కరోనాపై కోపం- ఒంటికి బాంబులు కట్టుకుని, పెట్రోల్ పోసుకుని..

చైనాలో ఓ వ్యక్తి తన పుట్టిన రోజు వేడుకల్ని జరుపుకోనివ్వట్లేదని ప్రభుత్వ అధికారుల వద్ద హల్​చల్​ చేశాడు. నడుం చుట్టూ బాణసంచా కట్టుకుని, ఒంటిపై పెట్రోల్​ పోసుకుని బెదిరించాడు. కరోనా వైరస్​ వ్యాప్తి నేపథ్యంలో పుట్టినరోజు వేడుకల్ని అధికారులు నిషేధించడమే ఇందుకు కారణం.

చైనాలో జన్మదిన వేడుకలు జరుపుకునేందుకు అనుమతినివ్వాలని కోరుతూ... ఓ వ్యక్తి ఒంటిపై పెట్రోల్ పోసుకొని, నడుం చుట్టూ బాణసంచా కట్టుకుని బెదిరించాడు. తన పుట్టినరోజును ఘనంగా నిర్వహించుకోవాలనుకుంటే... రద్దు చేశారంటూ అధికారుల ముందు వాపోయాడు.

అంతా కరోనా వల్లే...

చోంగ్​కింగ్​​కు చెందిన 59 ఏళ్ల వాంగ్​... తన పుట్టినరోజునాడు స్నేహితులకు, బంధువులకు మంచి విందు ఇద్దామనుకున్నాడు. సుమారు 40-50 మందిని ఆహ్వానిద్దామనుకున్నాడు.

అయితే... రాకాసి కరోనా వైరస్​ వ్యాప్తిని అరికట్టే చర్యల్లో భాగంగా వేడుకలను నిషేధించింది చైనా ప్రభుత్వం. ఈ విషయాన్నే వాంగ్​కు వివరించారు గ్రామ కమిటీ సభ్యులు.

వేడుక రద్దుతో పట్టరాని ఆగ్రహానికి గురయ్యాడు వాంగ్. పొట్ట చుట్టూ టపాసులు కట్టుకుని, పెట్రోల్​ డబ్బాతో గ్రామ కమిటీ కార్యాలయానికి వెళ్లాడు. విందు నిర్వహణకు అనుమతి ఇవ్వకపోతే ఆత్మహత్య చేసుకుంటానంటూ... శరీరంపై పెట్రోల్​ పోసుకుని బెదిరించాడు. గ్రామ కమిటీ సభ్యులు అతడ్ని అడ్డుకున్నారు. పోలీసు స్టేషన్​లో కేసు నమోదు చేశారు.

చైనాలో కరోనా వైరస్​ కారణంగా ఇప్పటివరకు 1100 మందికిపైగా మృతి చెందారు. మరో 44,600 మంది ఈ మహమ్మారి బారిన పడ్డారు. వైరస్ వ్యాప్తిని అడ్డుకునేందుకు చైనావ్యాప్తంగా కఠిన ఆంక్షలు విధించింది అక్కడి ప్రభుత్వం.

ఇదీ చదవండి: ముద్దుల పోటీకి అదిరే​ రెస్పాన్స్​.. గంటపాటు ఆగకుండా...