దిగ్గజ దర్శకుడు రాజమౌళి డైరెక్షన్లో రామ్చరణ్- తారక్‌ కాంబినేషన్‌లో తెరకెక్కిన విజువల్‌ వండర్‌ ఆర్ఆర్ఆర్. ఈ చిత్రం బాక్సాఫీస్‌ వద్ద రూ.1000 కోట్లకు పైగా వసూళ్లు రాబట్టి బిగ్గెస్ట్‌ యాక్షన్‌ ఎంటర్‌టైనర్‌గా రికార్డ్స్‌ క్రియేట్‌ చేసింది. భారీ బడ్జెట్‌తో రూపుదిద్దుకున్న ఈ సినిమాలో వీఎఫ్‌ఎక్స్‌కి పెద్ద పీట వేశారు. దీంతో ఈ సినిమా ప్రపంచ వ్యాప్తంగా ప్రేక్షకులను ఉర్రూతలూగించింది. ఆ తర్వాత ఓటీటీలో కూడా అదే జోరు కొనసాగించింది. ఈ సినిమా పలు ప్రతిష్ఠాత్మక అంతర్జాతీయ అవార్డులు కూడా గెలుచుకుంది. విమర్శకుల ప్రశంసలు సైతం అందుకుంది. అమెరికాలో ఇప్పటివరకు చాలా స్పెషల్ స్క్రీనింగ్స్ కూడా వేశారు.
తాజాగా, లాస్ ఏంజెలిస్లో ఉన్న టీఎల్సీ చైనీస్ థియేటర్లోని ప్రపంచంలోనే అతిపెద్ద ఐమాక్స్ స్క్రీన్లో ఆర్ఆర్ఆర్ సినిమా ప్రదర్శించనున్నారు. ఈ ప్రదర్శన జనవరి 9న జరగనుంది. కాగా, ఈ స్పెషల్ స్క్రీనింగ్లో దర్శక ధీరుడు రాజమౌళి, రామ్చరణ్, ఎన్టీఆర్తో పాటు సంగీత దర్శకుడు కీరవాణి కూడా పాల్గొననున్నారు. ప్రేక్షకులతో ఇంటరాక్ట్ కానున్నారు. కాగా, ఇప్పటివరకు ఎన్నో అవార్డులు సొంతం చేసుకున్న ఆర్ఆర్ఆర్.. ఆస్కార్ రేసులో కూడా నిలిచింది. ఉత్తమ పాట కేటగిరీలో చిత్రంలోని 'నాటు నాటు' పాట షార్ట్ లిస్ట్ అయింది.
