కరోనా మహమ్మారి వృద్ధులకు చెప్పుకోలేని భయం, బాధను కలిగిస్తోందని వెల్లడించారు ఐక్యరాజ్య సమితి ప్రధాన కార్యదర్శి ఆంటోనియో గుటేరస్. ప్రధానంగా 80ఏళ్లు పైబడిన వారిలో ఈ సమస్యలు అధికంగా ఉన్నట్లు పేర్కొన్నారు. ఈ మేరకు వృద్ధులపై కరోనా ప్రభావానికి సంబంధించి 16 పేజీల ప్రకటన విడుదల చేశారు గుటేరస్. ఇతరుల్లాగే ఆరోగ్యకరమైన జీవితంతో గడిపేందుకు వృద్ధులకు కూడా సమాన హక్కుందని స్పష్టం చేశారు. అందుకే వీరి ప్రాణాలను రక్షించేందుకు ప్రభుత్వాలు ప్రత్యేక శ్రద్ధ వహించాలని సూచించారు గుటేరస్.
అత్యధికులు వృద్ధులే
ప్రపంచాన్ని కలవరపెడుతున్న కరోనాతో ఇప్పటివరకు 2.39లక్షల మందికిపైగా ప్రాణాలు కోల్పోయారు. వీరిలో అత్యధిక శాతం వృద్ధులే ఉన్నారు. అప్పటికే.. ఇతర ఆరోగ్య సమస్యలతో బాధపడుతున్నవారికి వ్యాధి సోకే అవకాశం ఎక్కువుందని వైద్యులు సూచిస్తున్నారు. ఈ నేపథ్యంలో 60ఏళ్లు దాటినవారిని వైరస్ బారి నుంచి కాపాడుకునేందుకు వారి కుటుంబ సభ్యులు ఆంక్షలు విధిస్తున్నారు. ఇంట్లో నుంచి కాలు బయటపెట్టేందుకు వీల్లేదని నిర్బంధిస్తున్నారు.
ఇదీ చూడండి : ప్రభుత్వ 'కరోనా అక్రమాల'కు నిరసనగా సైకిల్ ర్యాలీ
