కరోనా బారిన పడిన ప్రపంచ నేతలు వీరే..

ప్రపంచవ్యాప్తంగా కరోనా మహమ్మారి బారిన పడుతున్న కీలక నేతల సంఖ్య రోజురోజుకు పెరుగుతోంది. తాజాగా.. వైరస్​ సోకిన ప్రపంచ నేతల జాబితాలో చేరారు అమెరికా అధ్యక్షుడు డొనాల్డ్​ ట్రంప్​. ఇప్పటికే ఈ జాబితాలో పలు దేశాల అధ్యక్షులు, ప్రధానులు, మంత్రులు ఉన్నారు. వారి వివరాలు తెలుసుకుందాం.

కరోనా మహమ్మారి వల్ల ప్రపంచ దేశాలు విలవిలలాడుతున్నాయి. సాధారణ పౌరుల నుంచి దేశాధినేతల వరకు ఈ వైరస్​ ఎవరిని విడిచిపెట్టడం లేదు. తాజాగా అగ్రరాజ్య అధ్యక్షుడు డొనాల్డ్​ ట్రంప్​, ఆయన సతీమణికి వైరస్​ సోకింది. ఈ నేపథ్యంలో ప్రపంచవ్యాప్తంగా కరోనా మహమ్మారి బారిన పడుతున్న కీలక నేతల సంఖ్య రోజురోజుకు పెరుగుతోంది. మరి ఇప్పటివరకు ఎంత మందికి కరోనా పాజిటివ్​గా తేలింది?

బ్రిటన్​ ప్రధాని బోరిస్​ జాన్సన్​

కరోనా మహమ్మారి విజృంభిస్తున్న తొలినాళ్లలోనే వైరస్​ బారిన పడ్డారు బ్రిటన్​ ప్రధానమంత్రి బోరిస్​ జాన్సన్​. మార్చి 27న కరోనా పాజిటివ్​గా తేలిన క్రమంలో హోం క్వారంటైన్​కు వెళ్లారు. ఆరోగ్యం క్షిణించగా ఏప్రిల్​ 6న ఆసుపత్రిలో చేరారు. మూడు రోజుల పాటు ఐసీయూలో చికిత్స పొందారు. అనంతరం వారం రోజుల్లోనే కోలుకుని డిశ్చార్జి అయ్యారు.

బ్రిటన్​ ఆరోగ్యా శాఖ మంత్రి..

బోరిస్​ జాన్సన్​కు వైరస్​ పాజిటివ్​గా తేలిన రెండు గంటల్లోనే తానూ కరోనా బారిన పడినట్లు ప్రకటించారు బ్రిటన్​ ఆరోగ్యశాఖ మంత్రి మాట్​ హాన్కాక్​. వైద్యుల సూచనల మేరకు హోం క్వారంటైన్​కు వెళ్లినట్లు తెలిపారు.

యూకే ప్రిన్స్​ చార్లెస్​..

యునైటెడ్​ కింగ్​డమ్​ రాజు చార్లెస్​కు మార్చి 25న కరోనా పాజిటివ్​గా తేలింది. హోం ఐసోలేషన్​కు వెళ్లిన ఆయన ఐదు రోజుల్లోనే వైరస్​ నుంచి కోలుకుని మార్చి 30న బయటకు వచ్చారు. వైరస్​ నుంచి బయటపడ్డప్పటికి భౌతిక దూరం వంటి నియమాలు పాటిస్తున్నట్లు వెల్లడించారు.

బ్రెజిల్​ అధ్యక్షుడు..

బ్రెజిల్​ అధ్యక్షుడు జైర్​ బొల్సొనారొకు జులై 7న కరోనా వైరస్​ సోకింది. అంతకు ముందు కొవిడ్​-19ను చిన్న ఫ్లూగా పేర్కొన్నారు బొల్సొనారొ.

రష్యా ప్రధానమంత్రి..

రష్యా ప్రధానమంత్రి మిఖాయిల్​ మిషుస్టిన్​కు ఏప్రిల్​ 30న పాజిటివ్​గా తేలింది. అనంతరం ఆయన విధులను ఉపప్రధాని ఆండ్రూ బెలుసోవ్​ నిర్వర్తించారు. అయితే.. కీలక సమావేశాలకు హాజరయ్యేవారు ప్రధాని.

రష్యా మంత్రి..

