తనపై వస్తున్న ఫేక్ న్యూస్లను కట్టడి చేసేందుకు దిల్లీ కోర్టును ఆశ్రయించిన బిగ్బీ అమితాబ్ బచ్చన్ మనమరాలు, అభిషేక్ బచ్చన్ కుమార్తె ఆరాధ్య బచ్చన్కు ఊరట లభించింది. ఆరాధ్య దాఖలు చేసిన పిటిషన్పై విచారణ జరిపిన దిల్లీ హైకోర్టు.. గూగుల్ సంస్థకు ఆదేశాలు జారీ చేసింది. ఐటీ నిబంధనలను కట్టుబడి ఉండాలని ఆదేశించింది. అన్ని నిబంధనలను పాటించాలని నోటీసులు జారీ చేసింది.
దిల్లీకి చెందిన పలు యూట్యూబ్ ఛానళ్లతో పాటు, టాబ్లాయిడ్లు గత కొద్ది రోజులుగా ఆరాధ్య బచ్చన్ గురించి వరుస కథనాలు ప్రచురిస్తూ వస్తున్నాయి. వాటన్నింటిలోనూ వాస్తవాల కంటే ఊహాగానాలకే ఎక్కువ ఉన్నాయని.. అంతే కాకుండా తన ఆరోగ్యంతో పాటు వ్యక్తిగత జీవితం గురించి పలు కథనాలు కూడా ప్రచురితమయ్యాయి. దీంతో ఆగ్రహించిన కుటుంబసభ్యులు.. ఇలాంటి తప్పుడు వార్తలను జనాల్లోకి తీసుకెళ్తున్న సంస్థలపై చట్ట ప్రకారం చర్యలు తీసుకోవాలనే నిర్ణయానికి వచ్చారు. ఈ క్రమంలో చిన్నారి ఆరాధ్య చేత దిల్లీ కోర్టులో పిటిషన్ దాఖలు చేయించారు. తన ఆరోగ్యంపై తప్పుడు సమాచారాన్ని ప్రచారం చేసిన యూట్యూబ్, టాబ్లాయిడ్లపై దిల్లీ హైకోర్టుకు ఫిర్యాదు చేసింది. మైనర్ అయినందున.. తనపై ఇలాంటి మీడియా కవరేజీపై నిషేధం విధించాలని అభ్యర్థించింది. ఆరాధ్యకు సంబంధించిన అన్ని వీడియోలను తొలగించాలంటూ.. పది సంస్థల పేర్లను ఆమె పిటిషన్లో పేర్కొంది. ఈ కేసులో ఇప్పుడు గూగుల్ LLCతో పాటు మినిస్ట్రీ ఆఫ్ ఎలక్ట్రానిక్స్ అండ్ ఇన్ఫర్మేషన్ టెక్నాలజీ (గ్రీవెన్స్ సెల్)ల పేర్లు కూడా ఉన్నాయి.
సోషల్ మీడియాలోనూ ఇటీవలే ఆరాధ్య బచ్చన్పై వచ్చిన ట్రోల్స్పై కూడా అభిషేక్ స్పందించారు. 'బాబ్ బిస్వాస్' అనే సినిమా ప్రమోషన్లలో ఈ విషయంపై తీవ్ర ఆగ్రహం వ్యక్తం చేశారు. "ఈ ట్రోల్స్ ఎట్టి పరిస్థితుల్లోనూ మేము అంగీకరించం. ఇలాంటివి చేసేవారిని క్షమించాల్సిన అవసరం లేదు. నేను స్టార్ను అయినంత మాత్రాన ఈ రంగానికి అస్సలు సంబంధంలేని నా కూతురిని టార్గెట్ చేస్తారా? నన్ను ఏమైనా అనాలనుకుంటే నా ముఖం మీద అనండి" అంటూ సీరియస్ అయ్యారు.
బాలీవుడ్ ముద్దుగుమ్మ ఐశ్వర్య రాయ్, అభిషేక్ బచ్చన్ ఏప్రిల్ 20, 2007లో వివాహం చేసుకున్నారు. ఇరు కుటుంబాల పెద్దల సమక్షంలో వీరి వివాహం అంగరంగ వైభవంగా జరిగింది. ముంబయిలోని అమితాబ్ నివాసం ప్రతీక్షలో ఈ వివాహ వేడుక జరిగింది. కొద్దిమంది అతిథులు, బంధుమిత్రుల సమక్షంలో వేడుకలు నిర్వహించారు. వారికి పెళ్లైన నాలుగు సంవత్సరాల తర్వాత.. నవంబర్ 16, 2011 న అమ్మాయి జన్మించింది. ఆమెకు ఆరాధ్య అని పేరు పెట్టారు.
