'పుతిన్​తో పెట్టుకున్నావ్.. కిటికీల దగ్గర జాగ్రత్త'.. ప్రిగోజిన్‌కు CIA హెచ్చరిక

రష్యా అధ్యక్షుడు పుతిన్‌పై తిరుగుబాటు చేసిన వాగ్నర్‌ గ్రూప్‌ అధినేత యెవ్గెనీ ప్రిగోజిన్‌కు ప్రాణహాని పొంచి ఉందని.. అమెరికా నిఘావర్గాలు హెచ్చరించాయి. ఆవేశంతో సాయుధ తిరుగుబాటుకు పిలుపునిచ్చి.. వెనక్కి తగ్గిన ప్రిగోజిన్‌ ప్రస్తుతానికి మాత్రమే ప్రాణాలు కాపాడుకున్నట్లు వెల్లడించాయి. అతడిని బెలారస్‌లోనే కిటికీల నుంచి కిందపడేసి మట్టుబెట్టే అవకాశాలున్నాయని విశ్లేషణలు ఊపందుకున్నాయి. అటు ప్రిగోజిన్‌ బెలారస్‌కు స్వేచ్ఛగా వెళ్లిపోలేదనీ.. ఆయనను రష్యా విచారిస్తోందని ఆ దేశ మీడియా కోడై కూస్తోంది.

Wagner Group Chief Yevgeny Prigozhin : రష్యాధీశుడు పుతిన్‌కు వ్యతిరేకంగా తిరుగుబావుటా ఎగరవేసిన కిరాయి సైనిక ముఠా వాగ్నర్‌ గ్రూప్‌ అధిపతి ప్రిగోజిన్‌ ప్రాణాలు కోల్పోయే ప్రమాదం ఉందని అమెరికా నిఘా సంస్థ CIA హెచ్చరించింది. ముఖ్యంగా తెరిచిన కిటికీల వద్ద ప్రిగోజిన్‌ చాలా జాగ్రత్తగా ఉండాలని CIA చీఫ్‌ డేవిడ్‌ పేట్రాయస్‌ పేర్కొన్నారు. పుతిన్‌ విరోధులు చాలా మంది ఇలా కిటికీల నుంచి కిందపడి చనిపోయారని పేట్రాయిస్‌ గుర్తు చేశారు. ఆవేశంలో రష్యా సైన్యానికి వ్యతిరేకంగా తిరుగుబాటు చేసిన ప్రిగోజిన్‌.. వెనక్కి తగ్గి ప్రస్తుతానికి మాత్రమే ప్రాణాలు రక్షించుకున్నాడని తెలిపారు. వాగ్నర్‌ దళాల నుంచి ఆయనను వేరు చేసి బెలారస్‌కు పంపారని పేర్కొన్నారు. వాగ్నర్‌ సైన్యాన్ని ప్రిగోజిన్‌ పోగొట్టుకున్నట్లు వివరించారు.

Wagner Group Revolution In Russia : ఉక్రెయిన్‌ యుద్ధం మొదలైన తర్వాత 19 మంది రష్యా ఒలిగార్క్‌లు అనుమానాస్పద స్థితిలో మరణించారు. అందులో పుతిన్ విమర్శకులే అనేకులు. క్రెమ్లిన్‌కు ఎదురు నిలిచిన వారు కిటికీల నుంచి కిందపడి చనిపోయిన ఘటన సోవియట్‌, రష్యా చరిత్ర కోకొల్లలు. రష్యా MP పావెల్‌ అంటోవ్‌ భారత్‌లో ఓ హోటల్‌ మూడో అంతస్తు కిటికీ నుంచి కిందపడి మరణించారు. 2 రోజుల్లోనే మరో రష్యన్‌ భారత్‌లోనే మృతిచెందాడు.

మరోవైపు ప్రిగోజిన్‌పై క్రిమినల్‌ కేసు పెట్టినట్లు రష్యా భద్రతాసేవల విభాగం(FSS) తెలిపింది. తిరుగుబాటును విరమించుకుంటే ఆయనపై ఉన్న క్రిమినల్‌ కేసు ఎత్తివేత సహా భద్రతకు హామీ ఇచ్చిన రష్యా.. ఇప్పుడు తిరిగి ఆయనపై కేసు పెట్టడం అనుమానాలకు తావిస్తోంది. నేరతీవ్రత, ఘర్షణలు జరిగే ప్రమాదం ఉన్న నేపథ్యంలో ఈ నిర్ణయం తీసుకున్నట్లు రష్యా మీడియా తెలిపింది. క్రిమినల్‌ కేసు ఎత్తివేస్తారన్న హామీ మేరకు బెలారస్‌ వెళ్లినట్లు భావిస్తున్న ప్రిగోజిన్‌ ఇప్పటి వరకు ఎక్కడున్నారో అనేది తెలియరాలేదు. ఆయనను రష్యా ఇప్పటికే విచారిస్తోందని ఆదేశ మీడియా వెల్లడి చేసింది. అటు బెలారస్‌ అధ్యక్షుడు లుకషెంకో పుతిన్‌ సన్నిహితుడు కావడం మరింత అనుమానాలకు తావిస్తోంది. ప్రిగోజిన్​ను బెలారస్‌లోనే చంపుతారన్న వాదనలు గట్టిగా వినిపిస్తున్నాయి.

పుతిన్ ఆధిపత్యానికి తెర!
ప్రపంచంలో అత్యంత శక్తిమంతమైన దేశాల్లో రష్యా ఒకటి. శక్తిమంతమైన దేశాధినేతల్లో ఆ దేశ అధ్యక్షుడు వ్లాదిమిర్ పుతిన్‌ ఒకరు. అలాంటి పుతిన్‌ ఆధిపత్యానికి తెరపడినట్లే అన్న ఊహాగానాలు వినిపిస్తున్నాయి. ఉక్రెయిన్‌ యుద్ధం కొలిక్కిరాకపోవడం, వాగ్నర్‌ గ్రూప్‌ తిరుగుబాటు, ఆ తర్వాతి పరిణామాలను చూస్తే రష్యా అధినాయకత్వంలో బలహీనతలు కనిపిస్తున్నాయని విశ్లేషకులు చెబుతున్నారు. తిరుగుబాటు చేసిన ప్రిగోజిన్‌పై ఎలాంటి చర్యలను పుతిన్‌ తీసుకోలేకపోవడమూ ఆయన బలహీన పడ్డారన్న వాదనలకు బలం చేకూరుస్తోంది. పూర్తి కథనం కోసం ఇక్కడ క్లిక్ చేయండి.

ఇవీ చదవండి : రష్యాలో వెనక్కి తగ్గిన 'వాగ్నర్​' సేన​.. 'బెలారస్' అధ్యక్షుడి​ రాయబారంతో!