23న శ్రీవారికి పట్టువస్త్రాలు సమర్పించనున్న సీఎం జగన్

తిరుమల శ్రీవారి సాలకట్ల బ్రహ్మోత్సవాల వివరాలను తితిదే ఛైర్మన్ వైవీ సుబ్బారెడ్డి ప్రకటించారు. ఈ నెల 23వ తేదీన సీఎం జగన్ శ్రీవారికి పట్టువస్త్రాలు సమర్పిస్తారని చెప్పారు. 24వ తేదీన కర్ణాటక సీఎంతో కలిసి సీఎం జగన్ శ్రీవారి సేవలో పాల్గొంటారని వెల్లడించారు. సీఎం జగన్ డిక్లరేషన్​పై చంద్రబాబు చేస్తున్న ఆరోపణలపై ఆయన స్పందించారు. తిరుమల శ్రీవారిని ఎంతో మంది అన్యమతస్థులు దర్శించుకుంటారని, వారందరూ డిక్లరేషన్ ఇవ్వడం లేదు కదా అని ప్రశ్నించారు.

కరోనా వ్యాప్తి నివారణలో భాగంగా తిరుమల శ్రీవారి బ్రహ్మోత్సవాలను ఏకాంతంగా నిర్వహించనున్నట్లు తితిదే ధర్మకర్తల మండలి ఛైర్మన్‌ వై.వి.సుబ్బారెడ్డి తెలిపారు. తిరుమల అన్నమయ్య భవనంలో ఈవో, అదనపు ఈవో, ప్రధాన అర్చకులతో కలిసి బ్రహ్మోత్సవాల వివరాలను ఆయన వెల్లడించారు. శనివారం ధ్వజారోహణంతో ఉత్సవాలు మొదలవుతాయని....రాత్రి ఎనిమిది గంటల సమయంలో పెద్ద శేషవాహనంతో వాహనసేవలు ప్రారంభమవుతాయని అన్నారు. పూర్వ సంప్రదాయాలను అనుసరిస్తూ గరుడ సేవ రోజు ముఖ్యమంత్రి జగన్‌మోహన్‌రెడ్డి రాష్ట్ర ప్రభుత్వం తరపున శ్రీవారికి పట్టువస్త్రాలు సమర్పిస్తారన్నారు. 24వ తేదీ ఉదయం కర్ణాటక ముఖ్యమంత్రి యడియూరప్పతో కలిసి జగన్మోహనరెడ్డి శ్రీవారి సేవలో పాల్గొంటారని అనంతరం నాదనీరాజనం వేదికగా జరగుతున్న సుందరకాండ పారాయణంలో ఇద్దరు ముఖ్యమంత్రులు పాల్గొంటారని తెలిపారు. అదే రోజు తిరుమలలో కర్ణాటక ప్రభుత్వం నిర్మించనున్న వసతిగృహాలకు ఇద్దరు ముఖ్యమంత్రులు శంకుస్థాపన చేస్తారన్నారు.

పారదర్శకత కోసమే కాగ్ ఆడిటింగ్

తితిదే నిధుల వినియోగంపై పారదర్శకత కోసమే కేంద్ర ప్రభుత్వ సంస్థ కాగ్‌ ద్వారా ఆడిటింగ్‌ నిర్ణయం తీసుకున్నాయని తితిదే ఛైర్మన్ వైవీ సుబ్బారెడ్డి చెప్పారు. తిరుమలలో దళారి వ్యవస్థను పూర్తి స్థాయిలో నిరోధించడానికి చర్యలు తీసుకుంటున్నామన్నారు. తిరుమల అన్నమయ్య భవనంలో బ్రహ్మోత్సవాల ఏర్పాట్లపై నిర్వహించిన సమావేశంలో పలు అంశాలపై ఆయన తన అభిప్రాయాలను వెల్లడించారు. తితిదే నిధులను ధార్మికేతర కార్యక్రమాలకు వినియోగిస్తున్నారనటంలో వాస్తవం లేదన్నారు. తిరుమల వేదికగా అన్యమత ప్రచారం సాగుతోందంటూ సామాజిక మాధ్యమాల్లో వస్తున్న వార్తలు, ప్రతిపక్ష పార్టీల ఆరోపణలను ఆయన ఖండించారు.

వారందరూ డిక్లరేషన్ ఇవ్వడం లేదు కదా!

ముఖ్యమంత్రి జగన్మోహన్‌రెడ్డి డిక్లరేషన్‌ లేకుండా శ్రీవారి ఆలయంలో ప్రవేశిస్తున్నారంటూ ప్రతిపక్ష నేత చంద్రబాబునాయుడు చేసిన ఆరోపణలపై ఆయన స్పందించారు. శ్రీవారిపై నమ్మకంతోనే స్వామిని దర్శించుకోవడానికి తిరుమల కొండకు వస్తారని... ప్రత్యేకంగా డిక్లరేషన్‌ ఎందుకన్నారు. రోజు ఎంతోమంది అన్యమతస్థులు వచ్చి శ్రీవారిని దర్శించుకుంటారని...వారందరూ డిక్లరేషన్‌ ఇవ్వడం లేదు కదా అంటూ ప్రశ్నించారు. కరోనా ప్రభావంతో హుండీ ఆదాయం తగ్గిపోయిందని సుబ్బారెడ్డి తెలిపారు. ప్రత్యామ్నాయ ఆదాయ మార్గాలను అన్వేషిస్తున్నామని, తితిదే అమలు చేస్తున్న సంక్షేమ కార్యక్రమాల అమలుకు అవసరమైన నిధులను సమకూర్చుకోవడానికి చర్యలు చేపడుతున్నామన్నారు.

తిరువీధుల్లో వాహనసేవలు ఉండవు: ప్రధాన అర్చకులు

తిరువీధుల్లో వాహన సేవలు, ఉత్సవాలు ఉండవని ప్రధాన అర్చకులు ప్రకటించారు. మహా రథోత్సవం బదులు సర్వభూపాల వాహన సేవ నిర్వహిస్తున్నట్లు తెలిపారు. వైదిక కార్యక్రమాలు యథావిధిగా జరుగుతాయన్నారు.

ఇదీ చదవండి : బ్రహ్మాండనాయకుని బ్రహ్మోత్సవం.. వాహన సేవల సమయాల్లో మార్పులు