శాంతి భద్రతల పరిరక్షణ అందరి బాధ్యతని, సమష్టి కృషితో అది సాధ్యమవుతుందని రాష్ట్ర హోం, విపత్తు నిర్వహణ శాఖ మంత్రి మేకతొటి సుచరిత అన్నారు. అమరావతి సచివాలయంలోని రెండో బ్లాక్లో ఆమె బాధ్యతలు స్వీకరించారు. తొలుత తన ఛాంబర్లో సర్వమత ప్రార్ధనలు నిర్వహించారు. దళిత మహిళకు హోం మంత్రి పదవి ఇవ్వడం జగన్‌ తీసుకున్న గొప్ప నిర్ణయాల్లో ఒకటని ఆమె అన్నారు. పోలీసుల సంక్షేమానికి తమ ప్రభుత్వం పెద్దపీట వేస్తుందని, పోలీసులకు వారాంతపు సెలవులు ఇస్తామని ముఖ్యమంత్రి జగన్‌ ఇప్పటికే ప్రకటించారని మంత్రి తెలిపారు. దీనిపై కమిటీ వేశామని, నివేదిక వచ్చిన వెంటనే అమలు చేస్తామని చెప్పారు. పోలీస్‌ విభాగంలో ఉన్న ఖాళీలను భర్తీ చేస్తామన్నారు. కేంద్రం రాష్ట్రానికి నాలుగు బెటాలియన్లను మంజూరు చేసిందని తెలిపారు. మహిళ, గిరిజన బెటాలియన్లను త్వరలోనే ప్రారంభిస్తామని అన్నారు. మహిళలకు సత్వర భద్రత కల్పించేందుకు త్వరలో టోల్ ఫ్రీ నెంబర్ ఏర్పాటు చేస్తామని ప్రకటించారు. స్నేహపూర్వక పోలీసింగ్ విధానాన్ని కొనసాగిస్తామని స్పష్టం చేశారు. నేరాలు చేసే వారిని కఠినంగా శిక్షిస్తామన్నారు.
ఇదీ చదవండీ: అందరికీ ఆరోగ్యం... ఆరోగ్యశ్రీకి సరికొత్త భాష్యం
