ఆహా! అనిపించే "సొరకాయ గారెలు" - ఇలా చేస్తే ఒకటికి రెండు ఇష్టంగా తింటారు!

మినప్పప్పు గారెలను మించిన టేస్ట్ - ఒక్కసారి తింటే ఇక వదలరు!

Sorakaya Garelu Recipe in Telugu : సొరకాయలో ఆరోగ్యానికి మేలు చేసే ఎన్నో పోషకాలు ఉంటాయని నిపుణులు చెబుతున్నారు. అయితే, సొరకాయతో కర్రీ వండుకోవడం, పప్పు, సాంబార్​ చేసుకోవడం మనందరికీ తెలిసిందే! ఎప్పుడూ కూరలే కాకుండా ఈ సారి కొత్తగా సొరకాయతో గారెలు చేసేయండి. ఈ సొరకాయ గారెలు బయట క్రిస్పీగా, లోపల సాఫ్ట్​గా ఎంతో రుచికరంగా ఉంటాయి. వీటిని పిల్లలు, పెద్దలందరూ ఎంతో ఇష్టంగా తింటారు. మరి సొరకాయ గారెలు తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలో ఈ స్టోరీలో తెలుసుకుందాం.

కావాల్సిన పదార్థాలు :

• సొరకాయ తురుము - కప్పు
• మినప్పప్పు - పావుకప్పు
• పచ్చిశనగపప్పు - పావుకప్పు
• బియ్యం పిండి - పావు కప్పు
• ఎండుమిర్చి - 4
• పచ్చిమిర్చి - 8
• ఉప్పు- తగినంత
• కొత్తిమీర తురుము - కొద్దిగా
• నూనె - వేయించడానికి సరిపడా
• అల్లం ముక్కలు - 2 చిన్నవి
• వెల్లుల్లి రెబ్బలు - 10
• జీలకర్ర - టీస్పూన్
• కరివేపాకు - 2
• ఉల్లిపాయ - 2

తయారీ విధానం:

• ముందుగా ఓ మిక్సీ జార్లో మినప్పప్పు, పచ్చిశనగపప్పు వేసి మెత్తగా పౌడర్​ చేసుకోండి. ఆపై ఎండుమిర్చి వేసి మరోసారి గ్రైండ్​ చేసుకోండి.
• ఈ పిండిని పక్కన పెట్టుకోండి. ఇప్పుడు అదే మిక్సీ గిన్నెలో పచ్చిమిర్చిలు, అల్లం ముక్క, వెల్లుల్లి రెబ్బలు, రుచికి సరిపడా ఉప్పు, జీలకర్ర వేసి మెత్తగా గ్రైండ్​ చేసుకోండి.
• ఇప్పుడు ఓ మిక్సింగ్ బౌల్లో సొరకాయ తురుము, క్యారెట్​ తురుము, కొత్తిమీర, కరివేపాకు తరుగు, సన్నటి ఉల్లిపాయ ముక్కలు, గ్రైండ్​ చేసిన పచ్చిమిర్చి మిశ్రమం వేసి బాగా కలుపుకోండి.
• ఆపై ముందుగా రెడీ​ చేసుకున్న పచ్చిశనగపప్పు, మినప్పప్పు పొడి, బియ్యం పిండి వేసుకుని కలుపుకోండి. (అయితే, ఇక్కడ మీరు నీళ్లు పోయాల్సిన అవసరం ఉండదు. ఎందుకంటే సొరకాయ తురుములోనే నీరు ఉంటుంది. ఆ వాటర్​ గారెలు చేయడానికి సరిపోతుంది. సరిపోకపోతే కొన్ని నీళ్లు కలుపుకోవచ్చు)
• చివర్లో ఉప్పు రుచి చూసుకుని, జీలకర్ర వేసి కలపండి.
• ఇప్పుడు స్టవ్​పై కడాయి పెట్టి గారెలు వేయించడానికి సరిపడా ఆయిల్​ వేసి వేడి చేయండి.
• ఇప్పుడు పిండిని కొద్దిగా చేతిలోకి తీసుకుని గారెలు చేసి ఆయిల్లో వేసుకోండి. ఆపై స్టవ్​ మీడియం ఫ్లేమ్​లో ఉంచి గారెలు రెండు వైపులా ఎర్రగా కాల్చుకోండి.
• క్రిస్పీగా వేగిన సొరకాయ గారెలను ఒక ప్లేట్లోకి తీసుకోండి.
• ఇలానే మిగిలిన పిండితో గారెలు చేసుకుంటే సరిపోతుంది.
• అంతే ఇలా సింపుల్​గా తయారు చేసుకుంటే రుచికరమైన సొరకాయ గారెలు మీ ముందుంటాయి.
• సొరకాయ గారెలు నచ్చితే మీరు ఓ సారి ఇంట్లో ట్రై చేయండి.