తిరుమల శ్రీవారి దర్శనం కోసం వచ్చి.. కరోనా లాక్డౌన్ కారణంగా తిరుపతిలో చిక్కుకుపోయిన రష్యన్ యువతి ఎస్తేర్పై ఈనాడు- ఈటీవీ ప్రసారం చేసిన కథనానికి స్పందన వెల్లువెత్తింది. ఆమెను ఆదుకునేందుకు మానవత్వంతో పలువురు స్పందించారు. కొందరు ఆర్థిక సాయం చేయగా... మరి కొంతమంది యూపీలోని బృందావన్లో ఉన్న ఏస్తర్ తల్లి తిరుపతి రావడానికి అవసరమైన విమాన ఖర్చులు సమకూర్చారు. ఈ క్రమంలో గడిచిన కొన్ని రోజులుగా దూరంగా ఉంటున్న తల్లీకుమార్తెలు ఒక చోటికి చేరారు. ఈటీవీలో కథనాలు ప్రసారమవడం వల్ల తమ సమస్యలు తీరాయని ఏస్తర్ ఆనందం వ్యక్తం చేశారు. తల్లిని చూడగానే ఉద్వేగానికి లోనయ్యారు.
ఈనాడు-ఈటీవీ కథనాలతో.. రష్యన్ యువతికి పలువురు అండగా నిలబడ్డారు. రూ.78,500 విరాళాన్ని... తిరుపతి నగరపాలక సంస్థ కమిషనర్ పీఎస్ గిరీషా చేతుల మీదుగా ఈనాడు యాజమాన్యం ఎస్తేర్కు అందచేసింది. ఆమెకు 2 లక్షల రూపాయల వరకు ఆర్థిక సాయం అందింది. ఎస్తేర్ పడుతున్న కష్టాలపై ఈనాడు-ఈటీవీ కథనాలు వెలుగులోకి తీసుకువచ్చాయన్న కమిషనర్.... .ఆమె తన తల్లితో రష్యాకు తిరిగి వెళ్లేంతవరకూ నగరపాలక సంస్థ తరఫున సహాయ సహకారాలు అందిస్తామన్నారు. తన కష్టాలపై స్పందించి... విరాళాలు పంపిన వారందరికీ ఎస్తేర్ కృతజ్ఞతలు తెలిపారు.
సంబంధిత కథనం : తిరుపతిలో రష్యన్ మహిళ కష్టాలు.. ఆర్థిక సమస్యలతో తల్లీకుమార్తెలు అవస్థ
