అంతర్వేది రథం దగ్ధం ఘటనకు నిరసనగా రేపు చలో అమలాపురానికి భాజపా పిలుపునిచ్చింది. ఈ కార్యక్రమానికి అనుమతి నిరాకరించిన పోలీసులు ఎక్కడికక్కడ ముందస్తు చర్యలు చేపట్టారు. విజయవాడలో భాజపా రాష్ట్ర అధ్యక్షుడు సోము వీర్రాజును గృహ నిర్బంధంలో ఉంచారు. అమలాపురంలో సెక్షన్‌ 30,144 అమల్లో ఉందని ఆయనను నిలువరించారు. పోలీసుల వైఖరికి నిరసనగా భాజాపా శ్రేణులు ప్రభుత్వానికి, ముఖ్యమంత్రికి వ్యతిరేకంగా నినాదాలు చేశారు. మాజీ అధ్యక్షుడు కన్నా లక్ష్మీనారాయణను గుంటూరులోని ఆయన నివాసంలోనే నిర్బంధించారు. విశాఖ నుంచి బయల్దేరబోతున్న విష్ణుకుమార్‌రాజును అక్కడే ఆపేశారు. పోలీసు వారి చర్యలను విష్ణుకుమార్ రాజు తీవ్రంగా ఖండించారు. రాష్ట్రంలో ప్రజా హక్కుల అణిచివేతకు ఇది నిదర్శనమన్నారు.
రాష్ట్ర కార్యవర్గ సభ్యులు, పాలకొండ నియోజకవర్గం ఇన్చార్జ్ తాడంకి సునీతతోపాటు ఆమె భర్త పవన్ సాయి ఇతర నాయకులను నిర్భందంలో ఉంచారు. చలో అమలాపురం కార్యక్రమానికి ఎలాంటి అనుమతులూ లేవని... శాంతిభద్రతలకు విఘాతం కలిగిస్తే కఠిన చర్యలు తీసుకుంటామని పోలీసులు హెచ్చరించారు.
ప్రభుత్వమే మతమార్పిడిలను ప్రోత్సహిస్తున్నట్లు ఉంది..: కన్నా లక్ష్మీనారాయణ, భాజపా రాష్ట్ర మాజీ అధ్యక్షుడు
రాష్టంలోని దేవాలయాలపై వరుసగా జరుగుతున్న దాడులను చూస్తుంటే... ప్రభుత్వమే మతమార్పిడిలను ప్రోత్సహిస్తున్నట్లు ఉందని భాజపా రాష్ట్ర మాజీ అధ్యక్షుడు కన్నా లక్ష్మీనారాయణ అన్నారు. ప్రజాస్వామ్య బద్దంగా చేపట్టిన చలో అమలాపురం కార్యక్రమానికి అనుమతి లేదంటూ పోలీసులు గృహనిర్బంధం చేయడం దారుణమన్నారు. దేవాలయాలు పైన వరుస దాడులు జరుగుతున్న స్పందించని రాష్ట్ర ప్రభుత్వం.. చర్చి పై రాళ్లు విసిరారన్న నేపతంతో41 మంది ని అరెస్ట్ చేయడం హేయమైన చర్యన్నారు.ఇకనైనా విధానాలను మార్చుకోకపోతే రాష్ట్ర ప్రభుత్వానికి భంగపాటు తప్పదని హెచ్చరించారు.
