ఫ్రెండ్స్, ఫ్యామిలీతో టచ్లో ఉండటానికి బెస్ట్ ఆప్షన్ వాట్సాప్. కానీ, ఇందులోనూ కొన్ని ఇబ్బందులు ఉంటాయి. ఎప్పుడు ఆన్లైన్లోకి వచ్చామో చూడాలని కాచుకుకూర్చునే మాజీ ప్రియులు, రాత్రి ఎప్పటివరకు ఫోన్ వాడారోనని గమనించే కుటుంబ సభ్యులు, మనం ఏఏ డీపీలు మారుస్తున్నామో గమనించే స్టాకర్లు.. ఇలా వాట్సాప్ ద్వారా మన గురించి తెలుసుకునే వారు చాలా మందే ఉంటారు. వారితో దీని గురించి మాట్లాడలేం. ఇలా ఎందుకు చేస్తున్నారని మనం అడగలేం. కుటుంబ సభ్యులను బ్లాక్ చేయాలన్న ఆలోచనే ఎవరికీ ఉండదు. అలాంటప్పుడే వాట్సాప్ ప్రైవసీ ఫీచర్లపై మీరో లుక్కేయాలి. ఈ సమస్యలన్నింటికీ చెక్ పెట్టే ఆప్షన్లు వాట్సాప్లో బోలెడు ఉన్నాయి. వీటిని ఉపయోగించి మీరు ఎవరికీ తెలియకుండా వాట్సాప్ను ఉపయోగించుకోవచ్చు. ఈ ఫీచర్లతో వాట్సాప్ నుంచి మెజీషియన్లా మాయం కావచ్చు. మరి ఆ 'ఘోస్ట్' ఫీచర్లేంటో చూద్దామా?
లాస్ట్ సీన్, ఆన్లైన్ స్టేటస్ కనిపించకుండా చేయడం..
వాట్సాప్లో ముఖ్యమైన వ్యక్తులతో బిజీగా ఉండి కొందరి మెసేజ్లకు రిప్లై ఇవ్వలేకపోతే వారు నొచ్చుకునే అవకాశం ఉంది. అలాంటి పరిస్థితి రాకుండా ఉండాలంటే వాట్సాప్లో మనం ఆన్లైన్లోకి వచ్చామన్న విషయాన్ని తెలియనీయకుండా చేయాలి. అందుకు వాట్సాప్లో ప్రైవసీ ఫీచర్లు ఉన్నాయి. లాస్ట్ సీన్, ఆన్లైన్ స్టేటస్ కనిపించకుండా చేస్తే ఈ సమస్యకు పరిష్కారం లభించినట్లే. సెట్టింగ్స్లోని ప్రైవసీ ఆప్షన్కు వెళ్లి.. అందులోని 'లాస్ట్ సీన్'ను 'నోబడీ'కి సెట్ చేయాలి. అలాగే ఆన్లైన్ స్టేటస్ను సైతం 'సేమ్ యాస్ లాస్ట్ సీన్'గా మార్చాలి.
బ్లూ టిక్లు లేకుండా చేయడం..
వాట్సాప్లో మెసేజ్లను చూసిన తర్వాత బ్లూకలర్లో డబుల్ టిక్ మార్క్ పడుతుంది. అలా బ్లూ టిక్ పడనీయకుండా చేయాలంటే 'రీడ్ రిసీప్ట్స్'ను టర్న్ ఆఫ్ చేయాలి. ఇలా చేయడం ద్వారా మనం ఇతరుల మెసేజ్లు ఓపెన్ చేసినా.. వారికి బ్లూ టిక్ పడదు. సెట్టింగ్స్లోని ప్రైవసీ ఆప్షన్లో ఉండే రీడ్ రిసీప్ట్స్ ఆప్షన్ను స్విచ్ ఆఫ్ చేయాలి.
స్టేటస్ అప్డేట్లపై నియంత్రణ..
వాట్సాప్లో స్టేటస్ అప్డేట్లను సైతం నచ్చినవారితోనే పంచుకునే వీలుంది. కాంటాక్టుల్లోని కొందరికి స్టేటస్ హైడ్ చేసే ఆప్షన్ గతంలో ఉండగా.. కాంటాక్టుల్లోని కొందరికి తప్ప మిగిలినవారందరికీ పంపించేలా కొత్త అప్డేట్ తీసుకొచ్చింది వాట్సాప్. వీటిని ఉపయోగించుకొని స్టేటస్లను నచ్చిన వారికే కనిపించేలా చేసుకోవచ్చు. స్టేటస్ పెట్టే ముందు అదే స్క్రీన్పై ఆడియన్స్ ట్యాప్ ఉంటుంది. మనకు నచ్చినట్లు అక్కడే ఆప్షన్స్ మార్చుకోవచ్చు. సెట్టింగ్స్లోని ప్రైవసీ ట్యాబ్లో ఉన్న 'స్టేటస్' విభాగంలోనూ ఇందుకు సంబంధించిన ఆప్షన్స్ కనిపిస్తాయి.
ప్రొఫైల్ ఫొటో
వాట్సాప్లో పెట్టుకునే ప్రొఫైల్ ఫొటోను సైతం కనిపించకుండా చేసుకోవచ్చు. డీఫాల్ట్గా వాట్సాప్ డీపీ.. కాంటాక్టుల్లోని వ్యక్తులకు మాత్రమే కనిపిస్తుంది. దీన్ని ఎవరికీ కనిపించకుండా కూడా చేసుకోవచ్చు. సెట్టింగ్స్, ప్రైవసీ ఆప్షన్లోని ప్రొఫైల్ ఫొటోపై క్లిక్ చేసి 'నోబడీ'ని ఎంచుకుంటే సరిపోతుంది.
ఎబౌట్ సెక్షన్ను హైడ్ చేయడం
వాట్సాప్లో పై ఫీచర్లన్నింటినీ ఉపయోగించిన తర్వాత కూడా మరింత గోప్యత కావాలంటే.. ఎబౌట్ను సైతం హైడ్ చేసేయండి. ఎబౌట్ సైతం కనిపించకపోతే అసలు మీరు వాట్సాప్లో ఉన్నారో, లేరో అనే భ్రమ కూడా కలుగుతుంది. సెట్టింగ్స్, ప్రైవసీలోని ఎబౌట్ ఆప్షన్లోకి వెళ్లి హైడ్ చేసుకోవచ్చు.
