా పాజిటివ్గా తేలింది. ఈ విషయాన్ని ఆయనే స్వయంగా ట్వీట్ చేశారు. తన కుటుంబ సభ్యులకు కొన్నిరోజుల క్రితం జ్వరం వచ్చి తగ్గిపోయిందని, అనంతరం తాజాగా పరీక్ష చేయించుకోగా, వైరస్ సోకినట్లు నిర్ధరణ అయిందని చెప్పారు. ప్రస్తుతం అందరం బాగానే ఉన్నామని స్పష్టం చేశారు.
వైద్యుల సూచన మేరకు హోం క్వారంటైన్లో ఉండనున్నట్లు రాజమౌళి తెలిపారు. తమ శరీరంలో ఎటువంటి లక్షణాలు కనిపించట్లేదని పేర్కొన్నారు. యాంటీబాడీస్ పెరుగుదల కోసం ఎదురుచూస్తున్నానని తద్వారా ప్లాస్మా దానం చేయనున్నామని చెప్పారు.
ప్రస్తుతం ఈయన 'ఆర్ఆర్ఆర్' సినిమాకు దర్శకత్వం వహిస్తున్నారు. ఇందులో జూ.ఎన్టీఆర్, రామ్చరణ్ హీరోలుగా నటిస్తున్నారు. కరోనా కారణంగా షూటింగ్ నిలిచిపోయింది. అనుకున్నట్లు జరిగితే వచ్చే ఏడాది సంక్రాంతికి ప్రేక్షకులు ముందుకు రానుందీ చిత్రం.
