వినాయకచవితి వచ్చిందంటే చాలు దేశవ్యాప్తంగా సందడి నెలకొనేది. విఘ్నేశ్వరుడి విగ్రహాల తయారీదారులు, పురోహితులు, మేళ తాళాలా వారు, వ్యాపారులు... ఇలా ఎంతోమందికి చేతినిండా పని దొరికేది. ఇదంతా ఒకప్పటి మాట. పక్కదేశం నుంచి వచ్చిన కరోనా మహమ్మారి గణపయ్య పండగకు గండాన్ని తెచ్చింది. సందడి లేకుండా పండుగ చేసుకోవాల్సిన పరిస్థితి నెలకొనేలా చేసింది.
వైరస్ ఉద్ధృతి నేపథ్యంలో బహిరంగంగా వినాయక చవితి వేడుకలు నిర్వహించకూడదని ఇప్పటికే అధికారులు ఆదేశాలు ఇచ్చారు. దీని ప్రభావం గణేశుడి విగ్రహాల తయారీదారులపై పడింది. పండుగ నేపథ్యంలో ఇప్పటికే చాలామంది లక్షలు పోసి లంబోదరుడి విగ్రహాలను తయారు చేశారు. ప్రస్తుతం అరకొరగా.. తప్ప పెద్ద ఆర్డర్లు లేని కారణంగా.. వారి పరిస్థితి ఆగమ్య గోచరంగా మారింది. పెట్టుబడి అయినా తిరిగి వచ్చే పరిస్థితి కనిపించడం లేదని వారు ఆందోళన చెందుతున్నారు.
లక్షల్లో పెట్టుబడి
రాజస్థాన్కు చెందిన కొందరు కొన్నేళ్లుగా ప్రకాశం జిల్లా యర్రగొండపాలెంలో వినాయక విగ్రహాలు తయారు చేస్తున్నారు. లక్షల్లో పెట్టుబడులు పెట్టి గణేశుడి విగ్రహాలను తయారు చేశారు. మార్చిలో లాక్ డౌన్ ప్రకటించినా... పండగ నాటికి అన్ని పరిస్థితులు చక్కదిద్దుకుంటాయన్న భావనతో 200 పైగా విగ్రహాలను తీర్చిదిద్ది విక్రయానికి సిద్ధంగా ఉంచారు. ప్రస్తుత పరిస్థితులతో వారు ఆందోళన చెందుతున్నారు. నెలల పాటు కష్టపడి తయారు చేసిన విగ్రహాలు కొనుగోలుకు నోచుకుంటాయో లేదో అని తయారీదారులు ఆందోళన చెందుతున్నారు. రాష్ట్రవ్యాప్తంగా ఇలాంటి పరిస్థితే నెలకొంది.
కళ తప్పిన వ్యాపారం
విజయవాడలో ప్రతి ఏడాది వినాయక విగ్రహాలకు సంబంధించి కోట్ల రూపాయల్లో వ్యాపారం సాగేది. ఈ నెల 22న వినాయక చవితి పండుగ జరుగునున్నా... నగరంలో ఈ సారి చాలా తక్కువ ప్రదేశాల్లోనే విగ్రహాల తయారీ కనిపిస్తోంది. పర్యావరణ పరిరక్షణలో భాగంగా మట్టితో భారీ సంఖ్యలో విగ్రహాలు తయారు చేసే చోట్ల కూడా చాలా పరిమాణాలను తగ్గించేశారు. ఐదు అడుగులు దాటకుండానే విగ్రహాలు చేస్తున్నారు. ఏళ్ల తరబడి ఇతర రాష్ట్రాల నుంచి నిపుణులైన తయారుదారులను తెప్పించి మరీ ఉద్యమంగా మట్టి విగ్రహాలు తయారు చేసే పర్యావరణ పరిరక్షణ సంస్థలు కరోనాతో ఈ ఏడాదికి తమ ప్రయత్నాలను విరమించుకున్నారు.
మూడు రోజులైనా అనుమతించండి
శ్రీకాకుళం జిల్లాలోనూ వినాయకుడి విగ్రహాల తయారీదారులు ఇబ్బందులు ఎదుర్కొంటున్నారు. సుమారు 15 లక్షల వరకు ఖర్చు చేసి వినాయక విగ్రహాలు తయారు చేశామని... ఆముదాలవలసకు రాజస్థాన్ నుంచి వచ్చిన కొందరు కళాకారులు చెబుతున్నారు. అయితే ఇప్పుడు వినాయక చవితి నవరాత్రులు చేయొద్దని జిల్లా అధికారులు ఆదేశాలు జారీ చేయటంతో కొనుగోలుదారులు రావటం లేదని వారు ఆందోళన చెందుతున్నారు. విగ్రహాల కోసం అడ్వాన్స్ చెల్లించిన వారు తమ డబ్బులు తిరిగి ఇచ్చేయాలని కోరుతున్నారని వెల్లడించారు. కూలీలకు సైతం డబ్బులు ఇవ్వలేని పరిస్థితి ఏర్పడిందని వారు చెబుతున్నారు. జిల్లా యంత్రాంగం స్పందించి కనీసం మూడు రోజులైనా వినాయక నవరాత్రులు చేపట్టేందుకు అనుమతులు ఇస్తే కనీసం పెట్టుబడి డబ్బులు వస్తాయని విగ్రహాల తయారీదారులు కోరుతున్నారు.
పురోహితుల బాధలు
కరోనా కారణంగా మార్చి నుంచి రాష్ట్రంలోని పురోహితులకు సరైన ఉపాధి లేదు. వినాయక చవితి ఉత్సవాల సమయంలో అయినా తమ ఇబ్బందులు దూరమవుతాయని వారు భావించారు. చవితి సమయంలో ఒక్కో పురోహితుడు కనీసం ఐదారు పందిళ్ల వద్ద పూజల కోసం ముందుగానే ఒప్పందాలు చేసుకుంటారు. ఈసారి తమ పందిరి వద్ద పూజలు చేసేందుకు రావాలంటూ నిర్వాహకులెవరూ తమను సంప్రదించనే లేదని పురోహితులు ఆవేదన చెందుతున్నారు.
అన్ని వర్గాల ప్రజలను కలిపి సామాజిక చైతన్యాన్ని కలిగించే వినాయక చవితి నవరాత్రి ఉత్సవాల విషయంలో పోలీసుల ఆంక్షలు సరికావని భారతీయ జనతా పార్టీ నేతలు అభిప్రాయపడుతున్నారు. చవితి సంప్రదాయాన్ని ఈసారికి ఇళ్ల వద్ద చేసుకోవడమే ఉత్తమమనే భావన చాలామంది నిర్వాహకుల్లో కనబడుతోంది.
