కొవిడ్ మహమ్మారి రూపం మార్చుకుంటూ ప్రపంచాన్ని కలవరపెడుతోంది. డెల్టా, డెల్టా ప్లస్ వ్యాప్తితో మళ్లీ కేసుల ఉద్ధృతి పెరుగుతోంది. అమెరికాలో శనివారం ఒక్కరోజే కొత్తగా మరో లక్షకు పైగా కేసులు నమోదయ్యాయి. 360 మంది చనిపోయారు. డెల్టా వేరియంట్ వ్యాప్తి ఎక్కువగా ఉండడం వల్ల వైరస్ కేసులు భారీగా వెలుగు చూస్తున్నాయి. శీతాకాలంలో వచ్చిన కేసులకు మించి ఎక్కువగా నమోదు అవుతుండడం అక్కడి వైద్యాధికారులను కలవరపెడుతోంది.
వుహాన్లో కోటి మందికి కరోనా పరీక్షలు
చైనాలోని వుహాన్ నగరంలో మరోసారి మహమ్మారి విజృంభిస్తున్న నేపథ్యంలో కొవిడ్ పరీక్షలను విస్తృతం చేసింది అక్కడి యంత్రాంగం. నగరంలోని 1.1 కోట్ల మంది నుంచి నమూనాలను సేకరించినట్లు అధికారులు శనివారం వెల్లడించారు. ఇప్పటివరకు కోటి నమూనాల ఫలితాలు వెల్లడయ్యాయని పేర్కొన్నారు.
కొవిడ్ ఉద్ధృతి అధికంగా ఉన్న మరో 5 దేశాలు..
- బ్రెజిల్లోనూ వైరస్ మళ్లీ పంజా విసురుతోంది. శనివారం కొత్తగా 43వేలకుపైగా కేసులు నమోదయ్యాయి. 12 వందల మందికిపైగా మరణించారు. 26 వేల మంది వైరస్ను జయించారు. మొత్తం కేసుల సంఖ్య 2,01,51,779 కు చేరింది.
- ఇండోనేసియాలో వైరస్ ఉద్ధృతి అధికంగా ఉంది. శనివారం ఒక్కరోజే సుమారు 32 వేల మంది వైరస్ బారినపడ్డారు. 1,588 మంది ప్రాణాలు కోల్పోయారు. దాదాపు 40 వేల మంది కోలుకున్నారు. మొత్తం కేసులు 36,39,616 మరణాలు లక్షా ఐదు వేలకు పైకి చేరాయి.
- ఇరాన్లోనూ కొవిడ్ మహమ్మారి వేగంగా వ్యాపిస్తోంది. కొత్తంగా 26వేల మందికి వైరస్ అంటుకుంది. 387 మంది మరణించారు.
- బ్రిటన్లో శనివారం కొత్తగా 28వేలకుపైగా కేసులు వెలుగుచూశాయి. 103 మంది మరణించారు. 22వేల మంది కోలుకున్నారు.
- ఫ్రాన్స్లో, టర్కీలో 25వేలు, రష్యాలో 22వేలు, థాయిలాండ్, మెక్సికోలో 21వేలకు పైగా కొత్త కేసులు నమోదయ్యాయి. ఆయా దేశాల్లో వైరస్ ఉద్ధృతి పెరుగుతున్న క్రమంలో కొత్త ఆంక్షల దిశగా అడుగులు వేస్తున్నాయి అక్కడి ప్రభుత్వాలు.
ఇదీ చూడండి: ఏడు నెలల పాటు స్థిరంగా యాంటీబాడీలు!
