Metro Dance Viral: యూట్యూబ్, ఫేస్బుక్, ఇన్స్టాగ్రాం.. ఇలా ఏది ఓపెన్ చేసినా కుప్పలు తెప్పలుగా.. రీల్స్, షార్ట్ వీడియోలే. క్రేజీగా ఉండే ఆ షార్ట్ వీడియోలను చూస్తూ పోతే.. సమయం, ఇంటర్నెట్ డాటా రెండూ ఇట్టే కరిగిపోతుంటాయి. అటు చూసేవాళ్లు కూడా షార్ట్ అండ్ స్వీట్గా ఉండే వీడియోలకే ఎక్కువ మొగ్గు చూపుతుండటం.. తీసేవాళ్లకూ పెద్ద కష్టంగా లేకపోవటం.. మొత్తానికి రీల్స్కి మార్కెట్లో క్రేజీ డిమాండ్ ఉంది. అయితే.. వీక్షకులకు ఆనందం పంచాలన్న తాపత్రయమో.. లేదా బాగా లైకులు, షేర్లు సంపాదించి ఫేమస్ అయిపోవాలని తపనో గానీ.. యువత మాత్రం వీటి కోసం బాగానే చెమటోడుస్తున్నారు. అందులో కొందరు రాత్రికి రాత్రే సెలబ్రిటీ అయిపోతే.. మరికొందరు మాత్రం లేనిపోని కష్టాలు కొనితెచ్చుకుంటూ చిక్కుల్లో పడుతున్నారు. ఇలా రీల్స్ కోసం ఓ అమ్మాయి చేసిన పని ఇప్పుడు చర్చనీయాంశంమైంది.
యువత తమ రోజువారి కార్యక్రమాల్లో కొంచెం సమయం దొరికినా.. రీల్స్ చేస్తూ, చూస్తూ కాలక్షేపం చేస్తున్నారు. ఎక్కడున్నా సరే.. తమకు నచ్చిన పని చేస్తూ.. షార్ట్ వీడియోలు తీసుకుంటున్నారు. అలా.. ఓ యువతి చేసిన రీల్స్ వ్యవహారం ఇప్పుడు తెగ వైరల్ అవుతోంది. నిత్యం ప్రయాణికులతో అత్యంత రద్దీగా ఉండే మెట్రో రైల్వేస్టేషన్‌లో.. ట్రైన్ కోసం అమ్మాయి ఎదురుచూస్తోంది. సమయం వృథా చేయటం ఎందుకని.. ఈ గ్యాప్లో ఓ రీల్ చేసేస్తే పోలా.. అనుకుంది. వెంటనే.. ట్రెండింగ్లో ఉన్న పాటను ఎంచుకుని.. బీట్కు తగ్గట్టు ఉర్రూతలూగించే రీతిలో డ్యాన్స్ చేయటం మొదలుపెట్టింది. ఆమె చేస్తున్న డ్యాన్స్ను తన స్నేహితులు రికార్డు చేస్తున్నారు. ఈ సన్నివేశాన్ని ఆశ్చర్యంతో చూడటం అక్కడున్న వాళ్లు వంతైంది.
ఇక్కడివరకు అంతా బాగానే ఉండగా.. ఆ వీడియోను సామాజిక మాధ్యమాల్లో పోస్టు చేసింది. ఇంకేముంది.. ఇప్పటివరకు మెట్రో స్టేషన్లలో ఇలా డాన్స్ చేస్తూ.. రీల్స్ ఎవరూ చేయకపోవటంతో ఈ వీడియో బాగానే వైరల్ అయ్యింది. అందులోనూ.. ఆమె డ్యాన్స్ చేసిన పాట కూడా ప్రస్తుతం ట్రెండింగ్లో ఉండటం వల్ల మరింత దూసుకుపోయింది. ఇది కాస్తా.. కొందరికి నచ్చకపోవటంతో మెట్రో అధికారులకు ఫిర్యాదు చేశారు. జనం ఎక్కువగా ఉంటే ప్రాంతాల్లో ఇలా చేయటం వల్ల.. మిగతావారికి ఇబ్బంది కలుగుతోందని కంప్లైంట్ రావటంతో.. అధికారులు స్పందించారు.
మెట్రోస్టేషన్లు, రైళ్లలో న్యూసెన్స్ చేస్తూ... ప్రయాణికులను ఇబ్బంది పెట్టే వారిపై తగిన చర్యలు తీసుకుంటామని మెట్రో అధికారులు వెల్లడించారు. ఇప్పటికే ఈ వీడియో చేసిన యువతీపై మెట్రో అధికారులు.. పోలీసులకు ఫిర్యాదు కూడా చేశారు. ఆ యువతి ఎవరు...? ఏ స్టేషన్లో నృత్యం చేసిందో గుర్తించి తగిన చర్యలు తీసుకుంటామని మెట్రో అధికారులు తెలిపారు.
ఇవీ చూడండి:
