విశాఖలో ఇప్పటివరకూ 11 కరోనా పాజిటివ్ కేసులు నమోదు కావడంపై అధికార యంత్రాంగం అప్రమత్తమైంది. దిల్లీ నుంచి వచ్చిన వారిని గుర్తించిన అధికారులు దాదాపు అందరికీ పరీక్షలు నిర్వహించారు. కరోనా బాధితులను ప్రత్యేక వార్డులో ఉంచి చికిత్స అందిస్తున్నారు. జిల్లాలో మొత్తం 53 క్వారంటైన్లో 8,912 పడకలు సిద్ధం చేసినట్లు అధికారులు వెల్లడించారు. ఇప్పటివరకూ 153 మంది క్వారంటైన్లో ఉన్నట్లు తెలిపారు. కరోనా అనుమానంతో 273 మంది ఆస్పత్రుల్లో చేరగా.. వారిలో 163 మందిని డిశ్చార్జ్ చేసినట్లు చెప్పారు.
పాజిటివ్ కేసుల వివరాలు
విశాఖలో ఇప్పటివరకూ 333 అనుమానితులకు పరీక్షలు చేయగా.. వారిలో 11 మందికి పాజిటివ్, 190 మందికి నెగిటివ్ వచ్చింది. మరో 132 మంది ఫలితాలు రావాల్సి ఉంది. కరోనా పాజిటివ్ కేసులు వచ్చిన ప్రాంతాల్లో పారిశుద్ధ్య సిబ్బంది శుభ్రత చర్యలు చేపట్టారు. కరోనా వ్యాప్తి నివారణకు కమిటీలు ప్రత్యేకంగా పని చేస్తున్నట్లు కలెక్టర్ వినయ్ చంద్ తెలిపారు. జిల్లాలో కొవిడ్ ఆస్పత్రిగా.. పెద్ద వాల్తేరులోని ఛాతి ఆసుపత్రి , గీతం వైద్య విద్యాలయాలు సేవలు అందిస్తున్నట్లు వెల్లడించారు. నిత్యావసరాల విషయంలో ప్రజలకు ఎలాంటి ఇబ్బందులు లేకుండా చూస్తున్నట్లు చెప్పారు. ప్రజలు స్వీయ నియంత్రణ పాటించాలని కలెక్టర్ సూచించారు.
ఇదీ చూడండి:
