'రష్యన్​ గబ్బిలాల్లో కొత్త వైరస్.. వ్యాక్సిన్లు పని చేయవ్!'

రష్యాలోని గబ్బిలాల్లో కనుగొన్న వైరస్ గురించి ఆందోళనకర విషయాలు చెప్పారు పరిశోధకులు. కొత్త వైరస్.. కరోనా​లా మనుషులకు వ్యాపిస్తుందని తేల్చారు. కానీ.. ప్రస్తుతం కొవిడ్​ను ఎదుర్కొనేందుకు ఉన్న టీకాలేవీ దానిపై పనిచేయవని నిర్ధరించారు.

రష్యాలోని గబ్బిలాల్లో గుర్తించిన 'ఖోస్టా-2' అనే కొత్త రకం వైరస్​.. కరోనా తరహాలో మనుషులకు సోకగలదని పరిశోధనల్లో తేలింది. సార్స్​-కొవ్​-2కు ప్రస్తుతం అందుబాటులో ఉన్న టీకాలేవీ ఖోస్టా-2 వైరస్​ను ఎదుర్కొనేందుకు పనిచేయవని నిర్ధరణ అయింది. యాంటీబాడీ థెరపీలు, బ్లడ్ సీరం చికిత్సలతోనూ ఉపయోగం ఉండదని తెలిసింది. అమెరికాలోని వాషింగ్టన్ స్టేట్ యూనివర్సిటీ పరిశోధకుల బృందం ఈ విషయాన్ని వెల్లడించింది. కరోనా వైరస్​లోని సార్బేకొవైరసెస్ అనే ఉపజాతికి చెందిన సార్స్​-కొవ్​-2, ఖోస్టా-2.. ఒకే రకమైన స్పైక్ ప్రొటీన్​ను ఆసరాగా చేసుకుని మానవ కణాలకు వ్యాపిస్తాయని వివరించింది.

ఖోస్టా-2 వైరస్​పై అధ్యయనం.. 'PLoS Pathogens' అనే జర్నల్​లో ప్రచురితమైంది. దాని ప్రకారం.. ఖోస్టా-1, ఖోస్టా-2 వైరస్​లను రష్యాలోని గబ్బిలాల్లో 2020లోనే కనుగొన్నారు. అయితే.. ఆ వైరస్​లతో మనుషులకు ఎలాంటి ముప్పు ఉండదని తొలుత భావించారు. కానీ.. అది తప్పని ఇటీవల నిర్ధరణ అయింది. ఖోస్టా-1తో పెద్దగా ముప్పు లేకపోయినా.. ఖోస్టా-2 మనుషులకు వ్యాపిస్తుందని తేలిందని వివరించారు పరిశోధకుల బృందంలో ఒకరైన మైకేల్ లెట్కో.

ప్రస్తుతం అందుబాటులో ఉన్న కరోనా టీకాలు.. ఖోస్టా-2 వైరస్​ను ఎదుర్కోగలవా అనే కోణంలో పరిశోధకులు అధ్యయనం చేశారు. కొవిడ్ టీకా తీసుకున్న వారి శరీరంలో నుంచి బ్లడ్ సీరం సేకరించి పరీక్షలు జరిపారు. అయితే.. ఖోస్టా-2 వైరస్​ను ప్రస్తుతమున్న టీకాలు నిర్వీర్యం చేయలేకపోతున్నాయని వారు గుర్తించారు. ఒమిక్రాన్​ వేరియంట్​ సోకిన వారిలోని యాంటీబాడీలు కూడా ప్రభావం చూపలేకపోయాయని నిర్ధరించారు. కొన్ని జన్యువులు ఖోస్టా-2 వైరస్​లో లేకపోవడమే ఇందుకు కారణమై ఉండొచ్చని చెప్పారు మైకేల్ లెట్కో. సార్స్​-కొవ్​-2తో ఖోస్టా-2 వైరస్​ కలిస్తే.. మరింత ముప్పు ఉండొచ్చని హెచ్చరించారు.