దర్శకధీరుడు రాజమౌళి తెరకెక్కించిన అద్భుత దృశ్య కావ్యం ఆర్ఆర్ఆర్. విడుదలైన మొదటి రోజు నుంచే సూపర్ హిట్ టాక్ సంపాదించుకున్న ఈ సినిమా.. ప్రపంచ వ్యాప్తంగా బాక్సాఫీస్ వద్ద కాసుల వర్షం కురిపించింది. అంతే కాకుండా ఎన్నో అంతర్జాతీయ వేదికలపై సత్తా చాటింది. అనేక అవార్డులను తన ఖాతాలో వేసుకుంది. ఈ సినిమాలో నాటు నాటు పాట.. బెస్ట్ ఒరిజినల్ సాంగ్ క్యాటగిరీలో ఆస్కార్ నామినేషన్ కూడా దక్కించుకుంది.
అయితే మార్చి 12న ప్రతిష్ఠాత్మక ఆస్కార్ అవార్డుల వేడుక ఘనంగా జరగనుంది. కాగా, ఆ వేడుకల్లో నాటు నాటు పాట లైవ్ ప్రదర్శన ఉంటుందని గత కొద్దిరోజులగా వార్తలు వస్తున్నాయి. తాజాగా దీనిపై ఆస్కార్ నిర్వాహకులు స్పందించారు. మార్చి 12న ఆస్కార్ వేదికపై నాటు నాటు లైవ్ షో ఉంటుందని ప్రకటించారు. గాయకులు రాహుల్ సిప్లిగంజ్, కాలభైరవ ఈ పాటకు ప్రదర్శన ఇస్తారని వెల్లడించారు.
దీంతో అభిమానులు ఫుల్ ఖుషీ అవుతున్నారు. నాటు నాటుకు ఆస్కార్ పక్కా అంటూ కామెంట్లు చేస్తున్నారు. అయితే మరికొందరు.. ఈ ప్రదర్శనలో హీరోలు రామ్చరణ్, జూనియర్ ఎన్టీఆర్ స్టెప్పులు వేస్తే చూడాలని ఉందంటూ కామెంట్లు పెడుతున్నారు. మరేం జరుగుతుందో మరికొద్ది రోజులు వేచి చూడాలి.
కాగా, నాటు నాటు ప్రపంచవ్యాప్తంగా పుల్ క్రేజ్ సంపాదించుకుంది. ఈ పాటకు ఇప్పటికే ఎంతో మంది డ్యాన్స్ వేసి సందడి చేశారు. ఈ సినిమాలో నటించిన ఆలియా కూడా ఇటీవలే ముంబయిలో జరిగిన ఓ అవార్డుల వేడుకలో చిందులేసింది. తల్లై నాలుగు నెలలే అయినా ఈ పాటకు బాలీవుడ్ బ్యూటీ డ్యాన్స్ వేయడంతో అంతా ఆశ్చర్యపోయారు. అంతకుముందు, కొరియాలోని ఇండియా ఎంబసీ ఉద్యోగులు చిందులేశారు. కొరియన్ వనితలు తమదైన శైలిలో స్టెప్పులేశారు. పురుషులు.. రామ్చరణ్, ఎన్టీఆర్ గెట్ప్స్లో అదరగొట్టారు. ఈ వీడియో చూసి ప్రధాని మోదీ కూడా మురిసిపోయారు. నాటు నాటు ప్రతిష్ఠాత్మక గోల్డెన్ గ్లోబ్ అవార్డుతోపాటు హాలీవుడ్ క్రిటిక్స్ అసోసియేషన్ అవార్డు కూడా గెలుచుకుంది.
- " class="align-text-top noRightClick twitterSection" data="">
కాగా, ఎన్టీఆర్, రామ్చరణ్ హీరోలుగా రూపొందిన ఆర్ఆర్ఆర్ చిత్రానికి రాజమౌళి దర్శకత్వం వహించగా, డీవీవీ దానయ్య నిర్మించారు. ఆలియాభట్‌, అజయ్‌ దేవగణ్, శ్రియ, ఒలివియా మోర్రీస్‌ ముఖ్య పాత్రలు పోషించారు. ఈ సినిమా గతేడాది మార్చి 25న ప్రపంచ వ్యాప్తంగా విడుదలై భారీ విజయాన్ని సాధించింది. ఏకంగా రూ.1200కోట్లు వసూలు చేసింది.
