దేశంలో సగటున ప్రతి ముగ్గురిలో ఒకరు గంటకు పైగా ఆన్లైన్ వీడియోలను వీక్షిస్తున్నారని గూగుల్ ఓ నివేదికలో వెల్లడించింది. ఇందులో హిందీ భాషలో అధికంగా 54 శాతం మంది వీక్షించగా.. ఇంగ్లీష్లో 16 శాతం మంది చూశారు. తెలుగు(7 శాతం) మూడో స్థానంలో నిలవగా.. కన్నడ(6 శాతం), తమిళం(5 శాతం), బెంగాలీ(3 శాతం) తర్వాతి స్థానాల్లో ఉన్నాయి.
ఈ ఏడాది దేశంలో ఆన్లైన్ వీడియోలను వీక్షించేవారి సంఖ్య సుమారు 50 కోట్ల మందికి చేరనుందని సర్వేలో వెల్లడించింది గూగుల్. అయితే వీరిలో గ్రామీణ ప్రాంతాల వారు 37 శాతం ఉన్నారని సర్వే పేర్కొంది.
- దేశంలో సగటున రోజుకు 67 నిమిషాల పాటు ఆన్లైన్ వీడియోలకు సమయాన్ని కేటాయిస్తున్నారు వీక్షకులు. కొత్తగా ఇంటర్నెట్ సేవలను వినియోగించే వారు కూడా సగటున 56 నిమిషాల సమయాన్ని వెచ్చిస్తున్నారు.
- ఇంటి నుంచి 79 శాతం మంది వీడియోలను వీక్షిస్తుండగా.. ప్రయాణాలు, ఇతర పనుల్లో ఉంటూనే 21 శాతం మంది చూస్తున్నారు.
'అండర్స్టాండింగ్ ఇండియాస్ ఆన్లైన్ వీడియో వీవర్(భారత్లో ఆన్లైన్ వీడియోలను వీక్షించే వారి సంఖ్య)' పేరిట 6,500 మందిపై సర్వే చేపట్టింది గూగుల్. ఇందులో 15 నుంచి 34 ఏళ్ల మధ్య వయసు కలిగిన వారు 73 శాతం మంది ఉన్నారు.
ఆన్లైన్ ద్వారా వీడియోలను వీక్షించడంలో '4పీ'లు ప్రేరణగా నిలుస్తున్నాయి.
- ప్లెజర్(వినోదం) - 56 శాతం
- పవర్(శక్తి) - 20 శాతం
- పర్పస్(అవసరం) - 14 శాతం
- పీపుల్(ప్రజలు) - 11 శాతం
అయితే 43 శాతం మంది నేర్చుకోవడం కోసమే ఆన్లైన్లో వీడియోలను వీక్షిస్తున్నారని సర్వేలో పేర్కొంది గూగుల్.
ఇదీ చదవండి: 'బ్యాంకుల్లో నిరర్ధక ఆస్తులు భారీగా పెరిగిపోతాయి'