రష్యా నిర్మాణ, గృహ, యుటిలిటీస్​ శాఖ మంత్రి వ్లాదిమిర్​ యాకుషేవ్​, ఆయన డిప్యూటీ దిమిత్రి వోల్కోవ్​కు కొవిడ్​-19 సోకింది.

ఇరాన్​లో.

ఇరాన్​ ఉపాధ్యక్షురాలు, అధ్యక్షుడు హస్సాన్​ రోహిణి మహిళా వ్యవహారాల డిప్యూటీ అయిన మసౌమెహ్​ ఎబ్టెకర్​కు​ ఫిబ్రవరి 27న కరోనా పాజిటివ్​గా తేలింది. అనంతరం ఆమె క్వారంటైన్​లోకి వెళ్లారు.

ఆరోగ్య శాఖ సహాయ మంత్రి ఇరాజ్​ హరిర్చి ఫిబ్రవరి 25న కరోనా బారినపడ్డారు. ఈ మేరకు ఆ దేశ మీడియా నివేదించింది.

ఫ్రెంచ్​ సంస్కృతి శాఖ మంత్రి..

ఫ్రెంచ్​ సంస్కృతిక శాఖ మంత్రి ఫ్రాంక్​ రీస్టెర్​.. మార్చి 9న వైరస్​ బారినపడ్డారు. అయితే ఆయనలో లక్షణాలు కనిపించలేదని మంత్రిత్వ శాఖ వర్గాలు వెల్లడించాయి.

ఆస్ట్రేలియా హోంమంత్రి..

ఆస్ట్రేలియా హోంశాఖ మంత్రి పీటర్​ డట్టోన్​కు మార్చి 13న కరోనా పాజిటివ్​గా తేలింది. ఈ విషయాన్ని ఆయనే వెల్లడించారు. క్వీన్​లాండ్​లోని ఓ ఆసుపత్రిలో చేరినట్లు చెప్పారు.

స్పెయిన్ ప్రధాని..

స్పెయిన్​ ప్రధానమంత్రి కార్మెన్​ కాల్వోకు మార్చి 25న కరోనా పాజిటివ్​గా తేలింది. మొదటిసారి నిర్వహించిన పరీక్షలో సరైన ఫలితాలు రాకపోవటం వల్ల రెండోసారి పరీక్షించగా వైరస్​ సోకినట్టు నిర్ధరణ అయ్యింది. దాంతో కొద్ది రోజులు చికిత్స తీసుకుని వైరస్​ నుంచి కోలుకున్నారు.

ఇజ్రాయెల్​ ఆరోగ్య శాఖ మంత్రి..

ఇజ్రాయెల్​ ఆరోగ్య శాఖ మంత్రి యాకోవ్​ లిట్జ్​మెన్​కు ఏప్రిల్​లో కరోనా సోకినట్లు తేలింది. ఆయన భార్యకు కూడా వైరస్​ సోకింది. వారు ఐసోలేషన్​లోకి వెళ్లారు.

హండురస్​ అధ్యక్షుడు..

హండురస్​ అధ్యక్షుడు జాన్​ ఓర్లాండో హెర్నాండెజ్​ తనకు కరోనా పాజిటివ్​గా తేలిన క్రమంలో న్యుమోనియా చికిత్స కోసం ఆసుపత్రిలో చేరారు.

బొలీవియా అధ్యక్షుడు..

బొలీవియా అధ్యక్షుడు జీనైన్​ అనెజ్ తనకు​ కరోనా పాజిటివ్​గా తేలినట్లు వెల్లడించారు. అయితే.. తాను ఆరోగ్యంగా ఉన్నానని, ఐసోలేషన్​ నుంచే పని చేస్తానని తెలిపారు.

ఈయూ చీఫ్​..

యురోపియన్​ యూనియన్​ చీఫ్​ మైకెల్​ బార్నేయిర్​కు మార్చి 19న కొవిడ్​-19 సోకింది. ఈ మేరకు తాను అన్ని రకాల నియమాలు పాటిస్తూ త్వరలోనే వైరస్​ నుంచి కోలుకుంటానని ట్వీట్​ చేశారు.

గ్వాటెమాలన్​ అధ్యక్షుడు..

గ్వాటెమాలన్​ అధ్యక్షుడు అలెజాండ్రో జియామట్టి.. సెప్టెంబర్​లో వైరస్​ పాజిటివ్​గా తేలినట్లు వెల్లడించారు.

ఇదీ చూడండి: అమెరికా అధ్యక్షుడు ట్రంప్​ దంపతులకు కరోనా ​