హైదరాబాద్ మొయినాబాద్ మండలంలో బ్యాడ్మింటన్ క్రీడాకారిణి గుత్తా జ్వాల నెలకొల్పిన గుత్తా జ్వాల అకాడమీ ఆఫ్ ఎక్సలెన్స్ను తెలంగాణ పురపాలక శాఖ మంత్రి కేటీఆర్... మంత్రి శ్రీనివాస్గౌడ్తో కలిసి ప్రారంభించారు. ప్రభుత్వం తీసుకురాబోతున్న పాలసీ క్రీడాకారులను, శిక్షకులను ప్రోత్సహించే విధంగా ఉంటుందని మంత్రి కేటీఆర్ అన్నారు. చిన్న చిన్న దేశాల నుంచి వస్తున్న క్రీడాకారులు విజేతలుగా నిలుస్తున్నారని... అలాంటి ప్రతిభావంతులు మన దేశంలో తయారవ్వాలని కేటీఆర్ అభిప్రాయపడ్డారు. క్రీడాకారులతో పాటు శిక్షకులు, సహాయక సిబ్బందిని గుర్తించినప్పుడే విజేతలు పుట్టుకొస్తారన్నారు. గ్రామీణ ప్రాంత క్రీడాకారులకు శిక్షణ ఇవ్వాలనుకుంటున్న గుత్తా జ్వాల అకాడమీతో... స్పోర్ట్స్ అకాడమీ కలిసి పనిచేస్తుందని కేటీఆర్ తెలిపారు.
తెలంగాణలో క్రీడల అభివృద్ధికి విశేష ప్రాధాన్యం ఇస్తున్నట్లు ఆ శాఖ మంత్రి శ్రీనివాస్గౌడ్ అన్నారు. రాష్ట్ర వ్యాప్తంగా 110 క్రీడా మైదానాలు నిర్మించామని... వాటిలో ఇప్పటికే 50 నిర్మాణాలు పూర్తయ్యాయని... శ్రీనివాస్గౌడ్ తెలిపారు. పరిశ్రమల సీఎస్ఆర్ నిధులను క్రీడలు వృద్ధి చేసేందుకు ఉపయోగించాలని పేర్కొన్నారు. సాగునీటి ప్రాజెక్టుల అభివృద్ధి అనంతరం పరిశ్రమలు, క్రీడలపై దృష్టి సారిస్తామని తెలిపారు.
