కరోనా మృతుల దహనానికి కట్టెల కొరత తీర్చాలని, చేయూత అందించాలని తెలంగాణ రాష్ట్ర అటవీ అభివృద్ధి సంస్థ నిర్ణయించింది. ఇందుకోసం శ్మశానాలకు సుమారు వెయ్యి టన్నుల కలపను ఉచితంగా అందించనుంది. కరోనా విపత్తు నేపథ్యంలో తమవంతుగా మానవతా దృక్పథంతో సాయం అందించాలని నిర్ణయించినట్లు ఆ సంస్థ ఛైర్మన్ వంటేరు ప్రతాప్రెడ్డి తెలిపారు.
పేపర్ మిల్లులకు అమ్మగా.. సంస్థ వద్ద మిగిలిన దాదాపు వెయ్యి టన్నుల కలపను హైదరాబాద్తో సహా సమీప మున్సిపాలిటీల శ్మశానాలకు మృతదేహాలను కాల్చేందుకు సరఫరా చేయనున్నట్లు వంటేరు పేర్కొన్నారు. పెరిగిన కలప ధరలు పేదలకు భారంగా పరిణమించిన నేపథ్యంలో మానవతా దృక్పథంతో రూ.20 లక్షల విలువైన కలపను ఉచితంగా అందిస్తున్నట్లు వివరించారు.
వెదురునూ సరఫరా చేస్తాం..
జీహెచ్ఎంసీ, మిగతా పట్టణాల్లో స్థానిక పురపాలక అధికారులతో సమన్వయం చేసుకొని కలప అందించే ఏర్పాట్లు చేస్తామని సంస్థ వైస్ ఛైర్మన్, ఎండీ చంద్రశేఖరరెడ్డి తెలిపారు. రంగారెడ్డి డివిజన్లో 3,500 టన్నులు, ఖమ్మం-సత్తుపల్లి-అశ్వారావుపేట-భద్రాచలం డివిజన్లలో 4,000 టన్నులు, మంచిర్యాల-కాగజ్నగర్లలో 860 టన్నులు, వరంగల్ డివిజన్లో 200 టన్నుల కలప అందుబాటులో ఉందని పేర్కొన్నారు. అంత్యక్రియలకు అవసరమైన వెదురును కూడా సరఫరా చేస్తామని చెప్పారు.
మున్సిపల్ అధికారులను సంప్రదించాలి..
హైదరాబాద్ పరిధిలో అంబర్పేట, బన్సీలాల్పేట, ఆసిఫ్నగర్, ఈ.ఎస్.ఐ శ్మశాన వాటికలకు ఈ వారంలో కలప తరలిస్తామని చంద్రశేఖరరెడ్డి అన్నారు. తమ వారి అంత్యక్రియలకు అవసరమైన కలప లభ్యత లేని పేదలు స్థానిక మున్సిపల్ అధికారులను సంప్రదించవచ్చని తెలిపారు. కలపను తరలించేందుకు స్థానిక లారీ ఓనర్స్ అసోసియేషన్లు ముందుకు వచ్చినట్లు ఆయన వివరించారు.
ఇదీ చూడండి:
