ఫుల్​ స్పీడ్​లో పవన్​ కల్యాణ్​.. రీసెంట్​గా మూవీ షురూ.. అప్పుడే రిలీజ్​కు రెడీ

పవర్​స్టార్ పవన్​ కల్యాణ్, మెగా మేనల్లుడు సాయి ధరమ్​ తేజ్​ కలిసి నటిస్తున్న 'వినోదయ సీతం' రీమేక్​ రిలీజ్​ డేట్​ను ఖరారు చేసుకుంది. ఆ వివరాలు..

పవర్​స్టార్ పవన్​ కల్యాణ్​ ఓ వైపు సినిమాల్లో నటిస్తూనే మరోవైపు రాజకీయాల్లోనూ బిజీగా గడుపుతున్నారు. ఆయన ప్రస్తుతం నటిస్తున్న సినిమాల్లో 'వినోదయ సీతం' రీమేక్​ ఒకటి. తన మేనల్లుడు మెగా హీరో సాయి ధరమ్​ తేజ్​తో కలిసి ఈ చిత్రంలో నటిస్తున్నారు. ఈ ప్రాజెక్ట్​పై అభిమానులు మంచి అంచనాలు ఉన్నాయి. ఇప్పటికే ఈ సినిమా హైదరాబాద్​లో శరవేగంగా షూటింగ్​ జరుపుకుంటోంది. అయితే తాజాగా ఈ సినిమా విడుదల తేదీని ఖరారు చేసుకుంది. జులై 28న థియేటర్లలో విడుదల కానున్నట్లు మేకర్స్ తెలిపారు. మాతృకకు దర్శకత్వం వహించినా కోలీవుడ్​ స్టార్ డైరెక్టర్​ అండ్ యాక్టర్​ సముద్రఖనినే ఈ రీమేక్​ను కూడా డైరెక్ట్​ చేస్తున్నారు.

ఇకపోతే ఈ చిత్రంలో కేతికా శర్శ హీరోయిన్​గా నటిస్తోంది. ఇంకా మలయాళ ముద్దుగుమ్మ ప్రియా ప్రకాశ్​ వారియర్​, బ్రహ్మానందం, రోహిణి, తనికెళ్ల భరణి, రాజా చెంబోలు, సుబ్బరాజు కీలక పాత్రల్లో నటిస్తున్నారు. పీపుల్‌ మీడియా ఫ్యాక్టరీ బ్యానర్​పై టీజీ విశ్వప్రసాద్‌తో పాటు వివేక్‌ కూచిబొట్లలు ఈ సినిమాను సంయుక్తంగా నిర్మిస్తున్నారు. ఫాంటసీ కామెడీ డ్రామా నేపథ్యంలో ఈ మూవీ రూపొందుతోంది. మాటల మాంత్రికుడు త్రివిక్రమ్‌ శ్రీనివాస్‌ ఈ తెలుగు వెర్షన్‌ కోసం మాటలు అందిస్తున్నారు. ఎస్‌ తమన్ స్వరాలు సమకూరుస్తున్నారు.

ఇక పవన్​ కల్యాణ్​ వినోదయం సీతంతో పాటు పలు చిత్రాల్లో నటిస్తున్నారు. త్వరలోనే క్రిష్ దర్శకత్వంలో తెరకెక్కుతున్న 'హరిహర వీరమల్లు' చిత్రంతో ఆడియెన్స్​ ముందుకు రానున్నారు. 17వ శతాబ్దంనాటి చారిత్రక కథతో భారీ బడ్జెట్​తో ఈ చిత్రాన్ని రూపొందిస్తున్నారు. ఈ దసరాకు విడుదల చేయాలని మేకర్స్ సన్నాహాలు చేస్తున్నట్లు తెలిసింది. ఈ సినిమాకు ఏఎం రత్నం నిర్మతగా వ్యవహరిస్తున్నారు. దీంతో పాటే పవన్​.. హరీశ్ శంకర్ డైరెక్షన్​లో 'ఉస్తాద్​ భగత్ సింగ్'​ అనే చిత్రంలోనూ నటిస్తున్నారు. ఇది ఇంకా షూటింగ్ ప్రారంభించుకోలేదు. అలాగే సాహో ఫేం దర్శకుడు సుజిత్​తో 'OG' అనే భారీ యాక్షన్ ఎంటర్​టైనర్​ సినిమా చేస్తున్నారు.

వినోదయ సీతం రీమేక్​

సాయితేజ్ సినిమాల విషయానికొస్తే.. ఆయన ప్రస్తుతం 'విరూపాక్ష' చిత్రంలో నటిస్తున్నారు. మిస్టీక్‌ థ్రిల్లర్‌గా తెరకెక్కుతున్న ఈ మూవీని కార్తీక్‌ దండు డైరెక్ట్ చేస్తున్నారు. వచ్చే ఏడాది ఏప్రిల్​ 21న పాన్‌ ఇండియా స్థాయిలో అన్ని భాషల్లో విడుదల చేయనున్నారు. ఈ చిత్రాన్ని శ్రీ వెంకటేశ్వర సినీ చిత్ర ఎల్‌ఎల్‌పీ, సుకుమార్‌ రైటింగ్స్‌ సంస్థలు కలిసి సంయుక్తంగా ప్రొడ్యూస్ చేస్తున్నాయి.

ఇదీ చూడండి: గ్రాండ్​ ఈవెంట్​లో రణ్​వీర్​ను పట్టించుకోని దీపిక.. ఇద్దరి మధ్య ఏమైందబ్బా?