మెట్రో నగరాల్లో ట్రాఫిక్ కష్టాలు అన్ని ఇన్నీ కావు. బెంగళూరు లాంటి నగరాల్లో అయితే పరిస్థితి మరీ ఆధ్వానం. 10 కిలోమీటర్లు దూరం ప్రయాణించడానికి ఒక్కోసారి గంటకుపైగా పడుతుంది. ఇలాంటి సమస్యలకు చెక్ పెట్టేలా కొత్త టెక్నాలజీని తీసుకువస్తున్నారు తమిళనాడులోని ఐఐటీ మద్రాస్ విద్యార్థులు. నగరంలో ఎక్కడికైనా గాలిలో ప్రయాణించేలా 'ఈ-ప్లేన్'ను తయారు చేస్తున్నారు. ప్రస్తుతం తయారీ దశలో ఉన్న 'ఈ-ప్లేన్'ను 2024 చివరకు లేదా 2025 ఏడాది ప్రారంభానికి ప్రయాణికులకు అందుబాటులోకి తీసుకురానున్నారు. 'ఈ-ప్లేన్'లో ఐదుగురు కూర్చుని ప్రయాణించేలా రూపొందిస్తున్నామని చెబుతున్నారు ఐఐటీ మద్రాస్ ఎరోనాటికల్ ఇంజినీరింగ్ ప్రొఫెసర్ సత్యన్ చక్రవర్తి.
"సాధారణంగా మనం మొబైల్ యాప్ ద్వారా టాక్సీని బుక్ చేయగానే.. కారు వచ్చి మనల్ని ఎక్కించుకుని తీసుకువెళ్లి మన గమ్యస్థానంలో దించుతుంది. అచ్చం అలానే యాప్ ద్వారా 'ఈ-ప్లేన్' ట్యాక్సీకి కాల్ చేస్తే.. విమానం వచ్చి మనల్ని ఆకాశమార్గంలో తీసుకువెళ్తుంది. ఇది మైదాన ప్రాంతంతో పాటు మన ఇంటి పైభాగంలో కూడా ల్యాండ్ అవుతుంది. 'ఈ-ప్లేన్' వల్ల గంటకు పైగా పట్టే దూరాన్ని 5-10 నిమిషాల వ్యవధిలోనే చేరుకోవచ్చు. ఇందులో ప్రయాణించడానికి సాధారణ ట్యాక్సీకి వెచ్చించే ఖర్చు కన్నా సుమారు 2-3 రెట్లు అధికంగా చెల్లించాల్సి వస్తోంది."
--సత్యన్ చక్రవర్తి, ఐఐటీ మద్రాస్ ప్రొఫెసర్
ప్రస్తుతానికి 'ఈ-ప్లేన్'కు ఇంజిన్, సీట్లను రూపొందించే పనిలో ఉంది మద్రాస్ ఐఐటీ పరిశోధకుల బృందం. వచ్చే ఆరు నెలల్లోనే దీనిని పరీక్షిస్తారు. అనేక దశల పరీక్షల అనంతరం ప్రభుత్వం నుంచి సేఫ్టీ సర్టిఫికెట్ వచ్చిన తర్వాతే ప్రజలకు అందుబాటులోకి తీసుకువస్తారు. ఈ ప్రక్రియంతా పూర్తి కావడానికి సుమారు సంవత్సరం పైగా పడుతుందని అంచనా.
'ఈ-ప్లేన్'తో పాటుగా సరకు రవాణా కోసం మరో విమానాన్ని 2023లోనే అందుబాటులోకి తీసుకువచ్చే ప్రణాళికల్లో ఉన్నారు మద్రాస్ ఐఐటీ పరిశోధకులు. తైయూర్ ప్రాంగణంలో దీని నిర్మాణ పనులు జరుగుతున్నాయి. ఈ విమానాలు బ్యాటరీలను ఒకసారి ఛార్జ్ చేస్తే సుమారు 100 కిలోమీటర్ల వరకు ప్రయాణించవచ్చు. ఫుల్ ఛార్జింగ్ కావడానికి కేవలం 15 నిమిషాలే పడుతుంది.
ఇవీ చదవండి : ఫుల్ జోష్తో ఏనుగు బర్త్డే పార్టీ.. వారికి స్వీట్స్ పంచిపెట్టిన ఆండాళ్
