వాట్సాప్.. ఎంతో ప్రాచుర్యం పొందిన సామాజిక మాధ్యమం. క్షణాల్లోనే సమాచారాన్ని చేరవేసే యాప్లలో ముందు వరుసలో ఉంటుందీ యాప్. దీనిని చాలా మంది తమ వ్యక్తిగత వినియోగం కోసమే కాకుండా వ్యాపార, వాణిజ్య అవసరాలకు ఎక్కువగా వాడుతున్నారు. 100 కోట్లకు పైగా వినియోగదారులను కలిగి ఉంది వాట్సాప్. ప్రస్తుతం వాట్సాప్ అందిస్తున్న ఫీచర్స్ వాడకంతో మన స్నేహితులు, బంధువులకు మరింత దగ్గరవ్వచ్చు. దీంతో పాటు వాట్సాప్లో లేని మరి కొన్ని సౌకర్యాలు కూడా దీనికి జోడిస్తూ పలు యాప్లు వాట్సాప్ యూజర్లకు సేవలందిస్తున్నాయి. ఫలితంగా వాట్సాప్ వాడకాన్ని మరింతగా మెరుగుపరిచే ఆ టాప్ ఐదు యాప్లు ఏమిటంటే..
టాప్ 5 యాప్స్ ఇవే..!
1. వాట్సాప్ ఆటో రిప్లై
వాట్సాప్ ఆటో రిప్లై సౌకర్యం వినియోగదారులకు ఎంతగానో ఉపయోగపడుతుంది. కొత్తగా వచ్చే సందేశాలకు స్పందిస్తూ తరచూ టైప్ చేయకుండా.. ముందుగానే టైప్ చేసి పెట్టుకున్న మెసేజ్లను పంపవచ్చు. దీంతో అవతలి వ్యక్తికి ప్రస్తుతం మీరు బిజీగా ఉన్నారనే విషయం అర్థమవుతుంది. అంతేగాక అవతలి వ్యక్తి సమయం వృథా కాకుండా ఉంటుంది. కాకపోతే ఈ సేవలు కేవలం వాట్సాప్ బిజినెస్ యాప్లో మాత్రమే కనిపిస్తాయి.
2. వాట్సాప్ కాల్ బ్లాకర్
మాములుగా వాట్సాప్లో ఎవరినైనా బ్లాక్ చేయాలంటే బ్లాక్ ఆప్షన్ను వాడతాం. దీంతో అవతలి వ్యక్తిని బ్లాక్ చేశామన్న విషయం వారికి ఇట్టే తెలిసిపోతుంది. అయితే మనం ఇతరులని బ్లాక్ చేసిన తర్వాత వాళ్లు మనకు తరచూ మెసేజ్ లేదా వాయిస్, వీడియో కాల్స్ చేస్తుంటారు. కానీ వారిని బ్లాక్ చేయడం వల్ల అవి మనకు తెలిసే అవకాశం లేదు. దీనికి సరైన పరిష్కారం వాట్సాప్ కాల్ బ్లాకర్. ఈ సాఫ్ట్వేర్తో అవతలి వ్యక్తి మనతో ఎన్ని సార్లు మాట్లాడటానికి ప్రయత్నించాడో కాల్ లాగ్ ద్వారా తెలుసుకోవచ్చు. ఈ సౌలభ్యం వాట్సాప్ బిజినెస్ యాప్లో కూడా అందుబాటులో ఉంది.
3. స్టేటస్ సేవర్
వాట్సాప్లో మన స్నేహితులు పెట్టే పలు స్టేటస్లు మనకు భవిష్యత్లో ఉపయోగపడవచ్చు. కానీ ఎప్పుడు వాటి అవసరం పడుతుందో చెప్పలేము. మాములుగా మనకు ఏదైనా స్టేటస్ నచ్చితే స్క్రీన్షాట్ తీసి సేవ్ చేసుకుంటాం. తర్వాత ఆ ఫొటో లేదా వీడియో కోసం వెతుకుతూ మన సమయాన్ని వృథా చేసుకొంటాం. దీనికి చెక్ పెట్టేందుకే స్టేటస్ సేవర్ యాప్ అందుబాటులోకి వచ్చింది.
4. స్టికర్ మేకర్
ప్రస్తుతం ఈ స్టికర్ మేకర్ యాప్ను వాడడం ద్వారా చాలా మందిలో ఉన్న సృజనాత్మకత బయటపడుతోంది. ఎందుకంటే యూజర్ అభిరుచులకు అనుగుణంగా స్టికర్స్ను తయారు చేసుకోవచ్చు. ప్రత్యేకమైన రోజులు వస్తే దానికి తగ్గట్టు స్టికర్స్ను రూపొందించుకోవచ్చు. వీటికి వ్యంగ్యం, హాస్యం, కోపం, బాధ వంటి నవరసాలనూ జోడించవచ్చు. ఒక ఫొటోను స్టికర్ రూపంలోకి మార్చి అవి మరింత ఆకర్షణగా కనిపించేలా చేసుకునే సౌలభ్యం ఈ స్టికర్ మేకర్ యాప్ వినియోగదారులకు కల్పిస్తోంది.
5. డబ్ల్యు.ఏ.ఎమ్.ఆర్
సాధారణంగా కొందరు మనకు సందేశాలు పంపించి మనము చూడకముందే వాటిని డిలీట్ చేస్తూంటారు. డిలీట్ చేసిన మెసేజ్ ఏమై ఉంటుందనే తెలుసుకోవాలనే ఆత్రుత అందరికీ ఉంటుంది. కానీ మనము అడిగితే మన స్నేహితులు, బంధువులు చెప్పకపోవచ్చు. కానీ ఈ డబ్ల్యు.ఏ.ఎమ్.ఆర్(వాట్సాప్ మెసేజ్ రిట్రీవర్) సాఫ్ట్వేర్ మన ఫోన్లో ఇన్స్టాల్ చేసుకోవడం ద్వారా తొలగించిన సందేశాల్ని సులువుగా తెలుసుకోవచ్చు.
ఇవీ చదవండి: స్మార్ట్ వాచ్లోనే ఇయర్ బడ్స్.. కేస్తో పనిలేదిక.. ఏం ఐడియా గురూ!
ఫోన్లో యాప్లు సీక్రెట్గా ఉంచాలా? ఆండ్రాయిడ్లో ఇలా చేస్తే సరి!
