స్పామ్ కాల్స్తో విసిగిపోతున్నారా? పదే పదే అనవసరమైన మెసేజ్లతో చిరాకు పడుతున్నారా? అయితే మీ సమస్యకు పరిష్కారం దొరికింది. వాటి నుంచి వినియోగదారులకు రక్షణ కల్పించేందుకు టెలికాం రెగ్యులేటరీ అథారిటీ ఆఫ్ ఇండియా (ట్రాయ్) కీలక నిర్ణయం తీసుకుంది. అందుకోసం కొత్త నిబంధలను తీసుకువచ్చింది. మే 1నే వీటిని అమల్లోకి తెచ్చింది. అనవసరమైన కాల్స్ను అరికట్టేందుకు ఏఐ స్పామ్ ఫిల్టర్స్ను ప్రవేశపెట్టాలని టెలికాం ఆపరేటర్లకు.. ట్రాయ్ కీలక ఆదేశాలు జారీ చేసింది.
కొత్త నిబంధనల ప్రకారం.. అన్ని టెలికాం కంపెనీలు తమ కాల్, ఎస్ఎమ్ఎస్ సేవల్లో ఏఐ స్పామ్ ఫిల్టర్‌లను ఉపయోగించాల్సి ఉంటుంది. ట్రాయ్ విడుదల చేసిన ఈ కొత్త నిబంధనలను దేశంలోని ఎయిర్టెల్, జియో, వొడాఫోన్ ఐడియా, బీఎస్ఎన్ఎల్ వంటి సంస్థలు కచ్చితంగా పాటించాల్సి ఉంటుంది. ఈ టెలికాం సంస్థలు ప్రవేశపెట్టే ఏఐ స్పామ్ ఫిల్టర్స్.. ఫేక్ కాల్స్ను, మెసేజ్లను గుర్తిస్తాయి. ప్రమోషనల్ కాల్స్, మెసేజ్లను కూడా పసిగడతాయి. అనంతరం వాటిని బ్లాక్ చేస్తాయి. వినియోగదారులను వేధింపుల నుంచి, మోసపూరిత కాల్స్ను నుంచి రక్షణ కల్పించడమే ఈ ఏఐ ఫిల్టర్ల ప్రధాన కర్తవ్యం.
ట్రాయ్ తెచ్చిన ఈ కొత్త నిబంధనలను దిగ్గజ టెలికాం సంస్థలైన ఏయిర్టెల్, జియో అంగీకరించాయి. ఇదే విషయంపై ఎయిర్టెల్ అధికారికంగా ప్రకటన చేసింది. జియో త్వరలోనే తన సేవలను ప్రారంభించే అవకాశం ఉంది. ట్రాయ్ సూచనల మేరకు.. మరో ఫీచర్ కూడా తీసుకురావాల్సి ఉంటుంది. కాలర్ ఐడీ ఫీచర్ ద్వారా వినియోగదారుల మొబైల్ స్క్రీన్పై.. కాలర్ ఫోటో, పేరు కనిపిస్తాయి. ప్రైవసీ కారణాల రీత్యా టెలికాం సంస్థలు ఈ కాలర్ ఐడీ ఫీచర్కు ఒప్పుకోకపోవచ్చు. దీనిపై ఇంకా స్పష్టమైన సమాచారం రావాల్సి ఉంది. అయితే.. ఏఐ స్పామ్ ఫిల్టర్స్ నిర్ణయం మాత్రం మే 1నే అమలులోకి వచ్చింది.
మీ మొబైల్లో శాశ్వతంగా స్పామ్ కాల్స్ను బ్లాక్ చేసే.. డు నాట్ డిస్టర్బ్ సర్వీస్ యాక్టివేట్ చేయాలంటే ఇలా చేయండి..
- మీ మొబైల్ ఎస్ఎమ్ఎస్ యాప్ ఓపెన్ చేసి START అని టైప్ చేయండి
- దాన్ని 1909 నంబర్కు మెసేజ్ చేయండి.
- కొన్ని కోడ్ కలిగిన కేటగిరీలతో మీకు ఒక్క లిస్ట్ వస్తుంది. ఈ కేటగిరీలలో బ్యాంకింగ్, హాస్పిటాలిటీ, రియల్ ఎస్టేట్, విద్య, ఆరోగ్యం మొదలైనవి ఉంటాయి.
- ఏ కేటగిరీని బ్లాక్ చేయాలని అనుకుంటున్నారో.. ఆ కోడ్ ఎంటర్ చేసి రిప్లై ఇవ్వండి.
- అనంతరం మీ సర్వీస్ ప్రొవైడర్ నుంచి ఓ ధృవీకరణ మెసేజ్ వస్తుంది. 24 గంటల లోపు డు నాట్ డిస్టర్బ్ సర్వీస్ యాక్టివేట్ అవుతుంది.
