అల్లు అర్జున్, రష్మిక.. హీరో, హీరోయన్లుగా సుకుమార్ తెరక్కించిన మూవీ 'పుష్ప- ది రైజ్'. పాన్ ఇండియా మూవీగా తెరకెక్కిన ఈ చిత్రం దేశవ్యాప్తంగా సంచలన విజయాన్ని అందుకుంది. నార్త్, సౌత్ అనే తేడా లేకుండా విడుదలైన ప్రతి చోటా కలెక్షన్ల వర్షం కురిపించింది. తెలుగులో తెరకెక్కిన ఈ సినిమా హిందీ, తమిళం, మలయాళం, కన్నడ భాషల్లో డబ్ చేసి రిలీజ్ చేశారు. ఒకేసారి ఐదు భాషల్లో విడుదలైన అల్లు అర్జున్ సినిమాగా 'పుష్ప' గుర్తింపు పొందింది. ఎర్రచందనం స్మగ్లర్గా బన్నీ నటనకు ఆడియెన్స్ ఫిదా అయ్యారు. దేశవ్యాప్తంగా రూ.300 కోట్లకు పైగా వసూళ్లు సాధించిన ఈ సినిమా.. కేవలం హిందీలోనే ఏకంగా రూ.100 కోట్లు సంపాదించింది.
మరోవైపు 'పుష్ప-2' సినిమా చిత్రీకరణను శరవేగంగా పూర్తి చేసేందుకు ప్రయత్నిస్తున్నారు మేకర్స్. తొలి పార్ట్ మంచి విజయాన్ని అందుకోవడంతో రెండో భాగాన్ని అద్భుతంగా రూపొందించాలనే యోచనలో ఉన్నారు. ఈ మేరకు కథలో మార్పు చేర్పులు చేస్తున్నట్లు తెలిసింది. ఈ ఏడాదిలో ఆగస్ట్లో పూజా కార్యక్రమాలు జరిగాయి.
ఈ నేపథ్యంలో 'పుష్ప-2'కు సంబంధించిన డైలాగ్ ఇదే అంటూ నెట్టింట వైరల్ అవుతోంది. "అడవిలో జంతువులు నాలుగు అడుగులు వెనక్కి వేశాయంటే పులి వచ్చిందని అర్ధం.. అదే పులి నాలుగు అడుగులు వెనక్కి వేసిందంటే పుష్ప రాజ్ వచ్చాడని అర్థం" ఈ డైలాగ్ ప్రస్తుతం సోషల్ మీడియాలో బాగా హల్చల్ చేస్తోంది. మరి ఈ డైలాగ్ సినిమాలో ఉందో లేదో తెలియాలంటే విడుదలయ్యేవరకు వేచి చూడాల్సిందే.
