ఎన్టీఆర్ వర్సెస్ కృష్ణ.. రెండు రోజుల గ్యాప్లో బ్లాక్బాస్టర్ మూవీస్ రీరిలీజ్

రెండు రోజుల గ్యాప్లో అలనాటి దిగ్గజ నటులు ఎన్టీఆర్-కృష్ణ నటించిన బ్లాక్ బాస్టర్ హిట్ సినిమాలు రీరిలీజ్ అయ్యేందుకు సిద్ధమయ్యాయి. ఆ సంగతులు..

డు రోజుల గ్యాప్లో రెండు బ్లాక్బాస్టర్ మూవీస్

Published : May 24, 2023, 5:44 PM IST

చిత్రసీమలో రీరిలీజ్ ట్రెండ్ జోరు ఆగట్లేదు. ఒకదాని తర్వాత మరొకటి వరుసగా గత చిత్రాలు మళ్లీ విడుదలవుతూ థియేటర్లలో సందడి చేస్తున్నాయి. అభిమానులను బాగా ఆకట్టుకుంటున్నాయి. అయితే ఇప్పుడు ఇద్దరు లెజెండ్ హీరోల సినిమాలు రెండు రోజుల గ్యాప్లో రీరిలీజ్తో బాక్సాఫీస్ వద్ద పోటీపడనున్నాయి. అవే బాక్సాఫీస్ బ్లాక్ బాస్టర్ హిట్స్ 'అడవి రాముడు'-'మోసగాళ్లకు మోసగాడు'. ఈ రెండు చిత్రాలు 4కేలోనే ప్రదర్శన కానున్నాయి.

బ్లాక్బాస్టర్ అడవిరాముడు.. ఎన్టీఆర్ శ‌త జ‌యంతి సంద‌ర్భంగా ఆయన బ్లాక్‌బ‌స్ట‌ర్ మూవీ 'అడ‌వి రాముడు'ను రీ రిలీజ్ చేయనున్నారు. మే 28న తెలుగు రాష్ట్రాలతో పాటు ఓవ‌ర్‌సీస్‌లోనూ ఈ సినిమా స్పెష‌ల్ ప్రీమియ‌ర్స్ స్క్రీనింగ్ వేయనున్నారు. ఈ సినిమా ప్రింట్స్‌ను రీ మాస్ట‌రింగ్ చేసి 4కే రిసొల్యూషన్తో విడుదల చేయనుండటం విశేషం. ఈ చిత్రం ద్వారా వ‌చ్చే క‌లెక్ష‌న్స్‌ను సేవా కార్య‌క్ర‌మాల కోసం వినియోగిస్తారని సమాచారం అందింది.

కాగా, రాఘ‌వేంద్ర‌రావు ద‌ర్శ‌క‌త్వంలో 1977లో వచ్చిన ఈ చిత్రం బిగ్గెస్ట్ క‌మ‌ర్షియ‌ల్ హిట్‌గా నిలిచింది. ద‌ర్శ‌కుడిగా రాఘ‌వేంద్రార‌వు కెరీర్‌లోనూ ఇదే తొలి క‌మ‌ర్షియ‌ల్ స‌క్సెస్ కావ‌డం విశేషం. పలు రికార్డులు తిరగరాసింది. అప్పట్లో 4 సెంటర్లలో ఒక సంవత్సరం పాటు, 8 సెంటర్లలో 200 రోజులు, 35 థియేటర్లలో 100 రోజులు ప్రదర్శితమైంది. అంతేకాకుండా నెల్లూరు కనక మహల్‌ థియేటర్‌లో ప్రతిరోజు 5 షోలతో 100 రోజులు కూడా ఆడింది. ఈ చిత్రంలో ఎన్టీఆర్‌ సరసన జ‌య‌సుధ‌, జ‌య‌ప్ర‌ద హీరోయిన్లుగా నటించారు. జంధ్యాల డైలాగ్స్ అందించారు.ఇక కేవీ మ‌హ‌దేవ‌న్ అందించిన సాంగ్స్.. శ్రోతలను ఓ ఊపు ఊపాయి. దాదాపు 45ఏళ్ల త‌ర్వాత ఈ చిత్రం మ‌ళ్లీ థియేట‌ర్ల‌లో విడుదల అయ్యేందుకు సిద్ధం అవ్వడంతో నంద‌మూరి అభిమానులు సంతోషం వ్యక్తం చేస్తున్నారు.

ఇక సూపర్స్టార్ కృష్ణ జ‌యంతి సంద‌ర్భంగా.. మే 31న 'మోస‌గాళ్ల‌కు మోస‌గాడు' సినిమా రీ రిలీజ్ కానుంది. కృష్ణ కెరీర్లోని బిగ్గెస్ట్‌ హిట్‌ చిత్రాల్లో ఈ చిత్రం ఒకటి. కృష్ణ - విజయనిర్మల జంటగా నటించిన ఈ చిత్రాన్ని కె.ఎస్‌.ఆర్‌. దాస్‌ తెరకెక్కించారు. సుమారు 52 ఏళ్ల క్రితం విడుదలైన ఈ చిత్రాన్ని.. ఇప్పుడు మే 31న 4కే వెర్షన్‌లో రీ రిలీజ్‌ చేయనున్నారు. రీసెంట్గా ఈ చిత్ర రీ రిలీజ్‌ ట్రైలర్‌ను కూడా మహేశ్‌బాబు విడుదల చేశారు. అలా రెండు రోజుల గ్యాప్లోనే ఇద్దరు లెజండ్ హీరోల బ్లాక్బాస్టర్ సినిమాలు థియేటర్లలో రీరిలీజ్ కానుండ‌టం టాలీవుడ్‌లో ఆస‌క్తిక‌రంగా మారింది.