తితిదే నిర్వహణలో ఉన్న 'శ్రీ బాలాజీ దివ్యాంగుల శస్త్రచికిత్స పరిశోధన, పునరావాస కేంద్రం(బర్డ్)' నిరుపేదలకు ఉచిత వైద్యసేవలు అందించడంలో ప్రసిద్ధి గాంచింది. ఎముకలకు సంబంధించిన వ్యాధులకు చికిత్స చేయించుకునేందుకు మన రాష్ట్రంవారే కాక ఉత్తరాది రాష్ట్రాల పేదరోగులూ వస్తుంటారు. తెల్లరేషన్‌ కార్డు ఉన్నవారికి తుంటి, మోకీలు మార్పిడితోపాటు ఎముకలకు సంబంధించి ఎలాంటి వైద్యమైనా ఉచితంగా చేసేవారు. వీటి శస్త్రచికిత్స కోసం బాధితులు 3, 4 ఏళ్లు వేచి చూడాల్సినంత రద్దీ ఉండేది.
నిలిచిన ఉచిత వైద్యసేవలు
కొంతకాలంగా బర్డ్ ఆసుపత్రిలో ఉచిత వైద్యసేవలు నిలిపివేశారు. ప్రైవేటు ఆసుపత్రుల తరహాలో వైఎస్సార్ ఆరోగ్యశ్రీ పరిధిలో ఉన్న వ్యాధులకే ఉచిత శస్త్రచికిత్సలు చేయాలని తితిదే యంత్రాంగం నిర్ణయించింది. దీని వల్ల ఆరోగ్యశ్రీ పరిధిలో లేని మోకాళ్ల మార్పిడి, తుంటి ఎముకల శస్త్రచికిత్స పరికరాలు రోగులే కొనుగోలు చేయాల్సివస్తోంది. అందుకు వారి ఆర్థికస్థితి సహకరించక పేద రోగులు నిరాశగా వెనుదిరుగుతున్నారు.
ఆసుపత్రి అభివృద్ధి కోసమే
బర్డ్ ఆస్పత్రి నిర్వహణకు తితిదే ఏటా రూ.50 కోట్లు నిధులు కేటాయిస్తోంది. వీటిలో అధిక మొత్తం మోకీళ్లు, తుంటి ఎముకల శస్త్రచికిత్సల పరికరాల కోసం వినియోగిస్తున్నందున.. ఆసుపత్రి అభివృద్ధి ఆగిపోతుందని తితిదే భావించింది. స్వదేశీ మోకాలుకు రూ.38 వేలు, విదేశీ మోకాలుకు రూ.84 వేలు వసూలు చేయాలని నిర్ణయించారు. దీని ద్వారా సమకూరే మొత్తంతోపాటు తితిదే కేటాయించే నిధులతో ఆసుపత్రిని అభివృద్ధి చేయాలని నిర్ణయం తీసుకొన్నారు.
బర్డ్ ఆస్పత్రిలో ఉచిత శస్త్రచికిత్సలు ఆగిపోవటంతో.. గతంలో పరీక్షలు పూర్తిచేసుకొని ఆపరేషన్‌ కోసం ఎదురుచూస్తున్న వారు దిక్కుతోచని స్థితిలో పడ్డారు. డబ్బులు పెట్టి శస్త్రచికిత్సలు చేసుకోలేని పేదరోగులకు తితిదే ప్రాణదాన ట్రస్టు కింద అయినా ఉచితంగా వైద్యం చేయాలని కోరుతున్నారు.
ఇవీ చదవండి:
