ఏపీలో రూ. 2150 కోట్ల పెట్టుబడితో మొబైల్స్ తయారీతో పాటు ఇతర ఎలక్ట్రానిక్ పరికరాల తయారీకి ఆసక్తిగా ఉన్నట్లు కార్బన్ మొబైల్స్ సంస్థ ప్రతినిధులు సీఎం జగన్కు తెలియజేశారు. తిరుపతితో పాటు కడప జిల్లా కొప్పర్తి ఎలక్ట్రానిక్ మాన్యుఫ్యాక్చరింగ్ క్లస్టర్లో మొబైల్, ఎలక్ట్రానిక్ పరికరాల తయారీ యూనిట్లను ఏర్పాటు చేయనున్నట్లు వెల్లడించారు.
తాడేపల్లిలోని ముఖ్యమంత్రి క్యాంపు కార్యాలయంలో యూనైటెడ్ టెలీలింక్స్ నియోంక్ ప్రైవేట్ లిమిటెడ్(కార్బన్) సంస్థ ప్రతినిధులు ఈమేరకు సీఎం జగన్తో భేటీ అయ్యారు. 650 కోట్లతో మొబైల్స్ తయారీ, ఎలక్ట్రానిక్స్ తయారీతో పాటు రూ.1500 కోట్లతో ఇతర మౌలిక సదుపాయాలను కల్పించనున్నట్లు సంస్థ ప్రతినిధులు సీఎంకు వివరించారు. దీని వల్ల 6 వేల మందికి ప్రత్యక్షంగా 15 వేల మందికి పరోక్షంగా ఉద్యోగావకాశాలు కలుగుతాయని తెలిపారు. స్మార్ట్ ఫోన్లు, ఫీచర్ ఫోన్లతో సహా సెట్టాప్ బాక్సులు, టెలికాం ఉత్పత్తులు, చార్జర్లు, మొబైల్ ఫోన్ల కోసం ప్లాస్టిక్ ఉత్పత్తులు, ఐటీ హార్డ్ వేర్, ల్యాప్టాప్, డెస్క్టాప్ లను ఉత్పత్తి చేయనున్నట్లు కంపెనీ ప్రతినిధులు సీఎంకు వివరించారు. ఈ సందర్భంగా సంస్థ ప్రతినిధులను ముఖ్యమంత్రి జగన్ శాలువా, జ్ఞాపికలతో సత్కరించారు.
ఇదీ చదవండి
ap legislative: ఏపీ శాసనమండలి రద్దు అంశం పరిశీలనలో ఉంది: కిరణ్‌రిజుజు
