Sri Padmavathi Ammavari Brahmotsavam-2021: తిరుచానూరు శ్రీ పద్మావతి అమ్మవారి కార్తిక బ్రహ్మోత్సవాలు.. ధ్వజారోహణంతో ప్రారంభమయ్యాయి. తొమ్మిది రోజులపాటు జరిగే ఈ ఉత్సవాల్లో భాగంగా ధనుర్లగ్నంలో వేదమంత్రోచ్ఛారణ మధ్య అర్చకులు ధ్వజారోహణం నిర్వహించారు. పాంచ‌రాత్ర ఆగ‌మ స‌ల‌హాదారు, కంకణభట్టార్‌ శ్రీ‌నివాసాచార్యులు ఆధ్వర్యంలో ఈ కార్యక్రమం శాస్త్రోక్తంగా జరిగింది.
రాత్రి జరిగే చిన్న శేషవాహనంతో సేవలు ప్రారంభం..
ధ్వజారోహణ ఘట్టంలో మొదటగా విష్వక్సేనారాధన, పుణ్యాహవచనం నిర్వహించారు. నెయ్యి, అర్ఘ్యం, పాద్యం, ఆచమనీయం, పంచగవ్యం, పాలు, పెరుగు, తేనె, పసుపునీటిని తొమ్మిది కలశాల్లో ఉంచి పరవాసుదేవ, విష్ణు, మధుసూదన, త్రివిక్రమ, వామన, శ్రీధర, హృషికేశ, పద్మనాభ, దామోదర దేవతలను ఆవాహన చేశారు. ఆ తరువాత షోడషోపచారాలు నిర్వహించారు. చతుర్వేదాలను పారాయణం చేశారు. ధ్వజస్తంభానికి అభిషేకం తరువాత బ్రహ్మూత్సవాలకు ఎలాంటి ఆటంకాలు కలగకుండా చూడాలని దేవతలను ప్రార్థిస్తూ రక్షాబంధనం చేశారు. రాత్రికి జరిగే చిన్న శేషవాహనంతో వాహన సేవలు ప్రారంభమవుతాయి.
పట్టువస్త్రాలు సమర్పించిన ఉపముఖ్యమంత్రి పుష్ప శ్రీవాణి
తిరుచానూరు శ్రీ పద్మావతి అమ్మవారి వార్షిక కార్తిక బ్రహ్మోత్సవాలను పురస్కరించుకొని రాష్ట్ర ప్రభుత్వం తరఫున ఉప ముఖ్యమంత్రి పుష్ప శ్రీవాణి దంపతులు.. పట్టువస్త్రాలు సమర్పించారు. ఆలయానికి చేరుకున్న ఉప ముఖ్యమంత్రికి తితిదే జేఈవో వీర‌బ్రహ్మం, ఆలయ అర్చకులు, అధికారులు సంప్రదాయబద్ధంగా స్వాగతం పలికారు. అనంతరం అమ్మవారిని దర్శించుకొని ప్రత్యేక పూజలు చేశారు. దర్శనానంతరం అమ్మవారి తీర్ధ ప్రసాదాలు అందజేశారు.
రాష్ట్ర ప్రభుత్వం తరఫున అమ్మవారికి పట్టువస్త్రాలు సమర్పించడం పూర్వజ‌న్మ సుకృతంగా భావిస్తున్నట్లు ఉపముఖ్యమంత్రి పేర్కొన్నారు. అమ్మవారి దర్శనానికి విచ్చేసే భక్తులకు తితిదే విస్తృత ఏర్పాట్లు చేసిందని తెలిపారు. రాష్ట్రం సస్యశ్యామలంగా ఉండాలని.. రాష్ట్ర ప్రజలు సుఖసంతోషాలతో ఉండాలని అమ్మవారిని ప్రార్థించినట్లు ఆమె తెలిపారు.
ఇదీ చదవండి.. : Dollar Seshadri Funeral: ముగిసిన డాలర్ శేషాద్రి అంత్యక్రియలు
