అమెరికా నుంచి భారత్ ఆయుధాల కొనుగోలు 2020లో భారీగా పెరిగింది. 2019లో 6.2 మిలియన్ డాలర్లు మాత్రమే ఉండగా.. అధ్యక్షుడు డొనాల్డ్ ట్రంప్ పదవీకాల చివరి ఏడాది ఏకంగా 3.4 బిలియన్ డాలర్లకు చేరుకున్నాయి. అయితే.. విదేశాలకు అమెరికా ఆయుధాల అమ్మకాల్లో భారీగా తగ్గుదల నమోదైన సమయంలో భారత్కు ఎగుమతులు భారీగా పెరగటం గమనార్హం. రక్షణ భద్రతా సహకార సంస్థ (డీఎస్సీఏ) విడుదల చేసిన గణాంకాల ప్రకారం.. విదేశాలకు 2020లో అగ్రరాజ్య ఆయుధ ఎగుమతులు 2019 (55.7 బిలియన్ డాలర్లు)తో పోలిస్తే 50.8 బిలియన్ డాలర్లకు పడిపోయాయి. అది 2017లో 41.9 బిలియన్ డాలర్లుగా ఉంది.
70 ఏళ్లలో 12.8 బిలియన్ డాలర్లు
2020 ఎడిషన్ విక్రయాల పుస్తకం ప్రకారం.. అమెరికా నుంచి భారత్ ఆయుధాల కొనుగోలు 2017లో 754.4 మిలియన్ డాలర్లు, 2018లో 282 మిలియన్ డాలర్లుగా ఉంది. 1950-2020 మధ్య కాలంలో భారత్.. విదేశీ మిలిటరీ సేల్స్(ఎఫ్ఎంఎస్)లో భాగంగా అమెరికా నుంచి 12.8 బిలియన్ డాలర్ల విలువైన ఆయుధాలను కొనుగోలు చేసింది.
2020లో అమెరికా నుంచి ఆయుధాలు కొనుగోలు చేసిన ప్రధాన దేశాల వివరాలు ఇలా ఉన్నాయి.
| దేశం | 2020లో (బిలియన్ డాలర్లలో) | 2019లో (మిలియన్ డాలర్లలో) |
| భారత్ | 3.4 | 6.2 |
| మొరాకో | 4.5 | 12.4 |
| పోలండ్ | 4.7 | 673 |
| సింగపూర్ | 1.3 | 137 |
| తైవాన్ | 11.8 | 876 |
| యూఏఈ | 3.6 | 1.1 బిలియన్ డాలర్లు |
మరోవైపు పలు దేశాలు అమెరికా నుంచి ఆయుధాల కొనుగోలును గణనీయంగా తగ్గించాయి. అందులో సౌదీ అరేబియా 2019లో 14.9 బిలియన్ డాలర్లు ఉండగా 2020లో 1.2 బిలియన్ డాలర్లకు తగ్గించింది. అఫ్గానిస్థాన్ దిగుమతులు 2019లో 1.6 బిలియన్ డాలర్లు కాగా.. 2020లో 1.1 బిలియన్ డాలర్లకు క్షీణించాయి. బెల్జియం 2019లో 5.5 బిలియన్ డాలర్ల నుంచి 2020లో 41.8 మిలియన్లకు, ఇరాక్ 1.4 బిలియన్ డాలర్ల నుంచి 368 మిలియన్లకు, దక్షిణ కొరియా 2.7 బిలియన్ డాలర్ల నుంచి 2.1 బిలియన్ డాలర్లకు తగ్గించింది.
పాకిస్థాన్కు ఎలాంటి మిలిటరీ, భద్రతా సహకారం అందించకూడదని ట్రంప్ పరిపాలన విభాగం చెబుతున్నప్పటికీ.. తాజా గణాంకాల ప్రకారం పాక్కు ఆయుధాల విక్రయాలు జరిగాయి. 2020లో 146 మిలియన్ డాలర్ల విలువైన ఆయుధాలను పాకిస్థాన్కు అందించింది అమెరికా.
ఇదీ చూడండి: సాంకేతిక పరిజ్ఞానంతో మారుతున్న 'యుద్ధతంత్రం'
