అవకాశం పసిగట్టారు... ప్రగతి ఒడిసిపట్టారు

ఒకప్పుడు సాధారణ రైతులే.. సాగులో నైపుణ్యం ప్రదర్శించి పారిశ్రామికవేత్తలవుతున్నారు. చిన్నపాటి వనరులు, ప్రభుత్వ సాకారాన్ని అందిపుచ్చుకున్నారు. సాగుతోనే అభివృద్ధి సాధించలేమని గుర్తించిన ప్రకాశం జిల్లా బొబ్బేపల్లి గ్రామ రైతులు...వ్యవసాయాధారిత పరిశ్రమల వైపు దృష్టి పెట్టారు.

వీరాంజనేయులు... ప్రకాశం జిల్లా మార్టూరు మండలం బొబ్బేపల్లిలో ఆదర్శ రైతు... వ్యవసాయంలో కొత్త అవకాశాలు అందిపుచ్చుకుంటూ ఆదర్శంగా నిలుస్తున్నారు. ఆయనతోపాటు తోటి రైతులనూ ఆ మార్గంలోనే నడిపిస్తున్నారు. వివిధ రకాల పంటలు, నర్సరీలు ఏర్పాటు చేస్తూ వ్యవసాయాన్ని పరిశ్రమగా మార్చారు. ఇందులో భాగంగా గ్రామంలో 50 మంది రైతులతో ఓ సంఘం ఏర్పాటు చేశారు. సొసైటీ తరుఫున రూ. 16.69 లక్షలు, ప్రభుత్వం రూ. 18.7లక్షల సహకారంతో రాష్ట్రీయ కృషి విజ్ఞాన యోజన కింద పరిశ్రమ ఏర్పాటు చేసుకున్నారు. యద్దనపూడి మండలం యనమదలలోని ఈ పరిశ్రమ ఇప్పుడు లాభాల పంట పండిస్తోంది.

సాగులో అనేక ప్రయోగాలు చేసిన వీరు, వ్యవసాయాధారిత పరిశ్రమలపై దృష్టి సారించారు. మిరప రైతులు దోమ బెడద నివారణకు పసుపు జిగురు అట్టలు కొని... మిరప క్షేత్రంలో వేలాడ దీస్తారు. వాటికి మార్కెట్​లో ఉన్న డిమాండ్‌ గుర్తించి... ఆ పసుపు జిగురు అట్టలను తయారు చేయాలని నిర్ణయించుకున్నారు. సంఘం సభ్యులంతా కలిసి పసుపు అట్టలు తయారు చేస్తూ అమ్ముతున్నారు.

బహిరంగ మార్కెట్​లో ప్రముఖ కంపెనీల పసుపు జిగురు అట్ట రూ. 20-25 ఉండగా, రైతులు తయారు చేస్తున్న అట్ట కేవలం రూ. 10లకే అందిస్తున్నారు. సొసైటీలో సభ్యులుగా ఉన్న రైతులకు మాత్రం ఉత్పత్తి ధరకే విక్రయిస్తారు. చుట్టుప్రక్కల ప్రాంతాల రైతులు అధిక సంఖ్యలో ఈ పసుపు జిగురు అట్టలు అమ్ముతున్నారు.
సాగులో కొత్త కొత్త ఆలోచనలతో వ్యవసాయాధారిత పరిశ్రమలపై దృష్టి సారించిన వీరి విజయం.. వ్యవసాయం లాభసాటి కాదు అనుకునేవారికి సమాధానంగా నిలుస్తోంది.