ఈ నెల 27నుంచి 2021 జనవరి 2వ తేదీ వరకు కడప పెద్ద దర్గా ఉరుసు ఉత్సవాలను నిర్వహించనున్నట్లు ఉపముఖ్యమంత్రి అంజాద్ బాషా తెలిపారు. ఉరుసు నిర్వహణపై కడప అమీన్పీర్ పెద్ద దర్గాలో ముస్లిం మత పెద్దలు, జిల్లా ఉన్నతాధికారులతో సమావేశం నిర్వహించారు. కొవిడ్ నిబంధనల మేరకు ఈ ఏడాది తక్కువ మందితోనే ఉరుసు ఉత్సవాలు నిర్వహించాలని ప్రభుత్వం నిర్ణయించినట్లు ఆయన వెల్లడించారు. ఈ నిర్ణయాన్ని మత పెద్దలు పాటించాలన్నారు. ఎలాంటి అవాంఛనీయ ఘటనలకు తావులేకుండా పటిష్ఠ చర్యలు తీసుకోవాలని అధికారులను అంజాద్ బాషా ఆదేశించారు.
ఐదు రోజుల పాటు జరిగే ఈ ఉరుసు ఊరేగింపులు, గంధం మహోత్సవాలను వీధుల గుండా కాకుండా కేవలం దర్గాకే పరిమితం అయ్యేలా ఏర్పాట్లు చేసుకోవాలని కలెక్టర్ హరికిరణ్ తెలిపారు. ఈ సమావేశంలో అమీన్పీర్ పెద్ద దర్గా పీఠాధిపతి, ఉప ముఖ్యమంత్రి అంజాద్ బాషా, జిల్లా కలెక్టర్ హరికిరణ్, రాజకీయ పార్టీల నాయకులు, తదితరులు పాల్గొన్నారు.
ఇదీ చూడండి:
