అసోం-మిజోరాం సరిహద్దు వివాదం పరిష్కారమయ్యే సూచనలు కనిపిస్తున్నాయి. ఈ మేరకు మిజోరం సీఎం జోరామ్ తంగా, ఆసోం ముఖ్యమంత్రి హిమంత బిశ్వ శర్మతో ఆదివారం ఫోన్లో మాట్లాడారు కేంద్ర హోంమంత్రి అమిత్ షా . వివాదాన్ని చర్చల ద్వారా పరిష్కరించుకోవాలని సూచించారు.
ఫోన్ సంభాషణ అనంతరమే సమస్యను సామరస్యంగా పరిష్కరించుకుంటామని తెలిపారు జోరామ్ తంగా. ఈ సమయంలో పరిస్థితులు చేయిదాటకుండా ప్రజలు సంయమనం పాటించాలని కోరారు. సామాజిక మాధ్యమాల్లో ఎలాంటి వివాదాస్పద పోస్టులు పెట్టొద్దని మిజోరం ప్రజలకు విజ్ఞప్తి చేశారు.
సీఎంపై ఎఫ్ఐఆర్ ఉపసంహరణ..
అసోం సీఎం హిమంత బిశ్వ శర్మపై దాఖలు చేసిన ఎఫ్ఐఆర్ను ఉపసంహరించుకునేందుకు సిద్ధంగా ఉన్నట్లు మిజోరం ప్రభుత్వం అదివారం తెలిపింది. నిజానికి ఎఫ్ఐఆర్లో హిమంత పేరును ప్రస్తావించేందుకు మిజోరం ముఖ్యమంత్రి జోరామ్ తంగా ఆమోదించలేదని ప్రభుత్వ ప్రధాన కార్యదర్శి లాల్నున్మావియా చువాంగో వెల్లడించారు. దానిపై పరిశీలించాలని సీఎం సూచించినట్లు చెప్పారు. హిమంతకు వ్యతిరేతికంగా తగిన ఆధారాలు లేకపోతే పోలీసులతో చర్చించి, ఆయన పేరును ఎఫ్ఐఆర్ నుంచి తొలగిస్తామని సీఎస్ తెలిపారు.
ఎందుకు ఎఫ్ఐఆర్?
అసోం-మిజోరం సరిహద్దుల్లో జులై 26న జరిగిన ఘర్షణల్లో ఐదుగురు అసోం పోలీసులు మరణించారు. దీంతో ఇరు రాష్ట్రాల మధ్య ఉద్రిక్త వాతావరణం కొనసాగుతోంది. ఈ నేపథ్యంలోనే అసోం సీఎం హిమంత, ఆరుగురు అధికారులు సహా మరో 200 మంది వ్యక్తులపై మిజోరం పోలీసులు క్రిమినల్‌ కేసులు నమోదు చేశారు.
అయితే సీఎంతో పాటు ఎఫ్ఐఆర్లో ప్రస్తావించిన వారి పేర్ల తొలగింపుపై మిజోరం సీఎస్ చువాంగో స్పష్టతనివ్వలేదు.
తటస్థ సంస్థకు అప్పగించాలి..
మిజోరంలో తనపై కేసు నమోదైనట్లు వచ్చిన వార్తలపై బిశ్వ శర్మ స్పందించారు. ఎలాంటి విచారణకైనా సిద్ధమని శనివారం ప్రకటించారు.
"నాపై ఎఫ్ఐర్ఆర్ నమోదు చేస్తే సమస్య పరిష్కారం అవుతుందంటే సంతోషమే. ఏ పోలీసు స్టేషన్లో అయినా విచారణకు నేను సిద్ధమే. కానీ మా అధికారులను దర్యాప్తు చేయడానికి అంగీకరించను. సరిహద్దు వివాద పరిష్కారానికి మేము సుప్రీంకోర్టుకు వెళ్తాం."
-హిమంత బిశ్వ శర్మ, అసోం సీఎం
అదే సమయంలో రాజ్యాంగపరంగా అసోం భూభాగంలో జరిగిన ఘర్షణపై విచారణను తటస్థ సంస్థకు ఎందుకు అప్పజెప్పడం లేదని ట్విట్టర్‌ వేదికగా హిమంత ప్రశ్నించారు.
ఉద్రిక్తంగానే సరిహద్దులు..
అస్సాం-మిజోరం సరిహద్దులో ఇటీవల ఘర్షణలు చోటుచేసుకున్న ప్రాంతం శనివారం నివురుగప్పిన నిప్పులా కనిపించింది. ఎప్పుడు ఏం జరుగుతుందోనన్న ఆందోళనలు స్థానికుల నుంచి వ్యక్తమవుతున్నాయి.
రాష్ట్రంలోకి వాహనాలు రావడం లేదు: మిజోరం
జులై 26 నుంచి అసోం నుంచి ఒక్క ట్రక్కు కూడా రాష్ట్రంలోకి రాలేదని మిజోరం అధికారులు పునరుద్ఘాటించారు. మిజోరం జీవనాడి అయిన 306వ నంబరు జాతీయ రహదారిపై అస్సాంలోని వివిధ ప్రాంతాల్లో దిగ్బంధాలు కొనసాగుతున్నాయని పునరుద్ఘాటించారు. అసోం మాత్రం ఈ ఆరోపణలను ఖండించింది.
ఇదీ చూడండి: అసోం-నాగాలాండ్ మధ్య ఫలించిన శాంతి చర్చలు
